Jue Mun 107 - NYANMIƐN NDƐ'N 1998

FLUWA I BUE NNUN SU ( Jue 107—150 ) Nyanmiɛn b'ɔ de sran'n i ase lalɛ

¹ An `manman Anannganman, afin ɔ ti kpa, afin i klun-ufue'n wo lɛ tititi.

^2-3 Be bɔ Anannganman kpɔli bé ti'n, b'ɔ deli be be kpɔfuɛ'm be sa nun'n, b'ɔ ko yiali be mɛn'm be kwlaa nun: i wia afiliɛ lɔ o, i wia atɔliɛ lɔ o, i mɛn'n i nglo lɔ o, i mɛn'n i ngua lɔ o, b'ɔ kannin be boli nun'n, be sɔfuɛ'm be ndɛ ng'ɔ fata kɛ be kan'n yɛ ɔ o lɛ-ɔ.

⁴ Be wlan daan aawlɛ flɛnnɛn'n nun, ɔ liɛ lika kee sɔ'n nun. Be wun-man atin nga be ko fa nan be ko ju kan sran tran lɛ nin-ɔn.

⁵ Kɛ awe nin nzue we'n ko kle be nyrɛnnɛn'n yɛ ɔ kleli be-ɔ. Be wla'n boli bé wun.

⁶ Kɛ be ´wun nyrɛnnɛn'n, be kpan flɛli Anannganman, nan ɔ'a de be awlaboɛ sɔ'n nun.

⁷ Ɔ fali be sinnin atin trele wie su kɛ ɔ ´yo nan b'a ko fite klɔ bɔ sran tran su'n i su'n ti.

⁸ Man be sɔfuɛ'm be bo flɛ Anannganman i klun-ufue'n nin sa dandan ng'ɔ yo man sran mun ti.

⁹ Afin sran nga bɔ nzue we kunnin i'n, ɔ mɛnnin i nzue. Sran nga bɔ awe kunnin i'n, ɔ mɛnnin i aliɛ ɔ dili i ku yili.

¹⁰ Be wie'm be trannin aosin tuun kpa nun, be trannin kongo tuun kpa b'ɔ yo sro'n nun. Nyrɛnnɛn'n ɔ sin yiali be mlɔnmlɔnmlɔn, be cili be nin jrɔkɔ.

¹¹ Be yoli nyin kekle, b'a fa-man Nyanmiɛn i ndɛ b'ɔ kannin'n be su. Nyanmiɛn b'ɔ like fi nun-mɛn i sin'n, ɔ mannin be afɔtuɛ b'a fa-man.

¹² Ɔ yoli man afɛ bɔ tɔli be su'n, ɔ kannin be ase. Be finnin ase, b'a nyan-man sran fi b'ɔ ´uka be-ɔ.

¹³ Kɛ be ´wun nyrɛnnɛn'n, be kpan flɛli Anannganman, nan ɔ'a de be awlaboɛ sɔ'n nun.

¹⁴ Ɔ yili be bisua tuun sɔ'n nun fiteli. Ɔ kpɛkpɛli jrɔkɔ nga be fa cili be'n be nun.

¹⁵ Man be sɔfuɛ'm be bo flɛ Anannganman i klun-ufue nin sa dandan ng'ɔ yo man sran mun ti.

¹⁶ Afin ɔ sacili aaba anuan mun, ɔ bubuli anuan'm be nun gboklo'm bɔ be fa blalɛ be yoli'n be nun.

¹⁷ Sinnglinfuɛ'm be nzuɛn tɛtɛ'n nin be fɔnlɛ bɔ be fɔnnin'n ti'n, be wunnin nyrɛnnɛn.

¹⁸ Like nga be di i sa'n, be konvi tuli su. Be tɔli wie'n i nuan nun wieli.

¹⁹ Kɛ be ´wun nyrɛnnɛn'n, be kpan flɛli Anannganman, nan ɔ'a de be awlaboɛ sɔ'n nun.

²⁰ Ndɛ b'ɔ fin i nuan nun fiteli sa'n, ɔ man be yoli juejue. Ɔ cuɛnnin be wie'n i nuan nun fiteli .

²¹ Man be sɔfuɛ'm be bo flɛ Anannganman i klun-ufue nin sa dandan ng'ɔ yo man sran mun ti .

