Jue Mun 105 - NYANMIƐN NDƐ'N 1998

Nyanmiɛn i nanwlɛ ng'ɔ di i titi'n

¹ An `manman Anannganman. An `kpan flɛ i! Sa dandan ng'ɔ yo be'n, an `bo be jɔ sin nvle'm be nun!

² An `to jue be mɛn i. An `to jue be bo flɛ i! I sa nyɛnmɛn-nyɛnmɛn ng'ɔ yo be'n, an `bu be kwlaa be akunndan.

³ Amun `fɛ i di be nuan, afin i nzuɛn'n nin klɔ sran liɛ'n ti-man kun. Amun bɔ an fa amun wun mantan Anannganman'n, man amun klun jɔ.

⁴ An `fa amun wun mantan Anannganman b'ɔ kwla'n! An `kunndɛ kɛ ɔ nin amun tran tititi.

^5-6 Anannganman i sufuɛ Abraam i osu nunfuɛ mun, Zakɔb i osu nunfuɛ b'ɔ kpali amun'n, man amún wla kpɛn sa nyɛnmɛn-nyɛnmɛn ng'ɔ yoli be'n be su. Man amun wla kpɛn abonuan sa ng'ɔ yoli be'n, ɔ nin jɔlɛ ng'ɔ dili be'n be su.

⁷ Anannganman yɛ ɔ ti e Nyanmiɛn nin-ɔn. Ɔ di asiɛ'n su sran'm be ngba be jɔlɛ.

⁸ I wla fi-man su kɛ ɔ tali nda. I wla fi-man kɛ akpasua-akpasua akpi nga be ´jaso su'n be ti yɛ ɔ tali nda sɔ'n nin-ɔn.

⁹ Ɔ kan kleli Abraam, ɔ kan kleli Izaak.

¹⁰ Ndɛ kunngba sɔ'n, ɔ kan flannin nun kleli Zakɔb, ɔ fa mannin Izraɛlfuɛ mun mlɔnmlɔnmlɔn, kɛ ɔ o lɛ'n yɛ ɔ wo-ɔ.

¹¹ Ɔ seli be kɛ: «N ´fa Kanaan mɛn'n m ´man amun. Ɔ ti amun aja like yɛ amun nyɛnnin i-ɔ.»

¹² Be yoli aofuɛ mɛn sɔ'n nun. Be ti kaan sa, be ju-man wie blɛ sɔ'n nun.

¹³ Be fɛ i mɛn kun nun be kɔ uflɛ nun. Be tu be tran nvle kun nun, kpɛkuun be tu be kɔ tran uflɛ nun.

¹⁴ Sanngɛ Nyanmiɛn ɔ'a man-man sran fi atin kɛ ɔ mianmian be. Be dunman nun ti ɔ ijɔli famiɛn wie mun.

¹⁵ Ɔ seli be kɛ: «Nán an kan min sran bɔ n kpali be mun. Nán an yo mín nuan ijɔfuɛ'm be tɛtɛ.»

¹⁶ Ɔ toli awe yili i mɛn'n su, be nyan-man like be di-man.

¹⁷ Kpɛkuun ɔ fali sran kun dunnin mmua i sran'm be nyrun kan be wa kɔ lɔ'n. Sran sɔ'n yɛlɛ Zozɛf. Kɛ ɔ ´kɔ sɔ'n, be yoli i atɛ kɛ kanga sa yɛ ɔ ɔli-ɔ.

¹⁸ Be wlɛli i ja jrɔkɔ, be wlɛli i kɔmin blalɛ.

¹⁹ Lele san ndɛ nga Anannganman kannin'n i blɛ'n juli yɛ i nuan yiali nan b'a wun i wlɛ kɛ kannzu ɔ ti sran ndɛnman su.

²⁰ Famiɛn'n mannin atin kɛ be yaci i nun. Mɛnmɛn'm be siefuɛ'n ɔ man be yili i bisua'n nun fiteli.

²¹ Kpɛkuun ɔ wa fɛli i sieli i awlo'n su kpɛn. I sin ɔ wa fɛli i bɔbɔ i ninnge'n kwlaa wlɛli i sa nun kɛ ɔ nian su.

²² I waan ɔ `kle i awlo lɔ sran dandan'm be ngwlɛlɛ kɛ i bɔbɔ Zozɛf klo'n sa, nan klɔ'n su kpɛnngbɛn nga be usa ngwlɛlɛ afɛ bé sa nun'n, ɔ `man be akunndan.

²³ Yɛ Izraɛl bali Ezipt mɛn'n nun-ɔn. Zakɔb tu ko trannin Kam mɛn'n nun.

²⁴ Nyanmiɛn man i nvlefuɛ'm be wuli ba kpanngban kpa. Ɔ yoli man be kwlalɛ bɔ be kwlali'n trali be kpɔfuɛ'm be liɛ'n.

