Zɔb I Nyrɛnnɛn Wunlɛ 9 - NYANMIƐN NDƐ'N 1998

Zɔb i Bildad i su tɛlɛ

¹ Yɛ Zɔb waan:

² N si ng'ɔ o lɛ'n kwlaa. ?Sran kun i ndɛ yo fɛ Nyanmiɛn i lika-a ɔ yo ye?

³ Sɛ sran waan ɔ nin i be ´si akplowa'n, sɛ ɔ kan ndɛ akpi'n, sran'n su kwla-man kun sa su tɛ.

⁴ Nyanmiɛn i ngwlɛlɛ'n ɔ lɛ-man sin, yɛ ɔ kwla like kwlaa yo. Sran ng'ɔ jaso i wun'n, Ɔ yaci-mɛn i lɛ, ɔ tu i fɔ.

⁵ Ɔ tu oka'm be bo ko sie be lika uflɛ, be bɔbɔ be si-man nun. Kɛ ɔ fa ya'n, ɔ sanngan be nun.

⁶ Ɔ man asiɛ'n keje, kpɛkuun i bo'n ɔ taka-man kpa kun.

⁷ Sɛ ɔ se wia'n kɛ nán man ɔ jaso-ɔ, ɔ fite-man. Ɔ to nzraama'm be su anuan.

⁸ I ngunmin yɛ ɔ fali nyanmiɛn'n ɔ sɛli i nglo lɔ kɛ bɛ sa-a. Ɔ nanti jenvie'n i nzue ng'ɔ jaso nglo kendengleiin'n su.

⁹ I yɛ ɔ yili nzraama akpasua akpasua mun-ɔn .

¹⁰ Sa ng'ɔ yo be'n be ti dandan, be kwla wun-man be bo. Sa nyɛnmɛn-nyɛnmɛn ng'ɔ yo be'n be sɔnnin dan.

¹¹ Sɛ ɔ sin mín wun lɛ'n, n wun-mɛn i. Sɛ ɔ kan min'n, n wun-mɛn i.

¹² ?Sɛ ɔ fa like kekle nun'n, wan yɛ ɔ le i sa nun-ɔn ɔ yo ye-ɔ? ?Wan yɛ ɔ kwla se i kɛ: «Nguɛ yɛlɛ nga a ´yo i lɛ'n?»

¹³ Kɛ Nyanmiɛn ko fa ya'n, wuun ɔ'a fa, ɔ guɛ-mɛn i ase. Jenvie'n nun ninnge sroesroe mun nin Raab nin i sinfuɛ'm be koto koto i bo lɛ.

*

¹⁴ ?Yɛ min li yɛ sɛ ɔ kan ndɛ-ɔ n tɛ i su-ɔ ɔ yo ye-ɔ? ?Nguɛ ndɛ cɛ yɛ n kan kle i-ɔ ɔ yo ye-ɔ?

¹⁵ Kannzɛ min ndɛ yo fɛ-ɔ, n kwla tɛ-mɛn i su. Selɛ yɛ n ´se i kɛ ɔ `yaci-ɔ.

¹⁶ Sɛ n kpan flɛ i nan ɔ sro'n, n lafi-man su kɛ ɔ sieli i su mín nuan bo ti-ɔ.

¹⁷ Ɔ'a bubu min sa kplɔlɔlɔ. M'an wun-man sa bɔ n yoli-ɔ, sanngɛ like yaya'n yɛ ɔ fa yo min sa tititi-ɔ.

¹⁸ Ɔ yaci-man min nun man n de-man wunmiɛn. Sanngɛ klunngbɔ'n yɛ ɔ wla min-ɔn.

¹⁹ Sɛ min waan e nin i e ´tu ngondin-ɔn, i fanngan liɛ'n ɔ tra min liɛ'n. Sɛ min waan e `wɔ jɔlɛ difuɛ'm be ja su-ɔ, ɔ su bo-man wɛ kɔ-man bɔ ngbɛn.

²⁰ Sɛ min ndɛ yo fɛ o, ɔ ´bu min fɔ. Sɛ m'an fɔn-man mlɔnmlɔn'n, kannzɛ n kɛn i sɛ n kɛn i sɛ'n, san ɔ ´bu ndɛ'n yi min su.

²¹ N si jrɛiin kɛ m'an fɔn-man. Sanngɛ m bu-man min wun like fi. Nguan'n ɔ'a flan min.

²² N se kɛ: Nyanmiɛn man sran kpa nin sran tɛ'n be wu wie kunngba'n. Min ndɛ nun-man nun.

²³ Sɛ sran'm b'a fɔn-man'n, yɛ sɛ sanvuɛsa wie ju nan wie'n fu be nun kun be'n, be nyrɛnnɛn'n ɔ kle Nyanmiɛn i srilɛ.

²⁴ Sɛ sran nga be bu-man Nyanmiɛn like fi'n be nun wie kle mɛn kun nunfuɛ'm be yalɛ'n, Nyanmiɛn kata jɔlɛ difuɛ'm bé nyin. ?Afin sɛ nɛ́n i'n, wuun waan-an?

*

²⁵ Mín nguan'n nun cɛn mun be sin ndɛndɛ kɛ sran yɛ ɔ su wanndi sa. Sɛ be ti sran'n, wuun n ´se kɛ be wanndi ɔli, b'a nyan-man muae.

²⁶ Sɛ n ´kwla se'n, be kɔ ndɛndɛ kɛ mmeli bɔ be fa ndɛma yoli'n sa. Be kɔ ndɛndɛ kɛ anunman nyin'n ɔ fa jra nnɛn'm be su kli'n sa.

²⁷ N se n klun lɔ kɛ: Man n yaci kokolɛ'n ke. Man n yaci min nyrun mlanlɛ'n ke. Man n sri siɛn'n.

²⁸ Nyrɛnnɛn sa nga be tɔ min su'n, be kun min srɛ. Yɛ n si kɛ Nyanmiɛn su yaci-man min wun sa'n cɛ-man min.

²⁹ Kannzɛ ɔ yo sɛ yo sɛ, Nyanmiɛn i klun lɔ'n, ɔ se i wun kɛ n ti sa tɛ yofuɛ. ?Yɛ n ´fa min wun n ´kle kɛ n ti sran kpa n ´kunndɛ nzu?

³⁰ Man min li n wunnzin sanmlan nun, man n fa blɔ n wunnzin n sa nun,

³¹ san ɔ ´fa min wla nnɔtiɛ'n nun ekun. Yɛ sɛ min tralɛ'm be ti sran'n, wuun n ´se kɛ be ´sro min.

³² Min nin Nyanmiɛn sɛ-man. Ɔ ti-man sran, e nin i e kwla kan-man ndɛ. N kwla n ko sɛnmɛn-mɛn i.

³³ Sɛ ɔ ti kɛ ndɛ nun kpɛfuɛ wo ye afiɛn'n, b'ɔ ´fɛ i sa sie e nnyɔn'n e su'n,

³⁴ wuun Nyanmiɛn ɔ ´yi i waka ng'ɔ fa bo min'n i ase, yɛ ɔ ´yi afɛ ng'ɔ fa yi min su'n.

³⁵ I liɛ'n n ´kwla kan ndɛ kle i, srɛ su kun-man min. Sɛ ɔ'a yo-man sɔ-ɔ, wafa nga n wo nun yɛ'n, n nun-man sran nun.