Jue Mun 119 - NYANMIƐN NDƐ'N 1998

Nyanmiɛn i ndɛ'n i su jue

¹ Be nga bɔ be nanti sein'n, bɔ Anannganman i mmla'n su yɛ be nian be nanti'n, be liɛ su ti ye!

² Be nga be nian sa ng'ɔ fa sie be nyrun'n su be yo'n, bɔ be tu be klun be kunndɛ i'n, be liɛ su ti ye!

³ Be yo-man sa ng'ɔ fata-man'n, Anannganman i atin'n su seiin yɛ be fa-a.

⁴ Anannganman kɛ a sieli ɔ mmla'n, ɔ waan be `fa su ti-ɔ.

⁵ N srɛ kɛ man n si nanti nan n mian min nyin n yo wɔ klun sa'n,

⁶ nan sɛ sa sɔ'n wie kpɛn min klun'n, m'an wun-man su nyannzuɛn i kasiɛn nun'n ti.

⁷ N ´nian nun m ´manman wɔ, afin kɛ m bu ɔ ndɛ nga a kan be'n, be akunndan'n n nian'n, be ti i nuan su.

⁸ Min waan n ´mian min nyin n yo wɔ klun sa'n. Nán yaci mín bo suanlɛ'n mlɔnmlɔn.

*

⁹ ?Ɔ yo sɛ yɛ gbanflɛn kun annzɛ talua kun kwla yo saun-ɔn? San ɔ ´fa wɔ ndɛ nga a kan'n su.

¹⁰ N fa min wun m mantan wɔ mantanlɛ kpa. Nán yaci min lɛ man n san ɔ mmla'n i wun n fa uflɛ.

¹¹ N fa ɔ ndɛ'n n sie min klun kpa kɛ ɔ ko yo nan m'an fɔn-man ɔ́ wun'n ti.

¹² Anannganman, mo o! Kle min ɔ klun sa'n!

¹³ Ndɛ nga a kannin'n, n ´nian su n ´kɛn i kunngun n ´gua lɔ.

¹⁴ Kɛ n fa mmla nga a sie'n bé su'n, n klun jɔ, ɔ ti kɛ min wun yɛ m'an nyɛn i sa.

¹⁵ M bu sa nga a fa be sie sran'm be nyrun'n be akunndan kpa. N nian atin nga a kle'n be su kpa.

¹⁶ N fa sa nga a kle'n n yo min anwlɛn su like. N wla fi-man ɔ nuan ndɛ'n su le!

*

¹⁷ Yo min bɔ n ti ɔ sufuɛ min ye, man n nyan nguan, nan n `fa wɔ ndɛ'n.

¹⁸ Tike mín nyin man n wun ɔ mmla'n b'ɔ be yo nyɛnmɛn'n.

¹⁹ N ti aofuɛ asiɛ'n su, nán fa ɔ mmla'n fia mín wun .

²⁰ Ndɛ nga a kannin be'n, n konvi sɔ be tititi.

²¹ Wun tufuɛ tɛ nga be fa-man ɔ mmla'n su mlɔnmlɔn'n, a nin be `yia nun.

²² Nán man n yo finfin, nán man sran'm be srisri min, afin mmla nga a sie'n, n tu n klun n fa su.

²³ Min liɛ n ti ɔ sufuɛ. Sɛ bɔ famiɛn i awlo lɔ sran dandan'm be cici min wun sa-a, ɔ klun sa yolɛ'n yɛ ɔ o min akunndan'n nun-ɔn.

²⁴ Sa nga a fa be sie min nyrun'n be yo min fɛ lele tratra su, be ti kɛ min afɔtuɛ manfuɛ sa.

*

²⁵ Min yɛ n la ndutre nun yɛ, yo man n nyan nguan kɛ a fa kannin'n sa.

²⁶ N kokoli min su sa mun n kleli wɔ, a tɛli mín su. Kle min ɔ klun sa'n.

²⁷ Ɔ mmla nga a sie be'n, yiyi be nun kle min man m `bu wɔ abonuan ninnge'm be akunndan.

²⁸ Klunngbɔ ti n sun. Man mín su kɛ a fa kannin'n sa!

²⁹ Yo nan nán n fa gblɛgblɛ'n cici mín ti. Yɛ si min aunnvuɛ, yo man n fa ɔ mmla'n.

