Jue Mun 140 - NYANMIƐN NDƐ'N 1998

Sran nga be tɔn i suɛn'n i srɛlɛ

1 Jue nga o jue tofuɛ'm be su kpɛn'n nin David i fluwa'm be nun wie.

¹ Jue nga o jue tofuɛ'm be su kpɛn'n nin David i fluwa'm be nun wie. I waan:

² Anannganman, de min sran tɛtɛ'm bé sa nun! Sran nga be yo sran'm be sa kekleekle'm be ti, sasa min.

³ Be liɛ'n, sa tɛ'n i akunndan yɛ be sunnzun i be klun lɔ-ɔ. Cɛn kwlaa alɛ ba yɛ be kpɛ-ɔ.

⁴ Be nuan nun ndɛ'n i tɛ'n ti kɛ bɔyre sa, ɔ ti tɛ kɛ ɔnda'n i bɔyre'n sa !

⁵ Anannganman, fa min fia, nán n tɔ klunwifuɛ'm bé sa nun. Sran nga be yo sran'm be sa kekleekle'n, bɔ b'a bu min ase yilɛ akunndan b'a sie'n be ti, sasa min.

⁶ Wun tufuɛ'm b'a sua mín wun aya. B'a tinngɛ nyanman wie'm be nun b'a sie, b'a gua mín wun tɛ kɛ be ´fa tra min. B'a fa ninnge sɔ mun b'a sie be atin'n nuan sɛsɛsɛ!

⁷ N seli Anannganman kɛ: «Min Nyanmiɛn'n yɛlɛ wɔ, tie min srɛwa tantrantan bɔ n srɛ wɔ'n.

⁸ Anannganman Nyanmiɛn, a ti kɛ min fiawlɛ sua sa, wɔ yɛ man n nyan n ti-ɔ. Kɛ alɛ'n tɔ'n, wɔ yɛ a kata mín su-ɔ.

⁹ Anannganman, like nga klunwifuɛ'n waan ɔ ´yo'n, nán man ɔ yo ye. Sa ng'ɔ sunnzun'n kɛ ɔ ´yo'n, nán mɛn i wun atin, ɔ ti-mɛn i ti-ɔ, ɔ ´fa di i nuan.»

¹⁰ Be bɔ be nin min lɛ i'n be bo sin yia min. Sa tɛ nga be fa sunnzun mín'n, man ɔ kaci tɔ be bɔbɔ bé ti'n su!

¹¹ Man sɛnmlɛn kpukpu gua bé su. Man be kan bé bo guɛ i sin'n nun. Man be kan bé bo guɛ i ngblɔn nga be tɔ nun-ɔn be fite-man kun'n i nun.

¹² Nán sran b'ɔ ti sran'm be suɛn tɔnfuɛ'n ɔ ka mɛn ng'ɔ o yɛ'n nun. Man nyrɛnnɛn tɔ sran ng'ɔ yo sran'm be sa kekleekle'n i su tikatikatika.

¹³ N si kɛ Anannganman di nyrɛnnɛnfuɛ'm be jɔlɛ mun klanman man be, yɛ ɔ bu-man yalɛfuɛ'm be ndɛ kwlɛ.

¹⁴ Anannganman, be nga a bu be sran kpa'n be ´bo flɛ wɔ. Sɛsɛfuɛ'm be ´kwla ɔ nyrun jran.