Jue Mun 102 - NYANMIƐN NDƐ'N 1998

Nyrɛnnɛn sa nin wla ase gualɛ

1 Nyrɛnnɛnfuɛ bɔ i wla a bo'n, b'ɔ kan sa ng'ɔ wo i su'n kle Anannganman'n.

¹ Nyrɛnnɛnfuɛ bɔ i wla a bo'n, b'ɔ kan sa ng'ɔ wo i su'n kle Anannganman'n. I waan:

² Anannganman, tie min srɛlɛ'n, sie ɔ́ su tie kpanlɛ bɔ n kpan n flɛ wɔ'n.

³ Kɛ n wo nyrɛnnɛn'n nun'n, nán kaci ɔ́ sin si min. Kɛ n flɛ wɔ'n, sie ɔ su tie. Kan ɔ́ wun tɛ min su.

⁴ Min nguan'n sin ndɛndɛ kɛ sin wɛnsrɛn'n sa. Min wunmiɛn kan'n i kwlaa ɔ'a wie min nun.

⁵ Awlaboɛ'n ɔ'a kun min kpo, m'an yo kɛ ijre bɔ ɔ'a wu kee'n sa. Mín nuan nun aliɛ bɔ sa'n, mín wla fi i dilɛ su.

⁶ M'an kplin sa lele siɛn'n min owie'n ɔ'a fite su.

⁷ Min like bɔ n fɛ i'n yɛlɛ aawlɛ flɛnnɛn nun anunman, m'an yo kɛ klɔ nvuɛn su akpatue sa.

⁸ N nyan-man lafiwlɛ, m'an kaci min liɛ kɛ anunman bɔ i kunngba tran sua'm bé ti su'n sa.

⁹ Ɔ lɛ-man cɛn kun bɔ min kpɔfuɛ'm be klɔklɔ-man min-ɔn. Be yo min fiaan. Min yɛ be fa min koko be yalɛ su-ɔ.

¹⁰ Min aliɛ bɔ n di'n yɛlɛ ndutre. Like nga n ´nɔn bɔ min nyinmuɛn sanngan-man nun'n, ɔ nun-man lɛ.

¹¹ Ɔ ya bɔ a fɛli i min wun b'ɔ ɔ'a fɛ-mɛn i blɛblɛ'n ti a mannin min su yili min blo mmua.

¹² M'an wie wu a wie! M'an yo kɛ ijre b'ɔ su wu kee'n sa.

¹³ Sanngɛ Anannganman, ɔ liɛ'n a ti famiɛn tititi. Bé wla fi ɔ su-ɔ ɔ yo-man ye.

¹⁴ A su tran-man diin sa. A ´si Siɔnfuɛ'm be aunnvuɛ, afin be aunnvuɛ silɛ blɛ'n ɔ'a ju lele be flɛ-mɛn i julɛ kun.

¹⁵ Afin e bɔ e ti ɔ sufuɛ mun'n, Siɔn lɔ yɛbuɛ'm be yo e klanman, e klo i osu-osu ng'ɔ ka lɛ'n.

¹⁶ Man mɛnfuɛ'm be kwlaa be nyin yi Anannganman. Man asiɛ'n su famiɛn'm be wun kɛ i dan'n fa ti ju'n.

¹⁷ Anannganman'n ´kplan Siɔn klɔ'n uflɛ, ɔ yi i anyrunnyan'n i nglo.

¹⁸ Ɔ ´sie i su be nga afɛ o bé su'n be srɛlɛ'n i bo. Be srɛlɛ sɔ'n su yo-mɛn i tɛ.

¹⁹ Man be klɛ i sɔ ndɛ liɛ'n be `man be nga be wa wu be kasiɛn'n. I liɛ'n, nvlefuɛ nga be wa jaso su uflɛ'n be ´manman Anannganman.

²⁰ Afin kɛ Anannganman wo i tranwlɛ'n nun lɔ'n, ɔ kpɛ i nyin ase nian. Kɛ ɔ o nyanmiɛn su lɔ'n, ɔ nian asiɛ wun wa.

²¹ Ɔ nian wa nan ɔ ´ti bisuafuɛ'm be kplinlɛ'n. Ɔ nian wa nan ɔ ´de be nga ɔ'a ka be nin wie'n.

²² I waan ɔ ´yo sɔ nan sran sɔ'm be `bo i dunman'n be sin Siɔn lɔ, nan be `to jue be mɛnmɛn i Zerizalɛm lɔ,

²³ blɛ nga bɔ mɛnfuɛ mun nin famiɛn diwlɛ'm be nunfuɛ'm be ´yia be ´su i'n.

²⁴ Anannganman yoli man min wunmiɛn'n ɔ kannin ase min gbanflɛn nun. Ɔ kpɛli min nguan nyanman'n su.

²⁵ I osu ti n seli kɛ: «Min Nyanmiɛn, wɔ bɔ nán ndɛ sa yɛ a o lɛ'n, nán yo man n wu min gbanflɛn nun.»

²⁶ Kɛ ɔ fin lalafuɛ nun'n, wɔ yɛ a yili asiɛ nin-ɔn, ɔ́ sa nuan like yɛlɛ nyanmiɛn'n b'ɔ la nglo lɔ plaii'n.

²⁷ Be ´saci, sanngɛ ɔ liɛ a ´ka lɛ. Nyanmiɛn'n bɔ la nglo lɔ'n nin asiɛ'n be ´yo kɛ tralɛ nvuɛn sa. A ´kaci be kɛ be kaci tralɛ'n sa. Be ´tu lɛ.

²⁸ Sanngɛ ɔ liɛ'n, a ´ka ɔ osu'n nun, wɔ afuɛ'n su wie-man le .

²⁹ Ɔ sufuɛ'm be mma'm be ´tran be mɛn'n nun, yɛ wɔ man be osu'n nunfuɛ nga be wa jaso su'n be ´taka.