³⁰ Nanwlɛ atin'n yɛ n fa-a. Ndɛ nga a kan be'n, yɛ n fa-a.

³¹ N fa sa nga a fa sie min nyrun'n n cici min ti. Anannganman, nán yaci min lɛ man n wun nyannzuɛn.

³² Atin nga ɔ mmla'n kle'n i su yɛ n nanti wawa-a, afin a yo man min wla'n ɔ gua ase.

*

³³ Kle min atin nga n ko fa su'n, yɛ n ´fa su lele n ´guɛ i ti nin i bo!

³⁴ Man min ngwlɛlɛ man n fa ɔ mmla'n su, yɛ n ´tu n klun n fa su .

³⁵ Fa min sin atin nga ɔ mmla'n kle'n su, afin n klo i ngboko.

³⁶ Yo man sa nga a fa sie min nyrun kɛ n yo be'n yɛ n `fa cici mín ti-ɔ, nán n fa ninnge nyanlɛ'n n cici mín ti .

³⁷ Yo man n yi min nyin ninnge ngbɛn-ngbɛn'm be su, yo man n nanti wɔ atin'n su.

³⁸ Like nga a kannin kɛ a ´yo man be bɔ bé nyin yi wɔ'n, yo man min, n ti ɔ sufuɛ.

³⁹ Yo nan nán man be kpɛ min nzowa, n sro i sɔ'n. Ɔ sa nga a kan be'n, be yɛ be ti kpa-a.

⁴⁰ Mmla nga a sie be'n, yɛ n fɛfɛ n kunndɛ be-ɔ. Wɔ bɔ a yo sa mun i nuan su'n, yo man n nyan nguan!

*

⁴¹ Anannganman, yo min ye, de min kɛ a fa kannin'n sa!

⁴² Be nga be kpɛ min nzowa'n, man n nyan wie n tɛ be su, afin ɔ́ nuan ndɛ'n yɛ n fa n wla'n n gua su-ɔ.

⁴³ Nán kplin su kɛ n yaci nanwlɛ'n i dilɛ, afin ɔ ndɛ nga a bu'n bé su yɛ n lafi-ɔ.

⁴⁴ N ´fa ɔ mmla'n su tititi, n su yaci-mɛn i su falɛ'n le.

⁴⁵ Kɛ n ´nanti'n n ´kɔ'n, n fa-man like fi'n tanndan-man mín ja nun. Ɔ mmla nga a sie be'n, be yɛ n kunndɛ-ɔ.

⁴⁶ Afin sa nga a sie be'n, n ´kan be famiɛn'm be nyrun, n su sa-man nun nyan.

⁴⁷ N ´fa ɔ mmla mun n ´yo min anwlɛn su like. N klo be kpa sakpa.

⁴⁸ Kɛ m ´man mín sa'n su bɔ n ´srɛ wɔ'n, n yaci-man sa nga a kle be'n be akunndan bulɛ le.

*

⁴⁹ Ndɛ nga a kan kleli min bɔ n ti ɔ sufuɛ'n, nán man ɔ́ wla fi su! Afin i yɛ man n wla'n ɔ guali ase-ɔ.

⁵⁰ Kɛ n wo nyrɛnnɛn nun'n, i yɛ n fa cici min wla-a. Ɔ ndɛ bɔ a kan'n yɛ ɔ man nguan-an.

⁵¹ Wun tufuɛ mun'n, min srilɛ'n yɛ ɔ ti be junman-an. Sanngɛ n san-man ɔ mmla'n i wun n fa-man uflɛ.

⁵² Anannganman n wla kpɛn ɔ ndɛ nga a buli be laa'n be su, n fa fɔnvɔ min wun.

⁵³ Kɛ n wun kɛ klunwifuɛ'n be kaci bé sin be si ɔ mmla'n, kɛ n wun aeliɛ tɛtɛ nga be yo'n, kɛ min anwlɛn'n ɔ kpɛ min klun sa!

⁵⁴ Kɛ bɔ n ti kɛ aofuɛ sa ti'n, sa nga a kle be mun'n yɛ be ti min jue yɛ n to-ɔ.

⁵⁵ Ee Anannganman, kɔnguɛ'n, m bu ɔ dunman'n i akunndan kɛ ɔ ´yo nan m'an fa ɔ mmla'n su'n ti.

