Jue Mun 10 - NYANMIƐN NDƐ'N 1998

Srɛlɛ nga be srɛ Anannganman kɛ ɔ di jɔlɛ klanman'n

¹ ?Anannganman, ɔ yo sɛ ti yɛ a jran mmua lɔ sɔ-ɔ? ?Kɛ sa'n ko ju'n, ɔ yo sɛ ti yɛ a fia-a?

² Kɛ klunwifuɛ'n ɔ ´kle nyrɛnnɛnfuɛ'm be yalɛ'n, nyannzuɛn kun-mɛn i. I aya ng'ɔ sua'n ɔ'a tra be.

³ Klunwifuɛ'n i nyin blo ninnge tɛtɛ'm bé su, ɔ fa be di i nuan. Lufle klofuɛ sɔ'n ɔ bo Nyanmiɛn i sannzan, ɔ yo i finfin.

⁴ Klunwifuɛ'n i klun akunndan'n i ngba'n yɛlɛ kɛ Nyanmiɛn nun-man lɛ. Ɔ tu i wun. Nyanmiɛn i ndɛ ti-mɛn i ndɛ.

⁵ Like kwlaa nga klunwifuɛ sɔ'n yo'n, ɔ yo ye i sa nun kpan! Nyanmiɛn i fɔ b'ɔ bu sran'n, ɔ bu-mɛn i like fi. I kpɔfuɛ'm bé bo kankanlɛ'n ɔ ti sa pɔpɔ i sa nun.

⁶ Ɔ se i klun lɔ kɛ: «Sa fi nyan-man min le nan kɛ ɔ ´yo-ɔ ɔ'a yo-ɔ. Nyrɛnnɛn su tɔ-man mín su le.»

⁷ Sannzan cɛ yɛ ɔ fɛ i nuan'n ɔ bo-ɔ. Gblɛ kpɛlɛ nin ndrunmun dilɛ'n ɔ'a yi i piɛ. Ndɛ tɛtɛ b'ɔ kle sran yalɛ'n yɛ ɔ kan be-ɔ. Ɔ man sran wun nyrɛnnɛn .

⁸ Ɔ ko bu sa klɔ kanngan'm be wun lɛ. Ɔ fia kun sran nga ɔ'a yo-man sa'n. Ɔ lala nyrɛnnɛnfuɛ'n sa tititi.

⁹ Ɔ bu sa kplɛ kɛ asɔmɔli wie bɔ ɔ'a sɛ i kunman nuan'n sa. Nyrɛnnɛnfuɛ'n yɛ ɔ kunndɛ i nan ɔ ´trɛ i-ɔ. Ɔ kɛnkɛn i ko yi i tɛ nun, kpɛkuun ɔ'a trɛ i.

¹⁰ Ɔ klu, ɔ la pɛplɛɛ! Kpɛkuun nyrɛnnɛnfuɛ'm be wa tɔ i sa klun.

¹¹ Ɔ se i anwlɛn'n nun kɛ: «Nyanmiɛn i wla fi ninnge mun. Nyanmiɛn kɛtɛ i nyin, ɔ wun-man like fi mlɔnmlɔn!»

¹² Anannganman Nyanmiɛn, jaso, man ɔ́ sa'n su! Nán ɔ́ wla fi nyrɛnnɛnfuɛ'n.

¹³ ?Ɔ yo sɛ ti yɛ klunwifuɛ'n ɔ yo wɔ finfin nin-ɔn? ?Ɔ yo sɛ ti yɛ ɔ se i wun kɛ Nyanmiɛn bu-man sran fɔ nin-ɔn?

¹⁴ A wun nyrɛnnɛnfuɛ'm be afɛ'n nin be nyrɛnnɛn'n. A yaci-man be nga afɛ nin nyrɛnnɛn'n wo bé su'n be lika nianlɛ. Ɔ su yɛ nyrɛnnɛnfuɛ'm be kisa-a. Wɔ yɛ a uka aika mun-ɔn.

¹⁵ Saci sa tɛ yofuɛ'n i wunmiɛn b'ɔ fa yo like'n. Tu i fɔ i sa tɛ b'ɔ yoli'n ti. Man ɔ tu ɔ nyrun lɛ.

¹⁶ Anannganman ti famiɛn tititi. Nvle-nvlefuɛ nga be su-mɛn i'n, ɔ nunnun be i asiɛ liɛ'n su.

¹⁷ Anannganman, like nga nyrɛnnɛnfuɛ'm be kunndɛ'n, a si, a wla be fanngan, a sie ɔ́ su tie be ndɛ mun.

¹⁸ A di aika nin be nga be yo be tɛtɛ'n be jɔlɛ mun klanman man be kɛ ɔ ´yo nan klɔ sran'm b'a yaci be wiengu'm be nyrɛnnɛn klelɛ'n ti.