Jue Mun 132 - NYANMIƐN NDƐ'N 1998

Siɔn b'ɔ ti Anannganman i tranwlɛ'n nin David i klɔ'n

1 Zerizalɛm kɔlɛ'n i su jue.

¹ Zerizalɛm kɔlɛ'n i su jue. Anannganman, man ɔ wla kpɛn David su. Man ɔ wla kpɛn i afɛ ng'ɔ fɛli'n su.

² Anannganman, ɔ fua kleli wɔ, ɔ fua kleli wɔ Nyanmiɛn bɔ a kwla'n, ɔ fua kleli wɔ bɔ a ti Zakɔb i Nyanmiɛn'n kɛ:

^3-5 «Sɛ n nian nyan-man Anannganman i lika, sɛ n nian nyan-man sua n nian man-man Zakɔb i Nyanmiɛn b'ɔ kwla'n, kɛ n ´wlu min bɔbɔ min sua liɛ nun sa nan n ´fu min bɛ'n su n ´la m muanmuan min nyinma n lafi bɔ cɛ'n, nán min-ɔn.»

⁶ Be kɛnnin i laa kɛ Nyanmiɛn i alaka'n wo Efrata. E ko wunnin i sakpa Zaar bue liɛ'n su lɔ.

⁷ An man e wɔ Anannganman i lika'n nun lɔ. E `ko koto i ja takatakawlɛ'n i nyrun lɛ.

⁸ Anannganman, jaso bla ɔ wunmiɛn dewlɛ lika'n nun. A nin wɔ alaka bɔ ɔ fanngan'n wo nun'n be `bla.

⁹ Man ɔ nyrun jranfuɛ'm be wla sa'n i nuan su yolɛ'n kɛ be wla tralɛ'n sa, yɛ man ɔ sufuɛ nanwlɛfuɛ'm be bo sro.

¹⁰ Famiɛn bɔ ɔ bɔbɔ a fɛli i sieli'n, ɔ sufuɛ David dunman nun ti nán yi i blo.

¹¹ Anannganman tali nda kleli David. Anannganman su kpɛ-mɛn i wun le, ɔ seli kɛ: «Wɔ famiɛn bia'n, n ´fa ɔ klun ba yɛ n ´fa tran su-ɔ .

¹² Aenguɛ nga e nin wɔ e trali'n, yɛ mmla nga n fa mannin ɔ mma mun'n, sɛ be nian su'n, be mma liɛ'm be kusu be yɛ be ´tran be osu tititi-ɔ.»

¹³ Afin Siɔn lɔ yɛ Anannganman niannin lele kleli kɛ ɔ ´tran-an.

¹⁴ I waan: «Wa ti min wunmiɛn dewlɛ lika tititi. N ´tran wa, afin wa yɛ tranlɛ yo min fɛ-ɔ.

¹⁵ N ´yo Siɔnfuɛ'm be ye, m ´man be aliɛ kpanngban kpa. Siɔn klɔ'n su yalɛfuɛ'm be ´nyan aliɛ be ´di be ku ´yi.

¹⁶ N ´fa be ti nyanlɛ'n n wla Nyanmiɛn nyrun jranfuɛ'm bé wun kɛ tralɛ sa. I nun lɔ Nyanmiɛn sufuɛ nanwlɛfuɛ'm be ´bo sro.

¹⁷ N ´yo man famiɛn dan kun ´fite David osu'n nun. Famiɛn bɔ n sieli'n, n ´yo man ɔ nyan i ja nunfuɛ .

¹⁸ N ´yo man i kpɔfuɛ'm be ´wun nyannzuɛn tratra su. Kɛ ɔ ´yo sɔ'n, wuun i kusu i famiɛn kle'n wo i ti'n su nyɛnnyɛnnyɛn!»