Jue Mun 109 - NYANMIƐN NDƐ'N 1998

Sran nga be tɔn i suɛn'n i Nyanmiɛn srɛlɛ

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Nyanmiɛn, wɔ bɔ wɔ yɛ m manman wɔ'n, nán tɔ amule.

² Afin klunwifuɛ'm bɔ be kunngba'n be ti gblɛfuɛ'n, be kan min wun ndɛ tɛtɛ, min suɛn yɛ be tɔn be sin-ɔn.

³ Mín kpɔlɛ i ndɛ yɛ be kɛn i sa lele-ɔ. Be kunndɛ min utre ngbɛn.

⁴ N klo be, sanngɛ be liɛ'n, min wun ndɛ tɛtɛ'n yɛ be kan-an. N liɛ kusu n srɛ m man be.

⁵ N yo be kpa, sanngɛ tɛ cɛ yɛ be yo min-ɔn. N klo be, sanngɛ kpɔlɛ'n cɛ yɛ be kpɔ min-ɔn.

⁶ Nga be kan yɛlɛ kɛ: «Man be fɛ i man sran wlɛfuɛ wie man ɔ sie i, man sran suɛn tɔnfuɛ kun jrɛn i fama su lɛ.

⁷ Nan kɛ be di i jɔlɛ b'ɔ wie'n, man be wun kɛ i yɛ ɔ yoli sa nin-ɔn. Man i srɛlɛ ng'ɔ ´srɛ'n ɔ kaci sa tɛ mɛn i.

⁸ Nán ɔ cɛ asiɛ'n su. Man sran uflɛ fɛ i junman'n ɔ di .

⁹ Man i mma'm be ka aika. Man i yi kusu yo angboti.

¹⁰ Man i mma'm be yo finfinfuɛ, man be srɛsrɛ like nan b'a nyan aliɛ b'a di. Man be kan be bo bé sua buebue'm be nun.

¹¹ Man sran nga i kalɛ o i su'n ɔ fɛ i sa sie i bo ninnge'n kwlaa su. Man sran ngbɛn'm be fɛn i bo ninnge b'ɔ fɛli nan ɔ'a nyan be'n.

¹² Nán sran fi yo i ye. Nán sran fi si i aika mma'm be aunnvuɛ.

¹³ Man i osu'n nunfuɛ'm be nunnun. Man i dunman liɛ'n ɔ mlin akpasua nga be wa jaso su klikli'n be afiɛn.

¹⁴ Nán Anannganman wla fi fɔnlɛ nga i si'm be fɔnnin'n. I nin i sa tɛ ng'ɔ yoli'n, nɛ́n i osu'n nunnun le.

¹⁵ Nán Anannganman i wla tra fɔnlɛ nin sa tɛ sɔ'm be su le. Man ɔ nunnun sran sɔ'm be dunman'n mɛn'n nun.

¹⁶ Afin sran sɔ'n i ndɛ nun-man aunnvuɛ silɛ'n i ndɛ nun. Nyrɛnnɛnfuɛ nga yalɛ'n ɔ'a di i bɔ awlaboɛ'n ɔ'a kun i kpo'n, ɔ miɛn-miɛnnin i lele ɔ kunnin i.

¹⁷ Sannzan bolɛ'n yɛ ɔ klo i-ɔ, man sa tɛ ng'ɔ gugu'n ɔ ju i bɔbɔ su. Ɔ nian bo-man muae nian man-man sran le, nán man i kusu nyan muae le.

¹⁸ Man sannzan'n b'ɔ bo'n ɔ tran i bɔbɔ su kɛ ɔ'a wlɛ i tralɛ'n sa. Man ɔ wluwlu i wun kɛ nzue wluwlu like nun'n sa. Man ɔ wluwlu i owie nun kɛ ngo wluwlu like nun'n sa.

¹⁹ Man ɔ kaci kɛ i kondro b'ɔ klɛ i titi'n sa. Man ɔ mɛntɛn i wun kɛ i bo kplo b'ɔ ´wlɛ i titi'n sa.»

²⁰ Akatua ng'ɔ ´fa tannin be bɔ be sanman min Anannganman ja su'n, bɔ be tɔn min suɛn'n yɛ ɔ o lɛ-ɔ.

²¹ Sanngɛ wɔ, min Min Anannganman, yo min ye kɛ a kan kleli min'n sa, afin ɔ klun-ufue'n ɔ ti dan, de min!

²² N ti nyrɛnnɛnfuɛ, yɛ n ti yalɛfuɛ. Min anwlɛn'n ɔ'a saci min klun lɔ kain.

²³ N liɛ bɔ yɛ ɔ su wie kɛ sɛnzɛ'n b'ɔ tɔ'n sa lɛ-ɔ. N ti kɛ aɛcɛ wie bɔ ɔ'a tɔ tralɛ nun bɔ be su kpukpu nun man ɔ tɔ'n sa.

²⁴ Mín ja'm b'a glɔglɔ mín bo, n lɛ-man wunnɛn kplo kun nglɛmun cilɛ dunman nun.

²⁵ N ti be finfin like. Be nian min kpɛkuun be keje bé ti'n sɛkɛsɛkɛsɛkɛ .

²⁶ Anannganman min Nyanmiɛn, bla wa uka min. Ɔ klun-ufue'n ti bla wa de min.

²⁷ Man be si kɛ wɔ Anannganman wɔ yɛ w'a yo i sɔ sa nin-ɔn.

²⁸ Be liɛ'n, be bo sran'm be sannzan, sanngɛ ɔ liɛ'n, a yra ɔ nuan klanman man sran. Sɛ be waan be ´yo min like'n, man nyannzuɛn'n yɛ ɔ kun be-ɔ. Sanngɛ min bɔ n ti ɔ sufuɛ'n, n liɛ'n n klun ɔ ´jɔ.

²⁹ Be bɔ be kan min wun ndɛ tɛtɛ'n, man bé nyin gua ase. Man nyannzuɛn'n ɔ sra be kɛ tralɛ sa.

³⁰ N ´kpan kekle n ´to jue n ´yi Anannganman i ayɛ. M ´mɛnmɛn i nzra nun.

³¹ Afin ɔ jran yalɛfuɛ'n i sin. Ɔ de i be nga be bu i fɔ'n bé sa nun.