Jue Mun 139 - NYANMIƐN NDƐ'N 1998

Anannganman b'ɔ si sran i su sa'n kwlaa

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan: Anannganman, a si min klun lɔ akunndan'n, a si min wafa bɔ n ti'n.

² Sɛ n ´tran ase o, sɛ n ´jaso o, a si. A si akunndan nga n wa bu'n .

³ Sɛ n ´nanti n sin o, sɛ n ´la o, a wun i. Sa nga n yo'n, a si i kwlakwla kpan.

⁴ Sɛ ndɛ yɛ n wa kan b'ɔ nian fite-man mín nuan bɔbɔ'n, a si i kwlakwla'n lalaa .

⁵ A o mín sin lɔ, wɔ kunngba'n a o min nyrun, a fa ɔ sa'n a sie min su.

⁶ Silɛ nga a fa si min'n, ɔ tra min kpɛn, ɔ tra min ngwlɛlɛ'n su fuun, n kwla wun-mɛn i bo.

⁷ ?Ninfan cɛ yɛ n ´kɔ bɔ ɔ Wawɛ'n nun-man lɛ-ɔ? ?Ninfan cɛ yɛ n ´kɔ bɔ a nun-man lɛ-ɔ?

⁸ Sɛ n fu nglo lɔ o, a o lɔ. Sɛ n kɔ blɔlɔ lɔ o, a o lɔ .

⁹ Sɛ n tu pɛpɛpɛpɛ kɛ anunman sa n ko tran wia afiliɛ lɔ o, sɛ n ko tran wia atɔliɛ lɔ o,

¹⁰ lɔ kusu a ´tinngɛ ɔ́ sa nun a ´tra min, a ´kle min sinwlɛ.

¹¹ Sɛ bɔ n waan man aosin'n ɔ wla tuun nan ɔ kata mín su'n, aosin sɔ'n ɔ kaci kannin ɔ kpaja sin yia min.

¹² Ɔ liɛ'n, aosin'n ti-man tuun ɔ nyrun, kɔnguɛ'n kpaja weiin kɛ wia nun sa. Ɔ liɛ ɔ sa nun'n, kɔnguɛ o, wia nun o, i kwlaa ti kun .

¹³ Wɔ yɛ a siesieli min-ɔn. A wuli min kɛ tannin sa mín nin ku sɛ'n nun.

¹⁴ N ´yo ɔ mo yilɛ klanman bɔ a yili min'n ti. Ɔ sa nuan ninnge be yo nyɛnmɛn, n wun i wlɛ sɔ.

¹⁵ Blɛ bɔ a yili min nvialiɛ nun, bɔ a wuli min kɛ tannin sa, mín nin ku sɛ'n nun, min wunnɛn'n i lika fi ti-man fiawa ɔ nyrun.

¹⁶ I nun bɔ n tɛ yo mmoja bɔbɔ'n, ɔ́ nyin ta min. Asiɛ'n su cɛn ba nga n ko di'n, a dun mmua klɛli i ngba guɛli i ɔ fluwa'n nun kusu wuun n nian di-man bɔ kun.

¹⁷ Ee Nyanmiɛn, wɔ akunndan'm be bo ti kploun o! Be sɔnnin kpanngban o!

¹⁸ Sɛ be kan aunnyan ngba kwlaa bo nun'n, i nɔnnin tra be ngba. N lafi lele n ´tinnge-ɔ, e nin wɔ-ɔ.

¹⁹ Ee Nyanmiɛn, nunnun klunwifuɛ mun ke! Sran kunfuɛ mun, an `jaso min nyrun lɛ .

²⁰ Ɔ kpɔfuɛ'm be kan wɔ wun ndɛ tɛtɛ kpa sa. Ɔ dunman'n yɛ be fa wlan sin be kpɛ gblɛ mun-ɔn .

²¹ Anannganman, n kpɔ ɔ kpɔfuɛ mun, mín nyin ci be bɔ be nin wɔ be lɛ i'n.

²² N kpɔ be kpɔlɛ kpa nga be flɛ i kpɔlɛ'n. M'an fa be m'an bu min kpɔfuɛ wie.

²³ Ee Nyanmiɛn, nian min anwlɛn nun! Sa min mian! Nian min klun lɔ akunndan'n!

²⁴ Sɛ a nian nan atin nga n wo su'n ti tɛ'n, fa min sie ɔ bɔbɔ wɔ atin liɛ'n su.