Jue Mun 136 - NYANMIƐN NDƐ'N 1998

Izraɛlfuɛ'm be defuɛ i ase lalɛ

¹ An `manman Anannganman, afin ɔ ti kpa, afin i klun-ufue'n wo lɛ tititi.

² An `manman Nyanmiɛn b'ɔ lɛ-man wunsu'n, afin i klun-ufue'n wo lɛ tititi.

³ An `manman Miɛn'm be Miɛn afin i klun-ufue'n wo lɛ tititi.

⁴ I kunngba cɛ yɛ ɔ yi atrɛ dandan mun-ɔn, afin i klun-ufue'n wo lɛ tititi.

⁵ I yɛ i ngwlɛlɛ'n ti ɔ yili nyanmiɛn'n b'ɔ la nglo lɔ plaii nin-ɔn, afin i klun-ufue'n wo lɛ tititi.

⁶ I yɛ ɔ fali asiɛ'n sɛli i nzue'n su-ɔ, afin i klun-ufue'n wo lɛ tititi.

⁷ I yɛ ɔ yili nyanmiɛn'n b'ɔ la nglo lɔ plaii'n i su lɔ ninnge dandan'm bɔ be kpaja mun-ɔn, afin i klun-ufue'n wo lɛ tititi.

⁸ Ɔ yili wia'n kɛ ɔ kpaja wia'n nun, afin i klun-ufue'n wo lɛ tititi.

⁹ Ɔ yili anglo ba nin nzraama mun kɛ be fite kɔnguɛ, afin i klun-ufue'n wo lɛ tititi.

¹⁰ Ɔ tuli Eziptfuɛ'm be fɔ, ɔ yoli man be mma klikli'm be wuli, afin i klun-ufue'n wo lɛ tititi.

¹¹ Kpɛkuun ɔ yili Izraɛlfuɛ mun be afiɛn fiteli, afin i klun-ufue'n wo lɛ tititi.

¹² I lɛ nun'n, ɔ yili i wunmiɛn dan'n i nglo, afin i klun-ufue'n wo lɛ tititi.

¹³ Ndɛma jenvie'n, i yɛ ɔ kpɛli nun-ɔn, afin i klun-ufue'n wo lɛ tititi.

¹⁴ I yɛ man Izraɛlfuɛ'm be sinnin jenvie sɔ'n i afiɛn nin-ɔn, afin i klun-ufue'n wo lɛ tititi.

¹⁵ Ɔ yoli man Ezipt famiɛn'n nin i sonja'm be mlɔnnin jenvie sɔ'n nun, afin i klun-ufue'n wo lɛ tititi.

¹⁶ Ɔ fɛli i nvle'n nunfuɛ mun sinnin aawlɛ flɛnnɛn'n nun lɔ, afin i klun-ufue'n wo lɛ tititi.

¹⁷ Ɔ nunnun famiɛn dandan wie mun, afin i klun-ufue'n wo lɛ tititi.

¹⁸ Ɔ yoli man famiɛn sroesroe wie'm be wuli, afin i klun-ufue'n wo lɛ tititi.

¹⁹ Siɔn b'ɔ ti Amɔr famiɛn'n wo nun, afin i klun-ufue'n wo lɛ tititi.

²⁰ Ɔg b'ɔ ti Bazan famiɛn'n wo nun wie, afin i klun-ufue'n wo lɛ tititi.

²¹ Ɔ fali be mɛn'n mannin sran uflɛ mun kɛ be aja-a, afin i klun-ufue'n wo lɛ tititi.

²² Ɔ fa mannin Izraɛlfuɛ mun bɔ be ti i sufuɛ'n kɛ ɔ ti bé aja like, afin i klun-ufue'n wo lɛ tititi.

²³ I nun bɔ be guali e nyin ase'n, i yɛ i wla kpɛnnin e su-ɔ, afin i klun-ufue'n wo lɛ tititi.

²⁴ Be nga be mianmian ye'n, i yɛ ɔ deli ye bé sa nun-ɔn, afin i klun-ufue'n wo lɛ tititi.

²⁵ Asiɛ'n su ninnge nga nguan o be nun'n be kwlaa, i yɛ ɔ yi bé nuan nun aliɛ-ɔ, afin i klun-ufue'n wo lɛ tititi.

²⁶ An `la nglo lɔ Nyanmiɛn'n i ase, afin i klun-ufue'n wo lɛ tititi.