⁵⁶ Min like ng'ɔ ti min cinnjin'n, yɛlɛ ɔ mmla nga a sie be'n be su falɛ.

*

⁵⁷ Ee Anannganman, like ng'ɔ nin min ka bɔ n kɛn i ndɛ titi'n, yɛlɛ ɔ ndɛ'm be su falɛ'n.

⁵⁸ N tu n klun srɛ kpa. Si min aunnvuɛ kɛ a kannin'n sa!

⁵⁹ Atin nga n fa be'n, m bu be akunndan kpa. Sa nga a fa be sie min nyrun'n, be ndɛnman yɛ n fa-a.

⁶⁰ Wɔ mmla'm be su falɛ'n, n ´jran mín ja nun n ´yo. N fa sie-man lele.

⁶¹ N tɔ sran wlɛfuɛ'm be aya'n nun sa kplakplakpla, sanngɛ ń wla fi-man ɔ mmla'n su.

⁶² N jaso kɔnguɛ m manman wɔ, afin a yo sa'm be nuan su.

⁶³ Be bɔ bé nyin yi wɔ'n, bɔ be fa ɔ mmla nga a sie be'n su'n, be kwlaa be ti min janvuɛ.

⁶⁴ Ee! Anannganman, asiɛ'n i lika kun nga a yi-man ɔ klun-ufue'n i nglo lɛ'n, ɔ nun-man lɛ. Kle min ɔ klun sa'n.

*

⁶⁵ Anannganman, ye nga a kɛnnin i kɛ a ´yo min bɔ n ti ɔ sufuɛ'n, a niannin ɔ ndɛ bɔ a kannin'n su yoli min ye sɔ'n.

⁶⁶ Yo man n nyan silɛ nan n wun ɔ mmla'm be wlɛ jrɛiin, afin be su yɛ n fa mín wla n gua-a.

⁶⁷ Laa bɔ a nian bu-man min fɔ'n, m mlinnin. Sanngɛ siɛn liɛ'n, n ´tu n klun n fa ɔ ndɛ'n su.

⁶⁸ A ti kpa, a ti klun-ufuefuɛ. Kle min ɔ klun sa'n i bo weiin nan n `si i.

⁶⁹ Ato'n yɛ wun tufuɛ'm be bua be fa gua mín su-ɔ. Sanngɛ min liɛ'n, n tu n klun n fa ɔ mmla nga a sie'n bé su.

⁷⁰ Be akunndan'n i su ti katawa, sanngɛ min liɛ'n n fa ɔ mmla'n n yo min anwlɛn su like.

⁷¹ Kɛ a buli min fɔ'n, ɔ ti kpa man min, afin i liɛ'n, n wun ɔ klun sa'n i wlɛ.

⁷² Mmla ng'ɔ fin ɔ́ nuan nun fite'n, ɔ ti kpa tra like akpi bɔ be fa jɛtɛ ufue annzɛ sika ɔkwlɛ be yo'n.

⁷³ A siesieli min kɛ be fa wu talie'n sa, kusu wɔ yɛ man n jran ca-a ɔ yo ye-ɔ. Man min ngwlɛlɛ man n `fa suan ɔ mmla mun.

⁷⁴ Kɛ be nga be nyin yi wɔ'n be wun min'n, be klun jɔ, afin ɔ ndɛ'n yɛ n fa mín wla'n n fa gua su-ɔ.

⁷⁵ Anannganman, n wun kɛ ndɛ nga a bu be'n, be ti su. Kɛ bɔ a di nanwlɛ tititi'n ti yɛ man a tuli min fɔ-ɔ .

⁷⁶ Ɔ klun-ufue'n ti, fɔnvɔ min kɛ a fa kan kleli min'n sa, afin n ti ɔ sufuɛ.

⁷⁷ Si min aunnvuɛ, yo man n nyan nguan, afin n fa ɔ mmla'n n yo min anwlɛn su like.

⁷⁸ Wun tufuɛ nga bɔ m'an yo-man sa sanngɛ yalɛ'n yɛ be kle min'n, man nyannzuɛn'n kun be. Min liɛ'n, ɔ mmla'm be akunndan yɛ m bu-ɔ.

