Jue Mun 141 - NYANMIƐN NDƐ'N 1998

David i nuan nun ndɛ bɔ Anannganman nian su'n

1 Jue nga ti David liɛ.

¹ Jue nga ti David liɛ. I waan: Anannganman, n kpan flɛ wɔ, kan ɔ́ wun bla ndɛndɛ. Kɛ n kpan flɛ wɔ'n, ti min aniɛn.

² Min srɛlɛ nga n srɛ'n, man ɔ yo ɔ nyrun kɛ ansans sa. Mín sa nga m man be su'n man ɔ yo ɔ nyrun kɛ nnɔsua nun tɛ bɔ be yi'n sa .

³ Anannganman, nian mín nuan'n su, sasa mín nuan'n.

⁴ Nán kplin su kɛ n kan ndɛ tɛ annzɛ n yo sa tɛtɛ kɛ be bɔ be kunndɛ be nga mun nin wulɛ'n sa. Nán man n yo i sɔ sa mlɔnmlɔn.

⁵ Sɛ sran nga a bu i sran kpa'n ɔ bo min'n, fɛ yɛ ɔ yo min-ɔn. Sɛ ɔ tu min fɔ'n, n kplin su. Nɛnnɛn yɛ ɔ su di min-ɔn. Klunwifuɛ mun'n, kannzɛ be yo sa tɛtɛ mun sɛ'n, n su yaci-man ɔ srɛlɛ bɔ n srɛ man be'n .

⁶ Kɛ be ´nian-an b'a su be nyrun mmua dunfuɛ'm be bo b'a yi be yɛbuɛ'm be kongo'n nun lɔ, yɛ be ´sie bé su be ´tie ndɛ bɔ n kan nin-ɔn. Be ´wun kɛ kannzu min ndɛ sɔ'm be ti ndɛ fɛ.

⁷ Kɛ be ´tu kacɛ bɔ be fufu asiɛ'n nun'n, i kunngba nin-ɔn, be ´to e owie mun gua blɔlɔ lɔ.

⁸ Anannganman Nyanmiɛn, ɔ́ nyin bo yɛ mín nyin ta-a. Sɛ ɔ ti fiawlɛ-ɔ, ɔ́ wun lɔ yɛ n kunndɛ i-ɔ. I ti nán yaci min lɛ man be kun min.

⁹ Sasa min, nán n tɔ sa tɛtɛ yofuɛ sɔ'm be aya nun.

¹⁰ Man ɔ yaci tra be bɔbɔ. Man aya sɔ'm be to fuan min.