Jue Mun 135 - NYANMIƐN NDƐ'N 1998

Anannganman i kpli b'ɔ ti'n

¹ An `manman Anannganman! Amun bɔ an ti Anannganman i sufuɛ'n, an `bo flɛ i, an `mɛnmɛn i.

² An bɔ an jran Anannganman i sua nun'n, an bɔ an wo i awlo'n nun'n, an `mɛnmɛn i.

³ An `mɛnmɛn i, afin ɔ ti kpa. An `bo flɛ i, afin i klun ti ufue.

⁴ Ɔ fali Zakɔb nin Izraɛlfuɛ mun kɛ be yo i bɔbɔ i liɛ .

⁵ N wunnin kɛ Anannganman ti dan nan ɔ tra amuɛn'm be kwlakwla.

⁶ Like kwlaa nga Anannganman waan ɔ ´yo'n, ɔ yo. Sɛ nyanmiɛn b'ɔ la nglo lɔ plaii'n su lɔ o, Sɛ asiɛ'n su wa o, sɛ jenvie'n bo lɔ o, annzɛ kusu bunman'n kwlaa nun o,

⁷ ɔ yo man nyanmiɛn ble'n ɔ jaso nyanmiɛn'n b'ɔ la nglo lɔ plaii'n i bue kun lɔ ba. Ɔ yo man nyanmiɛn'n ɔ kpa sin man nzue tɔ, ɔ yo man aunngban'n ɔ fita.

⁸ Ezipt lɔ'n, kɛ ɔ fɛ i sran'm be nun lele fa wlu nnɛn'm be nun'n, ɔ yoli man be mma klikli'm be wuli.

⁹ Anannganman yili atrɛ mun, ɔ yoli abonuan sa mun Ezipt mɛn'n nun lɔ. Ɔ fa tuli Ezipt famiɛn nin i sufuɛ mun be fɔ.

¹⁰ Ɔ tuli nvle sunman be nunfuɛ'm be fɔ, ɔ yoli man famiɛn dandan wie'm be wuli,

¹¹ Siɔn b'ɔ ti Amɔrfuɛ'm be famiɛn'n wo nun. Ɔg b'ɔ ti Bazan famiɛn'n, ɔ nin Kanaan famiɛn'm be kwlaa be o nun wie.

¹² Ɔ fali be lika'n mannin Izraɛlfuɛ mun bɔ be ti i nvle nunfuɛ'n kɛ be fa yo be liɛ.

¹³ Anannganman, ɔ dunman'n wo lɛ titi, ɔ mlin-man le.

¹⁴ Afin Anannganman di i nvle'n nunfuɛ'm be jɔlɛ, ɔ ´si i sufuɛ'm be aunnvuɛ .

¹⁵ Nvle kun nga'm be amuɛn mun'n, jɛtɛ ufuɛ annzɛ sika ɔkwlɛ yɛ be fa yi be-ɔ. Be ti sran sa nuan like.

¹⁶ Be lɛ nuan sanngɛ be ijɔ-man. Be lɛ nyinma sanngɛ be wun-man ase.

¹⁷ Be lɛ su sanngɛ be ti-man sa. Be de-man wunmiɛn bɔ kaan sa.

¹⁸ Be nga be yi be'n, bɔ be fa be wla'n gua be su'n, be ti kɛ be sa.

¹⁹ Izraɛlfuɛ mun, an `la Anannganman ase! Aarɔn i osu nunfuɛ mun, an `la Anannganman ase!

²⁰ Levi i osu nunfuɛ mun, an `la Anannganman ase! Amun nga amun nyin yi Anannganman'n, an `lɛ i ase!

²¹ Man be la Anannganman b'ɔ o Siɔn'n, b'ɔ tran Zerizalɛm'n i ase. An `manman Anannganman!