⁷⁹ Be bɔ be nyin yi wɔ'n, bɔ be si sa nga a fa sie be nyrun'n, man be sa bé sin be bla mín wun.

⁸⁰ Min wan n tu n klun n yo ɔ klun sa'n, i liɛ'n nyannzuɛn su kun-man min ɔ nyrun.

*

⁸¹ M minndɛ ɔ ukalɛ'n lele ngbɛn, min nyin o ndɛ nga a kannin'n i sin.

⁸² Ndɛ nga a kannin'n, m minndɛ i su sa'n lele ngbɛn. Siɛn'n, n usa mín wun kɛ: «?Cɛn onin ko yɛ ɔ ´fɔnvɔ min-ɔn?»

⁸³ Siɛn'n, m'an yo kɛ kplo kotokun wie bɔ be sie i sin wɛnsrɛn nun sa , sanngɛ n wla fi-man sa nga ɔ waan be `yo'n i su.

⁸⁴ ?Ɔ waan n ´cɛ nnyɛ? Cɛn onin ko nan ɔ'a di min yalɛ klefuɛ'm be jɔlɛ.

⁸⁵ Wun tufuɛ wie'm bɔ be bu-man ɔ ndɛ'n i like fi'n, be kpɛ kunman min bo.

⁸⁶ Ɔ mmla'm be kwlaa be ti nanwlɛ ngunmin. M'an yo-man sran fi sa, sanngɛ yalɛ'n yɛ be kle min-ɔn, de min.

⁸⁷ Ɔ kali kan nan b'a kun min, sanngɛ n yi-man ɔ mmla'm bé blo.

⁸⁸ Ɔ klun-ufue'n ti, yo man n nyan nguan, nan n nian sa nga a fa sie min nyrun'n bé su n `nanti.

*

⁸⁹ Anannganman, ɔ ndɛ'n ɔ su sin-man le, kɛ ɔ o nyanmiɛn su lɔ'n yɛ ɔ o-ɔ .

⁹⁰ A di nanwlɛ tititi. A yili asiɛ'n, kɛ ɔ o lɛ'n yɛ ɔ wo-ɔ.

⁹¹ Ɔ ndɛ nga a kannin be'n be ti yɛ man ninnge'm be tɛ o lɛ ndɛ nin ndɛ-ɔ, afin ɔ sulɛ'n ti yɛ be o lɛ-ɔ.

⁹² Sɛ m'an fa-man ɔ mmla'n m'an yo-man min anwlɛn su like'n, wuun n wuli min nyrɛnnɛn nga nun.

⁹³ Ɔ mmla nga a sie be'n, mín wla su fi-man be le, afin be fanngan nun yɛ man min nyin o su-ɔ.

⁹⁴ Ɔ liɛ yɛlɛ min, de min, afin ɔ mmla nga a sie be'n yɛ n kunndɛ n fa su-ɔ.

⁹⁵ Klunwifuɛ'm b'a sa, be kunndɛ kɛ be ´kun min, sanngɛ sa nga a fa sieli min nyrun'n bé su yɛ min nyin'n ɔ ta-a.

⁹⁶ Kɛ n nian sa'n, n wun kɛ like'n kwlaa ´sin, sanngɛ ɔ mmla'n, i liɛ ɔ sin-man.

*

⁹⁷ Nanwlɛ n klo ɔ mmla'n dan. Cɛn ba'n kwlaa i yɛ m bu i akunndan sa mlɔnmlɔnmlɔn-ɔn.

⁹⁸ Ɔ mmla'n i ti n si ngwlɛlɛ n tra min kpɔfuɛ mun, ɔ kpɔci-man min le!

⁹⁹ N si like n tra min ngwlɛlɛ klefuɛ mun, afin n yaci-man sa nga a fa be sie min nyrun'n be akunndan bulɛ.

¹⁰⁰ N si ngwlɛlɛ n tra oke mun, afin n fa ɔ mmla'n bɔ a sie be'n su.

¹⁰¹ Ajalɛ ng'ɔ ti-man kpa'n, n tu-mɛn i mlɔnmlɔn ɔ ndɛ'n i su falɛ dunman nun.

¹⁰² Sa nga a kan be kle min'n, n yi-man be ase, afin wɔ yɛ a ti min ngwlɛlɛ klefuɛ-ɔ.

