Jue Mun 106 - NYANMIƐN NDƐ'N 1998

Izraɛlfuɛ'm bé nyin kekle'n i ndɛ

¹ An `manman Anannganman! An `yi i ayɛ, afin ɔ ti kpa. Afin i klun-ufue'n wo lɛ tititi.

² ?Wan bɔ cɛ yɛ ɔ ´si Anannganman i sa dandan ng'ɔ yo be'n bé wun ndɛ kan-an? ?Wan cɛ yɛ ɔ ´mɛnmɛn i nan sran'm b'a ti i lika'n kwlakwla-a?

³ Be nga Anannganman i mmla'n su yɛ be nanti'n, bɔ be yo sa i nuan su titi'n, be liɛ su ti ye!

⁴ Anannganman, kɛ a ´yo ɔ sran'm be ye'n, man ɔ́ nyin kpɛn min su. Wɔ bɔ a ti defuɛ'n, de min.

⁵ Man n nyan ɔ sran nga a kpali be'n be muae'n wie. Man n klun jɔ kɛ ɔ mɛn'n nunfuɛ'm be liɛ'n sa. Man n fa wɔ n di min nuan kɛ be bɔ be ti ɔ liɛ'n be fa di'n sa.

⁶ E yoli sa tɛ kɛ e si'm be sa. E fɔnnin, e yoli klunwi.

⁷ Atrɛ nga a yili be Ezipt lɔ'n, é si'm b'a wun-mɛn i wlɛ. Ye dandan nga a yoli be'n, bé wla ɔ'a kpɛn-man su. Be yoli nyin kekle Ndɛma jenvie'n i nuan lɔ.

⁸ Sanngɛ kɛ ɔ ´yo nan Anannganman ɔ'a nyan dunman'n ti, ɔ deli be. Ɔ deli be sɔ nan be ´si kɛ kannzu ɔ kwla sakpa.

⁹ Kɛ ɔ kpannin Ndɛma jenvie'n su sa'n, kpɛkuun ɔ kali lɛ wuli kee. Ɔ man be nantili jenvie'n i bo lɔ aunnyan'n su kɛ aawlɛ flɛnnɛn'n nun sa.

¹⁰ Ɔ deli be be kpɔfuɛ'm bé sa nun. Ɔ deli be be nga be nin be kun'n bé sa nun.

¹¹ Nzue'n yi sinnin be kpɔfuɛ'm bé su, be nun kun sa ɔ'a fin-man nun ɔ'a fite-man.

¹² Blɛ li yɛ be wa fɛli i ndɛ'n su-ɔ, nan b'a to jue b'a mɛnmɛn i.

¹³ Sanngɛ i sin ɔ'a cɛ-man, be wla wa fili sa dandan ng'ɔ yoli'n. Like ng'ɔ guguli kɛ ɔ ´yo be'n, b'a minndɛ-man be yolɛ blɛ'n.

¹⁴ Kɛ be wo aawlɛ flɛnnɛn'n nun lɔ'n, bé nyin bloli like wie'm bé wun. Kpɛkuun be klɔklɔli Nyanmiɛn i nuan nun lika kee sɔ'n nun lɔ .

¹⁵ I kusu fali like nga be usali'n mannin be. Ɔ fa mannin be, be dili i lele ɔ flannin be.

¹⁶ Kɛ be o nanmue nun lɔ'n, be fali bé nyin cili Moiz nin Aarɔn bɔ be fɛli i be wlali Anannganman sa nun'n,

¹⁷ nan asiɛ'n nun ɔ'a kpaci ɔ'a mɛn Datan, nan ɔ'a kan ɔ'a muan Abiram nin i sran'm be su .

¹⁸ Sin kunnin be akpasua kun sɔ mun. Sin taaman dili klunwifuɛ sɔ mun.

¹⁹ Be fali sika ɔkwlɛ be yili like wie kɛ nannin ba sa Orɛb oka wun lɔ. Be kotoli sika ɔkwlɛ sɔ'n i bo .

²⁰ Ɔ liɛ nannin bɔ ijre yɛ ɔ di'n yɛ be fɛli i nzɔliɛ'n be kacili Nyanmiɛn b'ɔ lɛ nyrun nin-ɔn.

²¹ Bé wla fili Nyanmiɛn b'ɔ ti be defuɛ'n, be wla fili i b'ɔ yoli like dandan mun Ezipt mɛn'n nun lɔ'n.

²² I b'ɔ yili atrɛ mun Kam mɛn'n nun'n, b'ɔ yoli sa sroesroe Ndɛma jenvie'n nuan lɔ'n, bé wla fili i su.

²³ I osu ti'n i waan wuun ɔ ´nunnun be, nan san Moiz b'ɔ ti i sufuɛ'n yɛ ɔ ´yaci i lɛ-ɔ. Moiz jrannin ndɛ sɔ'n nun, ɔ seli i kɛ ɔ `guɛ i ya'n i ase nan nán man ɔ nunnun be.

