Jue Mun 112 - NYANMIƐN NDƐ'N 1998

Sran nga i nyin yi Anannganman'n i muae ng'ɔ nyɛn i'n

¹ An `manman Anannganman! Sran nga i nyin yi Anannganman'n, bɔ Anannganman i mmla'm be su falɛ'n ɔ yo i fɛ'n, i liɛ su ti ye!

² I osu'n nunfuɛ nga be wa jaso su'n be wa yo sran waka-waka mun, afin sran nga be ti sɛsɛfuɛ'n, Anannganman man be ´nyan ye.

³ I sɔ sran liɛ'n, muae nin aunnyan'n bɔ cɛ yɛ ɔ ´trɛn i awlo'n nun-ɔn. Nyanmiɛn nin i bé bo ´sɛ titi.

⁴ Sran nga be ti sɛsɛfuɛ mun'n, be liɛ'n, kɛ aosin'n ɔ wla tuun'n, kpɛkuun Nyanmiɛn ɔ'a man be kannin. Sran ng'ɔ yaci sa cɛ'n, b'ɔ si aunnvuɛ'n, b'ɔ yo sa i nuan su'n, i kunngba nin-ɔn.

⁵ Sran b'ɔ si aunnvuɛ'n, bɔ be srɛ i like-ɔ, ɔ man'n, sa kpa yɛ ɔ'a yo-ɔ. Sran b'ɔ ´yo i ninnge mun-ɔn ɔ nian mmla'n su yɛ ɔ yo'n, i kunngba nin-ɔn .

⁶ Ɔ tɔ-man le nan kɛ ɔ ´yo-ɔ ɔ'a yo. Sran ng'ɔ yo sa i nuan su'n, be wla fi-mɛn i su le .

⁷ Sɛ ɔ ti ndɛ tɛ wie'n, srɛ ba kun sa kun-mɛn i mlɔnmlɔn. I klun suɛ-mɛn i bɔ kaan tri! Anannganman kunngba yɛ i nyin tɛ i nyin bo-ɔ.

⁸ Ɔ keje-man. I klun ti-mɛn i lele kpɛkuun ɔ wun be nga be nin i be kun'n be agualiɛ'n.

⁹ Ɔ ´cɛ sran like-ɔ, ɔ bu-mɛn i sin, ɔ tu i klun cɛ yalɛfuɛ'm be like. Nyanmiɛn nin i bé bo sɛ titi. I wunmiɛn'n ´uka su titi yɛ i kɔmin'n jin su .

¹⁰ Kɛ klunwifuɛ'n wun i sɔ'n, ya kun i, kɛ ɔ kɛkɛ i nuan bui'n sa, kpɛkuun i wun glɔ i. Sa nga klunwifuɛ'm be waan ɔ ´ju'n, ɔ kpɛn-man su le.