¹⁰³ Sa nga ɔ waan a ´yo be man min'n be yo min fɛ lele bobo su. Be fɛ'n ɔ tra awɛma nzue.

¹⁰⁴ Sɛ n ´si ngwlɛlɛ'n, ɔ fin ɔ mmla bɔ a sie be'n i sɔ'n ti n fa-man atin tɛ fi su.

*

¹⁰⁵ Ɔ ndɛ'n ɔ ti kɛ kannin sa, ɔ kpaja min bo. Ɔ kpaja min nyrun atin'n su weiin.

¹⁰⁶ Jɔlɛ klanman nga a dili'n, i su sa bɔ n seli wɔ kɛ n ´yo'n, san n ´yo i nuan su.

¹⁰⁷ Mín wun fɔli min dan kpa. Anannganman, yo man n nyan nguan kɛ a fa kannin'n sa.

¹⁰⁸ Ee Anannganman, srɛlɛ nga n srɛ wɔ'n, bu i kɛ tɛ yɛ n su yi man wɔ sa, sɔ nun. Sa nga ɔ waan a ´fa be kle min'n, kan be kle min.

¹⁰⁹ Sa kekle'n su min su tititi, sanngɛ mín wla fi-man ɔ mmla'n su.

¹¹⁰ Klunwifuɛ wie'm be sua min wun aya, sanngɛ n yaci-man ɔ mmla'n bɔ a sie be'n be lɛ n ko fa-man uflɛ.

¹¹¹ Sa nga a fa be sie min nyrun'n, be ti min aja like, afin be man min klun jɔ.

¹¹² M mian min nyin n yo ɔ klun sa'n, n ´nian su, n ´yo be lele min nguan i awieliɛ.

*

¹¹³ N klo-man sran nga be akunndan'n ti nnyɔn-nnyɔn'n bé sa. Min liɛ'n, ɔ mmla'n yɛ n klo i-ɔ.

¹¹⁴ Wɔ nun yɛ n fia-a, a sasa min kɛ nyrɛn sa. Ndɛ nga a ko kan'n, yɛ m minndɛ i-ɔ.

¹¹⁵ Klunwifuɛ mun, amun `jaso min nyrun lɛ, man n fa min Nyanmiɛn i mmla'm bé su.

¹¹⁶ Suan mín bo kɛ a fa kannin'n sa, kɛ ɔ ´yo nan m'an ka nguan nun'n ti. Like nga mín wla o su'n, yiɛ i nuan man min, nán yo man n wun nyannzuɛn.

¹¹⁷ Suan mín bo kɛ ɔ ´yo nan m'an yo ɔ klun sa'n nan m'an nyan min ti'n ti.

¹¹⁸ Be nga be yo-man ɔ klun sa'n a fuan be, afin be saci ɔ sran'm bé wun ngbɛn.

¹¹⁹ Asiɛ'n su klunwifuɛ mun'n, a kpalo be yi wla'n nun, i sɔ'n ti yɛ n klo sa nga a fa sie min nyrun nin-ɔn.

¹²⁰ Kɛ n ti ɔ ngan'n, n usu srɛ b'ɔ kun min'n ti, yɛ jɔlɛ nga a di be'n, n nyin yi be.

*

¹²¹ N fa mmla'n su, yɛ n yo sa i nuan su. Nán fa min wla min yalɛ klefuɛ'm bé sa nun.

¹²² Ta min nda kɛ a ´suan mín bo nan a su yaci-man min lɛ man wun tufuɛ'm be su mian-man min kplɔlɔlɔ.

¹²³ N kunndɛ wɔ ukalɛ'n nin delɛ bɔ ɔ waan a ´de min'n lele ngbɛn.

¹²⁴ Nian ɔ klun-ufue'n su yo min bɔ n ti ɔ sufuɛ'n min ye. Kle min sa nga ɔ waan be `yo'n i bo'n weiin nan n si i.

¹²⁵ N ti ɔ sufuɛ, man min ngwlɛlɛ man n wun sa nga a fa be sie min nyrun'n be wlɛ.

¹²⁶ Anannganman, ɔ mmla'n yɛ be ´fɔn i lɛ, nga a ´ko yo'n, yo.

