Jue Mun 103 - NYANMIƐN NDƐ'N 1998

Nyanmiɛn i wun ye silɛ

1 Jue nga ti David liɛ.

¹ Jue nga ti David liɛ. I waan: N ´la Anannganman i ase! N ´tu n klun n ´lɛ i ase kpa.

² N ´la Anannganman i ase, n wla su fi-man like ng'ɔ yo mannin min'n i wie fi su.

³ I yɛ ɔ yaci min wun sa'n kwlaa cɛ min-ɔn. Sɛ n tɔ tukpacɛ'n, i yɛ ɔ yo min juejue-ɔ.

⁴ I yɛ ɔ de min wie'n i nuan nun-ɔn, i yɛ ɔ yo min ye kpe nun nin-ɔn, i yɛ ɔ si min aunnvuɛ-ɔ.

⁵ Sɛ n yo kpɛnngbɛn'n, i yɛ man ninnge kpakpa'm be ti sin yia min nin-ɔn. I yɛ man n sa n sin n yo gbanflɛn bɔ n nyan wunmiɛn kɛ anunman nyin'n sa nin-ɔn .

⁶ Ɔ jran sran'm bé sin di be jɔlɛ mun. Ɔ nian be bɔ be mian-mian be'n be ndɛ'm be nun di be kpa.

⁷ Ɔ fɛli i atin'n kleli Moiz, ɔ fɛli i sa dandan ng'ɔ yo be'n kleli Izraɛlfuɛ mun.

⁸ Anannganman klun ti ufue, ɔ si aunnvuɛ. Ɔ fa-man ya ndɛndɛ, i kpa liɛ'n, be flɛ-man .

⁹ Ɔ ka-man sran i ijɔlɛ'n su sa tititi. Ɔ fa-man ya sie-mɛn i klun.

¹⁰ Ɔ nian-man é sa tɛ'm be su yo-man e sa. Fɔnlɛ nga e fɔn'n, nán i nuan like yɛ ɔ fa yi e su-ɔ.

¹¹ Sanngɛ kpa ng'ɔ yo be bɔ bé nyin yi i'n, i dan'n ɔ ti kɛ nyanmiɛn'n b'ɔ la nglo lɔ plaii'n ɔ fa o asiɛ'n i ti su mmua-mmua fuun ju'n sa.

¹² Ɔ yo man e nin é sa tɛ mun ye afiɛn'n ti nun kɛ wia afiliɛ'n nin wia atɔliɛ'n be afiɛn'n ti nun ju'n sa.

¹³ Kɛ siɛ kun fa si i mma'm be aunnvuɛ ju'n yɛ Anannganman kusu fa si be bɔ bé nyin yi'n be aunnvuɛ-ɔ.

¹⁴ Afin ɔ si like ng'ɔ fa yili ye'n. Ɔ o i klun, ɔ si kɛ fa yɛ ɔ fa yili ye-ɔ.

¹⁵ Klɔ sran'n i nguan'n ɔ ti kɛ ijre sa. Ɔ ti kɛ blo lɔ ijre nnyrɛ'n b'ɔ kpuke'n sa.

¹⁶ Kɛ aunngban fiaan'n ko fita ijre'n su'n, wuun ɔ'a wu. Be wun-mɛn i osu kun.

¹⁷ Sanngɛ Anannganman yo be bɔ bé nyin yi i'n be ye tititi, nán ndɛ sa yɛ ɔ sɔtɔ i sɔ yolɛ-ɔ. Yɛ ɔ yo sa ng'ɔ ti i nuan su'n man be mma mun nin be klun ba liɛ mun .

¹⁸ Sɛ sakpa be nian aenguɛ ng'ɔ nin be trali'n su be yo i su sa'n, yɛ sɛ be fa mmla ng'ɔ fa sie be nyrun'n sie be klun nan be fa su'n, ɔ yo i sɔ sa mun man be.

¹⁹ Anannganman takali i famiɛn bia'n nyanmiɛn su lɔ, ɔ sie ninnge'n kwlaa.

²⁰ Anz mun, amun bɔ an kplin amún nyin be yo i nuan ndɛ'n i su sa'n, bɔ amún fɛ i aniɛn'n su'n, amun `la Anannganman i ase.

²¹ Anz mun, amun bɔ amun ti i sufuɛ mun'n, bɔ an yo i klun sa'n, an `lɛ i ase.

²² Sɛ n ´kwla se'n, amun kwlaa bɔ amun ti i sa nuan ninnge'n bɔ amun o lika'n kwlaa nun'n, an `lɛ i ase. N kusu n ´la Anannganman i ase!