Jue Mun 143 - NYANMIƐN NDƐ'N 1998

Anannganman, nán se kɛ a ´bu min fɔ

1 Jue nga ti David liɛ.

¹ Jue nga ti David liɛ. I waan: Anannganman, sie ɔ́ su tie ɔ srɛlɛ bɔ n srɛ wɔ'n, sie ɔ́ su tie ɔ srɛlɛ tantrantan bɔ n srɛ wɔ'n. Nian ɔ nanwlɛ bɔ a di i titi'n nin ɔ sa bɔ a yo i nuan su'n ti, tɛ mín su.

² N ti ɔ sufuɛ, nán se kɛ a ´bu min fɔ. Asiɛ nga su wa'n, sran fi nun-man wa bɔ fiɛn nun-mɛn i wun ɔ́ nyrun-ɔn .

³ Min kpɔfuɛ'n ɔ fuan min. Ɔ'a yi min ase ɔ'a tiatia mín su. Ɔ'a fa min ɔ'a yi i wie'n i aosin'n tuun nun kɛ be bɔ be wuli mlɔnmlɔn'n sa.

⁴ Min wla'n ɔ'a bo min wun srɛ b'ɔ kun min'n ti, min anwlɛn'n wanndi min klun.

⁵ Mín nyin kpɛn min laa nun. Sa nga a yoli be'n, m bu be akunndan, m bu be akunndan kpa.

⁶ M man mín sa'm be su nglo n kle wɔ. N de wɔ awuliɛ kpa kɛ asiɛ b'ɔ su srɛ nzue'n sa.

⁷ Anannganman, tɛ mín su ndɛndɛ. N wun-man sa wie fi yowlɛ bɔ kun. Nán yi ɔ́ nyin mín wun! Ɔ ti-mɛn i ti-ɔ, wie'n ɔ ´kun min.

⁸ Nglɛmun'n, kɛ be ´se kɛ lika'n ɔ'a cɛn cɛ'n, man n wun ɔ klun-ufue'n nun weiin, afin ɔ su yɛ n fa min wla'n gua-a. Atin ng'ɔ ti bɔ n `fa su'n, kle min, afin ɔ́ su yɛ n lafi-ɔ.

⁹ Anannganman de min min kpɔfuɛ'm bé sa nun! Wɔ nun yɛ n fia-a.

¹⁰ Kle min ɔ klun sa'n i yolɛ'n. Wɔ yɛ a ti min Nyanmiɛn nin-ɔn. Man ɔ Wawɛ klun-ufuefuɛ'n ɔ dun mmua min nyrun atin b'ɔ ti kpa'n su.

¹¹ Anannganman, nian ɔ dunman dan'n ti, yo man n nyan nguan. Kɛ bɔ a yo sa i nuan su'n ti'n, yi min nyrɛnnɛn'n nun fite.

¹² Nunnun min kpɔfuɛ mun ɔ klun-ufue'n ti. Be nga be nin min kun'n, yo man be kwlaa be wu, afin ɔ sufuɛ yɛlɛ min.