²² Man be yi asenna tɛ'm be fa mɛn i. Yɛ man be bo sro be kan sa ng'ɔ yoli be mun.

²³ Be nga be fa mmeli be kɔ lika jenvie'n nyin su'n, bɔ be di aata nzue dan sɔ'n i nyin su'n,

²⁴ be wunnin sa nga Anannganman yo'n, be wunnin sa dandan ng'ɔ yoli be jenvie sɔ'n su'n.

²⁵ Kɛ ɔ ´uke i nuan sa'n, wuun aunngban dan'n ɔ su tu, wuun nzue'n ɔ su jaso kendenglein!

²⁶ Aunngban dan sɔ'n nin nzue sɔ'n be man sran sɔ'm be su kɔ nglo fleiin, kpɛkuun be fa be jra kɛ b'a tɔ kunman dan bɔ be si-mɛn i bo'n nun sa. Kɛ ɔ ´yo sɔ'n, be anwlɛn'n ɔ kpɔtɔ be klun sa lengeiin!

²⁷ Bé nyin'n su b'ɔ kpɛ be'n ti'n, be ´nanti'n, wuun be ´bo tanngan kɛ sran bɔ nzan ɔ'a bo be'n sa. Kpɛkuun be ngwlɛlɛ'n kwlaa mlin be klun.

²⁸ Kɛ be ´wun nyrɛnnɛn'n, be kpan flɛli Anannganman, nan ɔ'a de be awlaboɛ sɔ'n nun.

²⁹ Ɔ man aunngban dan b'ɔ fita'n ɔ tɔli bliin. Ɔ kannin nzue'n b'ɔ jasoli kendenglein'n i ase .

³⁰ Kɛ be ´nian bɔ aunngban'n ɔ fita-man kun'n bɔ nzue kun'n ɔ bo-man kun'n, be klun jɔli. Klɔ nga be waan be ´kɔ su'n, Anannganman man be juli lɔ klanman.

³¹ Man be sɔfuɛ'm be bo flɛ Anannganman i klun-ufue nin sa dandan ng'ɔ yo man sran mun ti.

³² Man be yi i ayɛ nvlefuɛ'm be anyia nun. Man be mɛnmɛn i kpɛnngbɛn'm be anyia nun.

³³ Ɔ yo man nzue ba'm be wu kee, Ɔ yo man nzue ti'm be wie nun klelelele.

³⁴ Ɔ fa mɛn bɔ i asiɛ'n ɔ ti kpa'n ɔ kaci njin lika , i nunfuɛ'm be wlɛ'n ti.

³⁵ Ɔ fa aawlɛ flɛnnɛn'n ɔ kaci fɛtɛ. Ɔ fa lika kee'n ɔ kaci nzue bo.

³⁶ Kpɛkuun be bɔ awe kun be'n, ɔ fa be sie lɛ, be kplan be klɔ lɛ.

³⁷ Be di fie'm be ta be su vinyi, ɔ su kpanngban.

³⁸ Nyanmiɛn yo be ye, be wu ba kpanngban kpa, bé sa nun nnɛn'm be trɛ.

³⁹ Be wie'm be liɛ'n, be nuan'n ɔ kpɛ su, nyannzuɛn'n yɛ o be su-ɔ, nyrɛnnɛn nin afɛ'n ɔ'a ti be sa nán sa yolɛ-ɔ.

⁴⁰ Nyanmiɛn'n kuakua be wlengbi mun. Ɔ yo man be wlan aawlɛ flɛnnɛn bɔ atin nun-man nun'n i nun sa daan.

⁴¹ Sanngɛ ɔ yi yalɛfuɛ'm be yalɛ'n nun fite. Ɔ yo man be osu'n ɔ trɛ kpa kɛ nnɛn mun sa.

⁴² Kɛ sran sɛsɛfuɛ'm be wun i sɔ sa mun'n, be klun jɔ, sanngɛ sran wlɛfuɛ'm be kwla uke-man bé nuan.

⁴³ Man sran b'ɔ ti ngwlɛlɛfuɛ'n ɔ bu sa sɔ'm be akunndan kpa nan ɔ wun kɛ Anannganman i klun ti ufue.