Jue Mun 1 - NYANMIƐN NDƐ'N 1998

FLUWA'N I KLIKLI SU ( Jue 1—41 ) Sran ng'ɔ fa atin kpa'n

¹ Sran ng'ɔ tie-man be nga be bu-man Nyanmiɛn nin i nuan ndɛ'n be like fi'n be afɔtuɛ'n, b'ɔ fa-man sa tɛ yofuɛ'm be atin'n su'n, b'ɔ nin be bɔ be yo Nyanmiɛn i finfin'n be tran-man likawlɛ'n, i liɛ su ti ye!

² Sran bɔ i like liɛ ng'ɔ klo i'n yɛlɛ Nyanmiɛn i mmla'n, b'ɔ bu i akunndan kɔnguɛ nin wia su'n, i sɔfuɛ'n i liɛ su ti ye .

³ Ɔ ti kɛ waka b'ɔ o nzue ba nuan'n sa. Waka sɔ'n i sulɛ blɛ'n ɔ sɛn-mɛn i wun le, kusu i nnya'm be blo-man le. Like kwlaa nga i sɔ sran liɛ'n yo'n, san ɔ ´yo ye i sa nun .

⁴ Klunwifuɛ'm be liɛ'n, ɔ ti-man sɔ mlɔnmlɔn. Be ti kɛ ijre bɔ aunngban'n fitɛ i kɔ'n sa.

⁵ I sɔ'n ti, jɔlɛ dilɛ cɛn'n nun'n, klunwifuɛ'm be su nyan-man jranwlɛ. Kɛ Nyanmiɛn i sran ng'ɔ bu be sran kpa'm be yia sa'n, sa tɛ yofuɛ'm be nin be tran-an, ɔ yo-man ye.

⁶ Anannganman nian sran ng'ɔ bu be sran kpa'n be atin nga be fa'n su. Klunwifuɛ'm be atin liɛ'n, ɔ fa be kɔ mlinlɛ nun.