Jue Mun 124 - NYANMIƐN NDƐ'N 1998

Nyanmiɛn i mma'm be sin jranlɛ b'ɔ jran'n

1 Zerizalɛm kɔlɛ'n i su jue. Jue nga ti David liɛ.

¹ Zerizalɛm kɔlɛ'n i su jue. Jue nga ti David liɛ. I waan: Sɛ Anannganman nin ye nun-man nun'n, man Izraɛlfuɛ'm be kan kɛ:

² «Sɛ Anannganman nin ye nun-man nun'n,» wuun kɛ sran'm be nin ye nyɛnnin i'n,

³ bɔ be fali ye wun ya dan'n, wuun be mɛnnin ye mɔnnɛn-mɔnnɛn.

⁴ Sɛ Anannganman nin ye nun nun-man nun'n, wuun nzue mɛnnin ye, wuun nzue b'ɔ ´tutu ba'n ɔ katali e su,

⁵ wuun nzue'n ng'ɔ tu kplukplu'n ɔ sinnin e su ɔ katali e su kplu.

⁶ E ´la Anannganman i ase, afin ɔ'a fa-man ye ɔ'a man-man e kpɔfuɛ mun kɛ be fa e be bo bé je nun.

⁷ E yoli kɛ anunman bɔ b'a to i wun tɛ b'a trɛ kpɛkuun ɔ'a fin tɛ sɔ'n nun ɔ'a fite'n sa. Tɛ'n tili, kpɛkuun yɛ e nyannin e ti-ɔ.

⁸ E ukalɛ'n ɔ fin Anannganman b'ɔ yili nglo lɔ nin asiɛ'n.