Jue Mun 116 - NYANMIƐN NDƐ'N 1998

Sran nga bɔ Anannganman deli i wie i nuan nun'n i srɛlɛ b'ɔ srɛ'n

¹ N klo Anannganman, afin ɔ ti min aniɛn'n, ɔ ti srɛwa tantrantan nga n srɛ'n,

² afin ɔ fɛli i su sieli mín nuan bo. Kɛ min nyin tɛ o su'n, n yaci-mɛn i kpan flɛlɛ le.

³ Wie'n ɔ fɛli i nyanman'n cili min. N fali blɔlɔ atin'n bɔ mlɔnmlɔnmlɔn, nyrɛnnɛn dan tɔli min su. Awlaboɛ'n ɔ kunnin min kpo.

⁴ Sanngɛ n kpan flɛli Anannganman. N seli i kɛ: «Ɔo! Anannganman, yo man n nyan nguan!»

⁵ Anannganman yaci sa cɛ, ɔ yo sa i nuan su. E Nyanmiɛn'n si aunnvuɛ.

⁶ Be nga be bɔbɔ be kwla uka-man bé wun'n, Anannganman nian bé su. Kɛ n yoli fakafaka'n, ɔ deli min.

⁷ I kpa'n bɔ, man mín wla'n gua ase fɔuun ke! Anannganman ɔ'a yo min ye a wie!

⁸ Anannganman, nanwlɛ a deli min wie'n i nuan'n nun. A nunnunnin min nyinmuɛn'n, wɔ man m'an tɔ-man.

⁹ Asiɛ nga a fa mannin be nga bé nyin o su mun'n kɛ be tran su'n, n tɛ o su ɔ dunman nun ti.

*

¹⁰ I nun bɔ n ´se kɛ: «M'an wun nyrɛnnɛn o!» M'an yaci-man ɔ́ su lafilɛ le .

¹¹ Mín wun b'ɔ ´usu min'n ti n seli kɛ: «Sran liɛ'n, ɔ ti atofuɛ o!»

¹² ?Nan nɛnnɛn kpli nga Anannganman ɔ'a di min yɛ'n, nguɛ cɛ yɛ n ´nyɛn i n ´fa lɛ i ase-ɔ?

¹³ M ´man bé ti nyanlɛ klowa'n su, yɛ n ´kpan flɛ Anannganman.

¹⁴ Ninnge nga n tali nda kɛ n ´yo be m ´man Anannganman'n, n ´yo be i nvlefuɛ'm be nyrun.

¹⁵ Anannganman i sufuɛ nanwlɛfuɛ'm be wie'n ɔ wlu i wun lele kpe nun.

¹⁶ Anannganman, n ti ɔ sufuɛ, n ti ɔ sufuɛ bla i wa. A tili mín wun nyanman nun.

¹⁷ Asenna tɛ'n yɛ n ´yi n ´fa man wɔ-ɔ. N ´kpan n flɛ wɔ.

¹⁸ Ninnge nga n tali nda kɛ n ´yo be m ´man Anannganman'n, n ´yo be i nvlefuɛ'm be nyrun.

¹⁹ Zerizalɛm klɔ'n nun Anannganman i sua'n i awlo klun lɔ yɛ n ´yo be-ɔ. An `manman Anannganman!