²⁴ I sin'n, klɔ bɔ be blɔ i kpa b'ɔ ti'n, b'a buɛ-mɛn i ndɛ nun kun. B'a fa-man Anannganman i nuan ndɛ'n kun.

²⁵ Be o be tannin sua'm be nun lɔ yɛ be ijɔ be konviabo-ɔ. B'a ti-man Anannganman i ndɛ ng'ɔ kan'n kun mlɔnmlɔn.

²⁶ Anannganman mɛnnin i sa su ɔ tali nda kɛ ɔ ´yo man be wu aawlɛ flɛnnɛn'n nun lɔ,

²⁷ nan be osu'n nunfuɛ'm be bo sanndi nvle kun nga'm be nun yɛ be wu lɔ.

²⁸ Be fali bé wun mantannin Baal-Pɛɔr, be dili nnɛn nga be fa sɔ wunmiɛn mun'n.

²⁹ Kɛ be yoli sɔ'n, ɔ kunnin Anannganman ya, nan ɔ'a fa nyrɛnnɛn sa wie ɔ'a yi bé su.

³⁰ Fine jrannin ndɛ'n nun siesieli nan nyrɛnnɛn sa sɔ'n ɔ'a jran .

³¹ I sɔ b'ɔ yoli'n ti, Anannganman waan ɔ ti sran kpa. Anannganman buli i osu nunfuɛ'm be sran kpa tititi.

³² Be kannin Anannganman i ya Mɛriba nzue'n i nuan lɔ ekun, i ti man Moiz yoli i sa ya,

³³ be kunnin i kusu i ya, kpɛkuun ɔ ´ijɔ-ɔ, ɔ'a bu-mɛn i sin.

³⁴ Nvle nga Anannganman waan be `nunnun i nun sran mun'n, b'a nunnun-man be.

³⁵ Be fali bé wun ko wlɛli i nvle kun nga'm be nunfuɛ bɔ be si-man Nyanmiɛn'n be nun. Nvle sɔ'm bé sa nga be yo'n, be niannin su be yoli wie.

³⁶ Be amuɛn nga be sɔ be'n, be ko sɔli wie. I sɔ amuɛn liɛ'm be kacili kɛ aya sa mannin be.

³⁷ Be fali be mma yasua mun nin be mma bla mun be sɔli ninnge ngbɛn-ngbɛn mun .

³⁸ Be kunnin sran nga b'a yo-man sa'n. Sran nga b'a yo-man sa sɔ mun yɛlɛ be mma yasua mun nin be mma mmla mun. Be kunnin be be fa sɔli Kanaan amuɛn mun. Be fali be sran kunlɛ sɔ'n be sacili be mɛn'n.

³⁹ Be fali sa sɔ'n be yoli bé wun fiɛn. Sɛ e ´kwla se'n, be boli tekle.

⁴⁰ Anannganman kusu wa fali ya dan kpa i nvlefuɛ sɔ'm bé wun. I sran sɔ'm bɔ be ti kɛ i anyanbeun like sa'n, bé wun wa yoli i tɛ.

⁴¹ Ɔ fali be mannin nvle uflɛ mun. Be nga be kpɔ be'n be yɛ be wa sieli be-ɔ.

⁴² Be kpɔfuɛ'm be tinnin be su kplɔlɔlɔ, be guali bé nyin ase.

⁴³ Kpalɛ sunman ɔ deli be, sanngɛ nyin kekle'n yɛ be yoli i su-ɔ. Be yoli sa tɛ'n be ɔli be nyrun titi.

⁴⁴ Anannganman tili be kokolɛ bɔ be koko'n, yɛ ɔ wunnin nyrɛnnɛn'n b'ɔ o be su.

⁴⁵ Kɛ i waan ɔ ´yo be ye'n ti'n, i wla kpɛnnin aenguɛ ng'ɔ nin be trali'n su. I klun-ufue dan'n ti ɔ sili be aunnvuɛ.

⁴⁶ Ɔ yoli man be nga be trali be lomuɛn'n, be kwlaa be sili be aunnvuɛ.

⁴⁷ Anannganman e Nyanmiɛn, de ye! Kan e bo nun, yi e nvle nga'm bé afiɛn fite, man e bo flɛ wɔ, afin ɔ dunman'n lɛ-man wunsu, yɛ man e fa ɔ manmanlɛ bɔ e manman wɔ'n e di é nuan.

⁴⁸ Amun `la Anannganman b'ɔ ti Izraɛl Nyanmiɛn'n i ase tititi! Yɛ man sran'm be kwlaa be se kɛ: «Man ɔ yo sɔ!» An `manman Anannganman!