¹²⁷ N klo ɔ mmla mun tra sika ɔkwlɛ'n. I kpa'n bɔ n klo i tra sika ɔkwlɛ jrɛiin.

¹²⁸ Wɔ mmla nga a sie be'n, be kwlaa be ti su. Atin ng'ɔ ti gblɛ atin'n, mín nyin ci i.

*

¹²⁹ Sa nga a fa sie sran'm be nyrun'n, be yo nyɛnmɛn, i sɔ'n ti yɛ n kplin mín nyin n fa su nin-ɔn.

¹³⁰ Sran ng'ɔ wun ɔ ndɛ'm be wlɛ'n, i nyin'n uke. Sran nga be bɔbɔ be kwla uka-man bé wun'n, ɔ man be ngwlɛlɛ.

¹³¹ Ɔ ndɛ'n i awe b'ɔ kun min ti'n, n fɛfɛ, min waan n ´si ɔ mmla mun.

¹³² Kaci ɔ́ nyin min wun wa, si min aunnvuɛ kɛ a fa si be bɔ be klo wɔ'n be aunnvuɛ'n sa.

¹³³ Man n taka kpa ɔ ndɛ'n su, nán kplin su kɛ n yo tɛ'n wie fi kanga.

¹³⁴ De min be bɔ be mian-mian min kplɔlɔlɔ'n bé sa nun, kɛ ɔ ´yo nan m'an fa ɔ mmla'm be su'n ti.

¹³⁵ Nian min bɔ n ti ɔ sufuɛ'n min nyrun. Kle min sa nga ɔ waan be `yo'n i bo'n weiin nan n si i.

¹³⁶ Kɛ n wun kɛ be fa-man ɔ mmla'n su'n, n sun sa ploploplo.

*

¹³⁷ Ee Anannganman, a yo sa i nuan su! A nian mmla'n su yɛ a bu ndɛ mun-ɔn.

¹³⁸ Sa nga a fa be sie min nyrun'n, a yi be nglo weiin, a kpɛ-man su gblɛ.

¹³⁹ Kɛ n wun kɛ min kpɔfuɛ'm be wla'n fi ɔ ndɛ'm bé su'n, min anwlɛn'n be min klun.

¹⁴⁰ Ɔ ndɛ nga a kan'n, ɔ lɛ-man kun ng'ɔ ti-man su-ɔ. M bɔ n ti ɔ sufuɛ'n, n klo be dan.

¹⁴¹ N ti nyɛnnglɛɛn, be bu-man min sran, sanngɛ min wla fi-man ɔ mmla'm be su.

¹⁴² A yo sa i nuan su tititi, yɛ ɔ mmla'n ɔ ti nanwlɛ jrɛiin .

¹⁴³ Nyrɛnnɛn nin awlaboɛ o min su. Sanngɛ n fa ɔ mmla'n n yo min anwlɛn su like.

¹⁴⁴ Sa nga a fa be sie min nyrun'n, be ti i nuan su tititi. Man min ngwlɛlɛ, kɛ ɔ ´yo nan m'an ka nguan nun'n ti.

*

¹⁴⁵ N tu n klun, n kpan flɛ wɔ. Anannganman tɛ min su nan n `fa sa nga ɔ waan be `yo'n i su.

¹⁴⁶ N kpan n flɛ wɔ, de min, man n kwla yo sa nga a fa be sie min nyrun'n.

¹⁴⁷ Aliɛ'n b'ɔ kwla cɛn-man, wuun n lɛ ɔ kpan flɛlɛ. Ndɛ nga a kannin'n, mín nyin o i sɔ ndɛ'n su.

¹⁴⁸ N jaso kɔnguɛ, m bu ɔ ndɛ nga a kan be'n be akunndan.

¹⁴⁹ Nian ɔ klun-ufue'n ti tie min aniɛn! Anannganman yo man n nyan nguan kɛ a fa gugu'n sa.

¹⁵⁰ Aeliɛ tɛtɛfuɛ mun be yɛ. B'a kaci bé sin b'a si ɔ mmla'n.

¹⁵¹ Ee Anannganman, w'a mantan min. Ɔ mmla'm be kwlakwla be ti nanwlɛ kpan.

¹⁵² N si kɛ mmla nga a sieli be'n be o lɛ tititi. N si sɔ-ɔ, nan ndɛ sa-a.

