Jue Mun 144 - NYANMIƐN NDƐ'N 1998

Famiɛn'n i Nyanmiɛn srɛlɛ

1 Jue nga o David i jue fluwa'n nun.

¹ Jue nga o David i jue fluwa'n nun. I waan: N la Anannganman i ase, afin ɔ ti kɛ yɛbuɛ sa i yɛ n talo i-ɔ. I yɛ ɔ kle min alɛ kunlɛ-ɔ. I yɛ man n si tanndan n kɔ alɛ-ɔ.

² Ɔ ti min ye yofuɛ, ɔ ti kɛ min fiawlɛ sua sa. Ɔ ti min fiawlɛ kpa tra su, yɛ ɔ ti min defuɛ. Ɔ sasa min kɛ nyrɛn sa, i sin yɛ n fia-a. I yɛ man min nvlefuɛ'm be nyin yi min-ɔn!

³ ?Anannganman, wan yɛlɛ sran, bɔ man i ndɛ ko mian wɔ-ɔ? ?Wan yɛlɛ klɔ sran, b'ɔ man a bu i akunndan nin-ɔn ?

⁴ Sran'n, i like b'ɔ fɛli i yɛlɛ aunngban b'ɔ fita kan kpɛkuun ɔ'a sin'n. I nguan'n ɔ ti tika kɛ lolɛ b'ɔ o lɛ kan kpɛkuun ɔ nun-man lɛ kun'n sa.

⁵ Anannganman, cia ɔ tranwlɛ'n kan nan jra. Fa ɔ́ sa kan oka mun man sin wɛnsrɛn fin be nun fite.

⁶ Yo man nyanmiɛn'n ɔ kpa sin nan min kpɔfuɛ'm be bo sanndi. To ɔ cua mun, to sanngan be nun.

⁷ Jran nglo lɔ to ɔ́ sa'n de min. Yi min nzue dan'n nun fite. De min aofuɛ'm bé sa nun.

⁸ Be kan gblɛ ndɛ mun. Be ta nda kpɛkuun be di-man su.

⁹ Ee Nyanmiɛn, n ´to jue uflɛ-uflɛ kun ɔ dunman nun. M ´bo sanngo bɔ i nyanman'n ti blu'n n ´fa manman wɔ.

¹⁰ Sɛ famiɛn'm be ´nyan be ti'n, ɔ fin wɔ. Ɔ fanngan nun yɛ man tokofi'n ɔ nyan-man David b'ɔ ti ɔ sufuɛ nin-ɔn.

¹¹ De min aofuɛ mun bɔ be kan gblɛ ndɛ mun, bɔ be ta nda kpɛkuun be di-man su'n, bé sa nun.

¹² E mma yasua'm be nyin trele be gbanflɛn nun kɛ waka sa. E mma bla'm be nyin talua, be ti kɛ famiɛn sua'm be nun kofiaja nga be sɛ be klanman'n sa.

¹³ Aliɛ wafa'n kwlaa be yi e tanngannin mun, be yi be piɛ! E bua mun nin é boli'm be trɛ kpa. Be sɔnnin kaka kpa blo lɔ.

¹⁴ E nannin'm be lo kpa. Be su bu-man e klɔ'm bé wun talɛ mun. Be su tra-man ye lomuɛn, yɛ e su bo-man awuyomo klɔ'n nun.

¹⁵ Nvlefuɛ nga be lɛ i sɔ like liɛ mun'n, be liɛ su ti ye! Nvlefuɛ nga Anannganman yɛ ɔ ti be Nyanmiɛn'n, be liɛ su ti ye!