Jue Mun 108 - NYANMIƐN NDƐ'N 1998

Sran nga bɔ i wla taka Nyanmiɛn su'n i Nyanmiɛn manmanlɛ jue

¹ Jue nga ti David liɛ.

² I waan: Ee Nyanmiɛn, min wla ɔ'a gua ase o! Ee, wɔ bɔ a ti min anyrunnyan'n like'n, n ´to jue, n ´yi wɔ ayɛ, n ´to jue m manman wɔ.

³ N ´fa min sanngo'n nin min jru'n, n ´tinnge aliɛ njɛnniɛn su!

⁴ Anannganman, m ´bo n ´flɛ wɔ sran'm be afiɛn. N ´to jue n ´yi wɔ ayɛ nvle-nvlefuɛ'm be nyrun.

⁵ Afin ɔ klun-ufue'n ɔ ti dan lele kpe nun. I kunngba'n, a ti nanwlɛfuɛ dan.

⁶ Ee Nyanmiɛn, a ti dan tra nyanmiɛn'n bɔ la nglo plaii yɛ'n, yi ɔ dan sɔ bɔ a ti'n i nglo. Man ɔ nyrun nyannyan'n ɔ kpaja asiɛ wunmuan'n su.

⁷ Min bɔ n ti ɔ janvuɛ'n, tɛ min su, yo man n nyan min ti. Yi ɔ fanngan'n i nglo nan de min.

⁸ Nyanmiɛn o i sua'n nun lɔ i waan: «Min yɛ n kwla-a. N ´cɛ Sisɛm klɔ'n nun, n ´sunnzun Sikɔt b'ɔ ti kongo lika'n.

⁹ Galaad lika'n ti min liɛ. Manase lika'n ti min liɛ wie, Efraim lika'n ti kɛ min kle sa, yɛ Zida lika'n ti kɛ min kpɔnman sa, yɛ n fa sie sran mun-ɔn .

¹⁰ Moab lika'n ti kɛ min kpongbo sa yɛ n wunnzin nun-ɔn. M'an fa min sa m'an sie i Edɔm lika'n su, ɔ ti min liɛ. N tian Filistifuɛ'm be su fiaan!»

¹¹ ?Wan cɛ yɛ ɔ ´fa min kɔ be klɔ kekle'n su lɔ-ɔ? ?Edɔmfuɛ'm be klɔ'n, wan cɛ yɛ man n ´ju lɔ-ɔ?

¹² ?Ee Nyanmiɛn, wɔ bɔ a yili ye blo bɔ e sonja'm be kɔ alɛ kunlɛ-ɔ a nun-man bé sin kun'n, nán wɔ yɛ man n ´ju lɔ-ɔ?

¹³ Uka e man e kwla e kpɔfuɛ mun, afin sran'm be ukalɛ liɛ'n ɔ ti ngbɛn.

¹⁴ Nyanmiɛn man e ´kwla, afin i yɛ ɔ tia e kpɔfuɛ'm be su-ɔ.