*

¹⁵³ Nian min nyrɛnnɛn'n bɔ n wun i'n nan de min, afin mín wla fi-man ɔ mmla'n su.

¹⁵⁴ Jran mín sin, nian min lika. Yo man n nyan nguan kɛ a kan kleli min'n sa.

¹⁵⁵ Be bɔ be bu-man wɔ like fi'n, bɔ be bu-man ɔ ndɛ'n kusu i like fi'n, be su nyan-man bé ti le, afin sa nga a fa kle be'n, be kunndɛ-man be.

¹⁵⁶ Ee Anannganman, wɔ aunnvuɛ silɛ'n cɛnnin o! Sa nga a kannin be'n, nian bé su yo man n ka nguan nun.

¹⁵⁷ Min yalɛ klefuɛ mun nin min kpɔfuɛ'm be sɔnnin o. Sanngɛ sa nga a fa be sie min nyrun'n, n yaci-man be lɛ n fa-man uflɛ.

¹⁵⁸ Kɛ n wun be bɔ b'a kaci bé sin b'a si wɔ'n, b'ɔ ɔ ndɛ'n i su falɛ ti-man be ndɛ'n, bé wun yo min tɛ.

¹⁵⁹ Ɔ bɔbɔ nian kɛ n klo ɔ mmla mun-ɔn. Anannganman, nian ɔ klun-ufue'n ti yo man n ´ka nguan nun.

¹⁶⁰ Ɔ ndɛ'n ɔ taka nanwlɛ'n su. Jɔlɛ nga a di be i nuan su klanman, be o lɛ tititi.

*

¹⁶¹ Famiɛn i awlo lɔ sran dandan wie'm be kle min yalɛ ngbɛn, nán kɛ n yoli sa ti-ɔ, sanngɛ ɔ ndɛ'n kunngba cɛ yɛ n sro i-ɔ.

¹⁶² Nda nga a ta min kɛ a ´yo like man min'n, nda sɔ bɔ a ta min'n, ɔ jɔ min klun kɛ anyanbeun like yɛ m'an nyɛn i sa.

¹⁶³ N klo-man ato'n, n kpɔ i kpa. N klo ɔ mmla'n.

¹⁶⁴ Aliɛ ba kun nun'n, m manman wɔ kpɛ nso sa nga a kan be'n bɔ be ti su'n ti.

¹⁶⁵ Sran nga be klo ɔ mmla'n, aunjuɛ nga be lɛ i'n ɔ ti dan. ?Nguɛ sa ti yɛ man be ´usu-ɔ ?

¹⁶⁶ Ee Anannganman, n lafi su kɛ a ´de min. N fa ɔ mmla'm bé su.

¹⁶⁷ N fa sa nga a fa be sie min nyrun'n bé su, afin n klo be kpa.

¹⁶⁸ N fa ɔ mmla nga a sie be'n, ɔ nin sa nga a fa be sie min nyrun'n bé su. Like kwlaa nga n yo'n, ɔ bɔbɔ ɔ́ nyin ta nun.

*

¹⁶⁹ Anannganman, kpanlɛ nga n kpan flɛ wɔ'n, sie ɔ́ su tie. Man min ngwlɛlɛ kɛ a kannin'n sa.

¹⁷⁰ Anannganman, man n srɛwa tantrantan nga n srɛ wɔ'n ɔ wɔ lele to wɔ lɔ! De min kɛ a fa kan kleli min'n sa.

¹⁷¹ Man m manman wɔ, afin a kle min sa nga ɔ waan n `yo'n.

¹⁷² N ´to jue sa nga ɔ waan a ´yo man min'n ti, afin ɔ mmla'm be kwlaa be ti su.

¹⁷³ De min, afin ɔ mmla nga a sieli be'n, min waan n ´fa bé su.

¹⁷⁴ Ee Anannganman, n kunndɛ kpa kɛ a de min. Ɔ mmla'm be ti min anwlɛn su like.

¹⁷⁵ Man n ka nguan nun yɛ man m manman wɔ. Yɛ man jɔlɛ nga a di be'n, be `uka min.

¹⁷⁶ N ti kɛ bua b'ɔ wlan daan sa. Kunndɛ min bɔ n ti ɔ sufuɛ'n, afin n wla fi-man ɔ mmla'm bé su .