²⁵ Ɔ kacili Eziptfuɛ'm be anwlɛn'n, Nyanmiɛn yoli man b'a klo-mɛn i bɔbɔ i sran'n bé sa kun. Be kpɛli be gblɛ, be yoli be tɛtɛ.

²⁶ Nan ɔ'a sunman Moiz b'ɔ ti i sufuɛ'n, ɔ nin Aarɔn b'ɔ kpɛli i'n.

²⁷ Ɔ mannin be wunmiɛn ɔ man be yili atrɛ ng'ɔ seli be kɛ be `yi i Eziptfuɛ'm be afiɛn'n. Be yoli abonuan sa mun Kam mɛn'n nun lɔ.

²⁸ Moiz nin Aarɔn b'a kpalo-man Nyanmiɛn i nuan ndɛ'n. Nyanmiɛn man aliɛ sannin, yɛ ɔ man lika'n dunnin tritritri.

²⁹ Ɔ yoli man Eziptfuɛ'm be nzue'm be kacili mmoja, ɔ kunnin nzue sɔ'm be nun jue mun.

³⁰ Klɛ'm be deli mɛn'n. Be deli lika'n lele be deli famiɛn'm be sua ba mun.

³¹ Kɛ Nyanmiɛn ukeli i nuan'n sa'n, kpɛkuun ngɔnsiɛn'm be deli lika'n, kpɛkuun kplekple'm be deli Eziptfuɛ'm be mɛn'n.

³² Be nzue ng'ɔ ko tɔ ko man be'n yɛlɛ nzraama bɔ kɛ nzue'n tɔ-ɔ, ɔ gua'n. Ngblannan'n bɔ cɛ yɛ ɔ kpɛn-ɔn, ɔ sɔ lika'n nyannyannyan

³³ Ɔ sacili be vinyi nin be figie mun. Ɔ bubuli be mɛn'n nun waka mun.

³⁴ Kɛ ɔ ukeli i nuan sa'n, lalo mun nin aɛcɛ kpanngban kpa bɔ be si-man be nuan'n be deli lika'n.

³⁵ Kakaa sɔ'm be wieli Eziptfuɛ'm be mɛn'n nun nnya mun nin i ijre'n, ɔ nin be fie'm be su ninnge'm be di sekeseke.

³⁶ Eziptfuɛ'm be awlo'm be nun ba klikli bɔ be ti be talua ba'n, ɔ kunnin be kwlaa.

³⁷ Kpɛkuun ɔ yoli man i nvlefuɛ'm be fin mɛn sɔ'n nun fiteli. Be ´fite-ɔ, be di-man jɛtɛ ufue'n nin sika ɔkwlɛ'n i yalɛ bé sa nun. Be kwlaa be ti juejuejue be akpasua'm be kwlaa su.

³⁸ Bé bo tulɛ Ezipt mɛn'n nun lɔ'n ɔ yoli lɔfuɛ'm be fɛ dan, be klun jɔli. Be klun'n b'ɔ ´jɔ'n yɛlɛ srɛ dan b'ɔ kunnin be Izraɛlfuɛ'm bé wun'n b'ɔ su kun-man be kun'n.

³⁹ Anannganman fali nyanmiɛn ble'n katali i nvlefuɛ'm bé su. Kɔnguɛ'n, sin yɛ ɔ kpaja bé bo-ɔ.

⁴⁰ Be waan ɔ blɛ be nnɛn. Ɔ yoli man aoko wie'm be bali. Nyanmiɛn su lɔ kpaun yɛ ɔ fa tali be-ɔ.

⁴¹ Ɔ kpacili yɛbuɛ nun, kpɛkuun nzue fin nun fiteli. Nzue'n sonjili asiɛ kee'n su kɛ nzue ba sa.

⁴² Afin nda ng'ɔ tali Abraam b'ɔ ti i sufuɛ'n, i wla o su.

⁴³ Kɛ ɔ ´yi i nvle'n nunfuɛ mun Ezipt lɔ fite'n, be klun'n jɔ-man blɛblɛ. Be b'ɔ kpali be sɔ'n, be klun b'ɔ jɔli'n ti b'a bo b'a sro-man ngowa.

⁴⁴ Ɔ fali nvle uflɛ wie'm be nunfuɛ'm be asiɛ'n mannin be. Ɔ man junman nga nvle sɔ'm be nunfuɛ'm be dili'n, i nuan like'n kwlaa yoli be liɛ.

⁴⁵ I waan ɔ ´yo sɔ nan be di i nuan ndɛ'm bé su, nan be niɛn i mmla ng'ɔ fa mannin be'n bé su be nanti. An `manman Anannganman!