Jue Mun 127 - NYANMIƐN NDƐ'N 1998

Sua nga nán Anannganman yɛ ɔ kplan'n i su ndɛ

1 Zerizalɛm kɔlɛ'n i su jue. Jue nga ti Salomɔn liɛ.

¹ Zerizalɛm kɔlɛ'n i su jue. Jue nga ti Salomɔn liɛ. I waan: Sua nga nán Anannganman yɛ ɔ kplan'n, be nga be kplɛn i lɛ'n, be kle be wun yalɛ bɔ ngbɛn. Klɔ nga nán Anannganman yɛ ɔ nian su'n, be nga be nian su'n, be sɛsɛ i ngbɛn .

² Aliɛ'n ɔ kwla cɛn-man nan amu'an jaso, sanngɛ wuun amun la-man ndɛ. Amun fɛ lele nan amu'an nyan amun nuan nun aliɛ b'a di. Nga amun yo i sɔ'n ɔ ti ngbɛn, afin Anannganman fa aliɛ kunngba nga an di'n man i klofuɛ nga be la be lafi mun.

³ Aja nga Anannganman fa man awlo kun'n, like ng'ɔ fa cɛ i'n, i ti nin i bo'n yɛlɛ be klun ba .

⁴ Ba yasua nga sran kun wu be i gbanflɛn nun'n be ti kɛ cua bɔ be o safunyrɛn'n i sa nun'n sa.

⁵ Sran nga cua sɔ'm be yi i koniɛn pata'n, i liɛ su ti ye! Sɛ ɔ nin i kpɔfuɛ'm be nyan ndɛ klɔ'n i anuan nun lɔ'n, ɔ kwla wun-man nyannzuɛn.