Jue Mun 104 - NYANMIƐN NDƐ'N 1998

Nyanmiɛn i asenna jue

¹ N ´la Anannganman i ase! Anannganman min Nyanmiɛn wɔ dan bɔ a ti'n lɛ-man sin. A lɛ nyrun o! A yo nyɛnmɛn o!

² Ɔ wun ti kpajawa yɛiin. Sɛ n ´kwla se'n, a trɛ nyanmiɛn'n b'ɔ la nglo lɔ plaii nun'n kɛ tannin sua sa.

³ Ɔ tranwlɛ'n wo nzue ng'ɔ o nglo lɔ'n i ti su nglo mmua kpa lɔ. Nyanmiɛn ble'm be ti kɛ ɔ kakaklolo sa. Aunngban'n ti kɛ anunman sa, i ndɛwa'n su yɛ a fu kɔ ɔ lika-a.

⁴ Aunngban'n ti kɛ ɔ jasin bofuɛ sa. Nyanmiɛn'n i sin b'ɔ kpa'n ti kɛ ɔ sufuɛ sa .

⁵ A wlali asiɛ'n i bo ase kekleke kpa! Kɛ ɔ o lɛ'n yɛ ɔ wo-ɔ .

⁶ Laa, jenvie'n i nzue'n ɔ kata asiɛ wunmuan'n su, nzue'n fu lele ko kata oka'm be su .

⁷ Sɛ n ´kwla se'n, kɛ a kpannin nzue'n su'n, kpɛkuun ɔ wanndili. Wɔ man nyanmiɛn'n boli nun, kpɛkuun nzue sɔ'n ɔ kacili i ja sin.

⁸ I bue fuli kpɔlɛ'm be su, yɛ i bue jrali kongo'm be nun. Ɔ ɔli lika nga a siesieli mɛnnin i'n i nun.

⁹ A kleli i juwlɛ, ɔ waan nán ɔ kpɛ i juwlɛ sɔ'n, ɔ waan nán ɔ wɔ lele ɔ di asiɛ'n kun.

¹⁰ Wɔ man nzue ti'm be nun nzue'n sin nzue mmuɛ'm be nun yɛ ɔ sonji oka'm be afiɛn.

¹¹ Bo nun nnɛn'm be kwlakwla be nɔn. Sɛ nzue we kun blo aflunmun mun-ɔn, be wa nɔn wie.

¹² Anunman'm be tran i nuan. Be tran i nuan waka'm be su be kpan .

¹³ A o nglo lɔ a tɔ nzue oka'm be su. A yo man asiɛ'n i lika kwlaa e wun ɔ ninnge kpakpa nga a man'n.

¹⁴ Wɔ yɛ man ijre nga klɔ nnɛn'm be ko didi'n ɔ fu-ɔ. Ɔ kunngba'n wɔ yɛ man ninnge nga sran'm be ta'n be fɛfɛ-ɔ. Wɔ man be nyan ninnge be fie'm be su di.

¹⁵ Wɔ man be nyan nzan b'ɔ man bé wun nyrɛn be nin-ɔn. A man be nyanngo b'ɔ man be nyrun'n yo mlanmlan nin-ɔn, ɔ nin aliɛ bɔ be fa tra be anwlɛn nin-ɔn.

¹⁶ Waka dandan'm be nyan nzue ɔ ti be. Liban sɛdri waka nga Anannganman bɔbɔ tali be mun o, be nyan wie.

¹⁷ Anunman'm be wa yo bé sua waka sɔ'm be nun, Anunman wɔngɔ'n i tranwlɛ yɛlɛ siprɛs waka'm be nun.

¹⁸ Oka fleiin'm be ti blo boli'm be tranwlɛ, yɛbuɛ-yɛbuɛ'm be ti oya'm bé sua.

¹⁹ A sieli anglo'n kɛ be fa sie blɛ'n nzɔliɛ, wia'n si i tɔlɛ dɔ.

²⁰ Kɛ a yo bɔ kɔnguɛ'n ɔ'a ba'n, kpɛkuun lika'n lu tuun, wuun ɔ'a ju bo'n nun nnɛn'm be wlanlɛ,

²¹ wuun asɔmɔli mma'm be su kpan be ´kunndɛ nnɛn be ´di, be ´kunndɛ kɛ a man be like man be di.

²² Kɛ wia'n ´man su'n, wuun b'a cuɛn bé wun, be ko la be lawlɛ'n nun,

²³ wuun sran'm be kusu be su fite kɔ be junman'm be su, be di junman'n lele nnɔsua.

²⁴ Ee Anannganman, junman nga a di be'n, be sɔnnin o! Ngwlɛlɛ nga a fa yoli i kwlakwla sɔ'n ɔ cɛnnin o! Ɔ sa nuan ninnge'n ɔ'a yi asiɛ'n.

²⁵ Nian jenvie'n b'ɔ nannan sɔ plaii-ɔ, i nun nnɛn liɛ nga be wlan-wlan nun'n, sran si-man be nuan: i kaan o nun, i dan o nun.

²⁶ I nyin su yɛ mmeli'm be sin-ɔn. Nnɛn sroesroe Leviatan bɔ a yili i kɛ ɔ `kan ngowa nun'n, ɔ wlan sin nun.

²⁷ Nnɛn sɔ'm be kwlaa bé nyin ta ɔ nyrun kɛ sɛ be aliɛ dilɛ dɔ'n ju-ɔ, a ´man be like man be di.

²⁸ Sɛ a fa man be-ɔ, be fa. Sɛ a uke ɔ́ sa nan a man be like-ɔ, ninnge'n sin yia be pɛ.

²⁹ Sanngɛ sɛ a to ɔ́ nyin blo'n, srɛ kun be kpa. Sɛ a yi wunmiɛn ng'ɔ o be nun'n, be ka lɛ be wu, yɛ be sa bé sin be kaci fa.

³⁰ Sɛ a fa be wunmiɛn sɔ'n man be ekun'n, kpɛkuun b'a sa bé sin be osu'n nun, yɛ a kaci asiɛ'n su ninnge'm be uflɛ.

³¹ Anannganman, nán wɔ anyrunnyan'n ɔ sin le. Di ninnge nga a yili be'n be su aklunjuɛ.

³² Kɛ a nian asiɛ'n sa'n, wuun ɔ su keje. Kɛ a kan oka mun nin ɔ sa'n, wuun wɛnsrɛn su fin be nun fite.

³³ Kɛ min nyin tɛ o su'n, n ´to jue m ´manman Anannganman. Kɛ n nian wu-man'n, n ´sro jue m ´bo n flɛ min Nyanmiɛn'n.

³⁴ Man jue nga n ´to'n ɔ yo i fɛ! Kɛ bɔ ɔ ti min Nyanmiɛn'n ti'n, n klun jɔ lele kpe nun.

³⁵ Man sa tɛ yofuɛ'm be tu asiɛ'n su, nán be nga be bu-man Nyanmiɛn nin i nuan su ndɛ'n be like fi'n be tran lɛ kun. N ´la Anannganman i ase! An `manman Anannganman!