Jue Mun 114 - NYANMIƐN NDƐ'N 1998

Delɛ nga Anannganman deli Izraɛlfuɛ mun'n i su jue

¹ Kɛ ɔ fin cɛn bɔ Izraɛlfuɛ'm be tuli Ezipt lɔ, kɛ ɔ fin cɛn bɔ Zakɔb i osu'n nunfuɛ'm be jasoli sran bɔ be aniɛn ti i ngunmin'n be afiɛn'n,

² sɛ e ´kwla se'n, Nyanmiɛn fali Zida'n yoli i bɔbɔ i sua. Izraɛl'n kusu kacili i asiɛ .

³ Sɛ e ´kwla se'n, kɛ jenvie'n wunnin be'n, ɔ wanndili. Kɛ Zurdɛn'n wunnin be'n, ɔ cuɛn ɔli siɛn.

⁴ Oka'm be ´kɔ'n, wuun be ´tu kpɛn kɛ bua nene mun sa, kpɔlɛ'm be kusu be tu kpɛn kɛ boli mun sa.

⁵ ?Jenvie, nguɛ sa ti yɛ a wanndi sa-a? ?Zurdɛn, nguɛ sa ti yɛ a cuɛn kɔ siɛn-ɔn?

⁶ ?Oka mun, nguɛ sa ti yɛ an tu kpɛn kɛ bua nene mun sa-a? ?Kpɔlɛ mun, nguɛ sa ti yɛ an tu kpɛn kɛ boli mun sa-a?

⁷ Ee asiɛ, keje Anannganman nyrun! Keje Zakɔb Nyanmiɛn'n i nyrun,

⁸ afin ɔ fa yɛbuɛ kaci fɛtɛ. Ɔ fa kpangba lika'n ɔ kaci nzue ti .