Jue Mun 115 - NYANMIƐN NDƐ'N 1998

Man Nyanmiɛn i ngunmin i dunman liɛ'n yɛ ɔ fu-ɔ

¹ Anannganman, man ɔ dunman liɛ'n yɛ ɔ fu-ɔ, afin a ti klun-ufuefuɛ, yɛ a ti nanwlɛ difuɛ tititi. Nán e dunman liɛ nin-ɔn, sakpa, nan e liɛ nin-ɔn!

² Ɔ yo sɛ yɛ man mɛn kun nga'm be nunfuɛ'm be usa kɛ: «?Ai, wuun be Nyanmiɛn liɛ kpa'n ɔ wo nin?» nin-ɔn

³ E Nyanmiɛn'n ɔ wo nglo lɔ, like nga i klun klo su kɛ ɔ ´yo'n yɛ ɔ yo-ɔ.

⁴ Mɛn sɔ'm be nunfuɛ'm be amuɛn'm be liɛ'n, be fa jɛtɛ ufue nin sika ɔkwlɛ yɛ be yo-ɔ, be ti sran sa nuan like.

⁵ Be lɛ nuan, sanngɛ be ijɔ-man. Be lɛ nyinma, sanngɛ be wun-man ase.

⁶ Be lɛ su, sanngɛ be ti-man sa. Be lɛ bue, sanngɛ be ti-man nvan.

⁷ Be lɛ sa, sanngɛ be fa kan like-ɔ ɔ yo-man ye. Be lɛ ja, sanngɛ be kwla fa nanti-man. Be ti-man nɛn ba kun sa kɛ ɔ su tɛ bé nuan nun.

⁸ Be nga be yo i sɔ amuɛn liɛ mun'n, bɔ be fa be wla gua bé su'n, be ti kɛ amuɛn sɔ'm be sa .

⁹ Izraɛlfuɛ mun, amun `fa amun wla'n guɛ i Anannganman su. «Ɔ ti sran'm be ukafuɛ, ɔ sasa be kɛ nyrɛn sa .»

¹⁰ Aarɔn osu nunfuɛ mun, an `fa amun wla'n guɛ i Anannganman su. «Ɔ ti sran'm be ukafuɛ, ɔ sasa be kɛ nyrɛn sa.»

¹¹ Amun nga amun nyin yi Anannganman'n, an `fa amun wla'n guɛ i su. «Ɔ ti sran'm be ukafuɛ, ɔ sasa be kɛ nyrɛn sa.»

¹² Anannganman i wla fi-man e su. Ɔ ´yo Izraɛlfuɛ'm bé wun sa ye. Ɔ ´yo Aarɔn osu'n nunfuɛ'm bé wun sa ye.

¹³ Be nga be nyin yi Anannganman'n, ɔ ´yo bé wun sa ye, sɛ be lɛ nyrun o, sɛ be lɛ-man nyrun o, ɔ ´yo bé wun sa ye.

¹⁴ Anannganman ɔ ´yo man amun osu'n nin amun mma'm be liɛ'm be ´trɛ.

¹⁵ Man Anannganman b'ɔ yili nyanmiɛn'n b'ɔ la nglo lɔ plaii'n nin asiɛ'n, ɔ yo amun wun sa ye.

¹⁶ Nglo lɔ lika'n ti Anannganman bɔbɔ i lika. Ɔ fali asiɛ'n kusu mannin sran mun.

¹⁷ Be nga b'a wu'n, nán be yɛ be ´manman Anannganman nin-ɔn. Be nga b'a ɔ blɔlɔ'm be wie fi kwla mɛnmɛn i.

¹⁸ Sanngɛ e liɛ'n, kɛ ɔ fin ndɛ'n, e ´la Anannganman i ase tititi, e su yaci-mɛn i le. Amun `manman Anannganman!