Jue Mun 118 - NYANMIƐN NDƐ'N 1998

Nyanmiɛn i klun-ufue nin i aunnvuɛ silɛ'n

¹ An `manman Anannganman, afin ɔ ti kpa. I klun-ufue'n wo lɛ tititi.

² Man Izraɛlfuɛ'm be se kɛ: «I klun-ufue'n wo lɛ tititi.»

³ Man Aarɔn awlofuɛ'm be se kɛ: «I klun-ufue'n wo lɛ tititi.»

⁴ Man be nga be nyin yi Anannganman'n be se kɛ: «I klun-ufue'n wo lɛ tititi.»

⁵ I nun bɔ n la nyrɛnnɛn'n nun'n, n kpan n flɛli Anannganman, yɛ ɔ tɛli min su. Ɔ man n nyannin min ti.

⁶ Anannganman jin mín sin, n sro-man like fi. ?Kɛ nguɛ like sa yɛ sran'm be kwla yo min-ɔn ?

⁷ Anannganman ti min ukafuɛ, n wun min kpɔfuɛ mun bɔ bé nyin gua ase alɛ'n nun'n be sokpalɛ'n nun.

⁸ Kɛ n ´fa mín wun n wlɛ i klɔ sran sa nun'n, ɔ flunman kɛ n talo Anannganman.

⁹ Kɛ n ko fa mín wun n ko wlɛ i wlengbi'm bé sa nun'n, ɔ flunman kɛ n talo Anannganman.

¹⁰ Be nga be si-man Nyanmiɛn'n be sin yiali min, sanngɛ Anannganman dunman nun ti n jɔjɔli be nun.

¹¹ Be sin yiali min, n kali be afiɛn'n, sanngɛ Anannganman dunman nun ti n jɔjɔli be nun.

¹² Be katali mín su kplu kɛ awɛma mun sa. Sanngɛ Anannganman dunman nun ti be guali sa fɛiin kɛ ijre yɛ ɔ'a wie yra sa, n jɔjɔli be nun.

¹³ Be suli mín bo kɛ be yi min ase, sanngɛ Anannganman sɔli min nun.

¹⁴ Anannganman yɛ ɔ man min wunmiɛn dan nin-ɔn. I yɛ m mɛnmɛn i-ɔ. I yɛ ɔ deli min-ɔn.

¹⁵ Be nga be ti Anannganman liɛ'n, b'a nyan kwlalɛ, b'a nyan bé ti. I ti be o bé tannin sua'm be nun be bo sro. Be se kɛ: «Anannganman kwla sakpa!

¹⁶ Anannganman yɛ ɔ kwla-a! Anannganman kwla sakpa!»

¹⁷ N su wu-man, n ´ka lɛ, nan Anannganman i junman ng'ɔ dili be'n, n ´kan bé wun ndɛ n ´sin.

¹⁸ Anannganman tuli min fɔ, sanngɛ ɔ'a yaci-man min lɛ man wie'n ɔ'a kun-man min.

¹⁹ An `tike Nyanmiɛn i sufuɛ nanwlɛfuɛ'm be anuan mun man min, man n wlu nan n ko manman Anannganman.

²⁰ Anannganman i anuan'n, i nun yɛ Nyanmiɛn i sufuɛ nanwlɛfuɛ'm be sin-ɔn.

²¹ M ´manman wɔ afin kɛ n flɛli wɔ'n, a tɛli min su, wɔ yɛ a deli min-ɔn.

²² Yɛbuɛ nga sua kplanfuɛ'm be yili i blo'n, i yɛ ɔ'a kaci yɛbuɛ kpa b'ɔ tra sua'n i cɔnjɔ'n i ase-ɔ .

²³ I sɔ'n fin Anannganman. Kɛ e wun i'n, ɔ bo e nuan .

²⁴ Cɛn nga e di i yɛ'n, ɔ fin Anannganman. I ti man e klun jɔ yɛ man e bo e sro.

²⁵ Anannganman, bla wa de ye! Man e ninnge'm be yo ye e sa nun!

²⁶ Sran ng'ɔ ba Anannganman dunman nun'n. Man Nyanmiɛn yo i liɛ ye! E o Anannganman i sua'n nun wa yɛ e yra e nuan klanman e man amun-ɔn .

²⁷ Anannganman yɛ ɔ ti Nyanmiɛn nin-ɔn, i yɛ ɔ kpaja é wun weiin-ɔn. An `man waka'm be nnya'm be su be bo sin yia Nyanmiɛn sɔwlɛ'n.

²⁸ A ti min Nyanmiɛn. M ´manman wɔ. Min Nyanmiɛn, n ´yi wɔ ayɛ!

²⁹ An `manman Anannganman, afin ɔ ti kpa, afin i klun-ufue'n wo lɛ tititi.