Jue Mun 138 - NYANMIƐN NDƐ'N 1998

David tu i klun manman Anannganman'n

1 Jue nga ti David liɛ.

¹ Jue nga ti David liɛ. Anannganman, n ´tu n klun m ´manman wɔ. Ninnge nga sran'm be sɔ be'n be nyrun'n n ´to jue n yi wɔ ayɛ.

² N ´kɔ ɔ sua'n nun lɔ n ´ko koto m ´bo flɛ wɔ ɔ klun-ufue nin ɔ nanwlɛ bɔ a di'n ti, afin ndɛ nga a kan kleli min'n, a niannin su yoli i su like. I kpa'n bɔ a yo trali su.

³ I nun bɔ n kpan flɛli wɔ'n, a tɛli mín su. A wlali min fanngan, a mannin min wunmiɛn.

⁴ Anannganman, kɛ asiɛ'n su famiɛn'm be ´ti ɔ́ nuan ndɛ'n, be kwlaa be ´manman wɔ.

⁵ Be ´to jue be manman wɔ sa nga a yo be'n be ti. Be ´se kɛ: «Anannganman i anyrunnyan'n ɔ ti dan o!»

⁶ Anannganman o nglo lɔ, sanngɛ ɔ wun be nga be kan bé wun ase'n mun. Sran nga be yo bé wun dandan'n, ɔ o mmua lɔ ɔ wun be .

⁷ Sɛ bɔ nyrɛnnɛn tɔ mín su sɛ'n, wɔ man n ka nguan nun. Ya nga min kpɔfuɛ'm be fɛ i mín wun'n, a kɛn i ase, yɛ a de min.

⁸ Anannganman, yia sa'm be kwlaa be nuan kpa man min. Anannganman, ɔ klun-ufue'n wo lɛ tititi. Junman nga a boli be bo'n, nán yi be ase .