Zɔb I Nyrɛnnɛn Wunlɛ 6 - NYANMIƐN NDƐ'N 1998

Zɔb i Elifaz su tɛlɛ: ndɛ nga i janvuɛ'm be kan mɛn i'n, ɔ yo-mɛn i fɛ

¹ Zɔb tɛli i su kɛ:

² Ee! Sɛ be sunnzun min klunngbɔ'n ɔ yo ye'n, sɛ be sie sa ng'ɔ o min su'n toe su be sunnzun-ɔn ɔ yo ye'n,

³ wuun be ´wun i kɛ i nɔnnin liɛ'n ɔ ´tra jenvie'n nun aunnyan'n kwlaa. I ti yɛ n kan ndɛ'n n tɔtɔ nun nin-ɔn!

⁴ Afin Nyanmiɛn b'ɔ kwla like kwlaa yo'n, ɔ'a fɛ i cua mun ɔ'a wɔwɔ min. Be bɔyre'n ɔ'a wluwlu mín wun. Nyanmiɛn i ninnge nga be yo sro'n, sɛ be ti sran'n, wuun n ´se kɛ b'a jran jran kɛ sonja mun sa sɛsɛsɛ, be nin min su wa kun alɛ.

⁵ ?Sɛ blo aflunmun'n jin ijre wun'n, ɔ ´kpan ekun? ?Sɛ nannin'n wo ijre ng'ɔ di'n i wun'n, ɔ ´kpan sɛ?

⁶ ?Be kwla di like nga njin nun-man nun bɔ be wun-mɛn i fɛ'n? ?Klenzua'n i ufue'n, nguɛ fɛ yɛ ɔ o nun-ɔn?

⁷ I sɔ like liɛ mun bɔ n di-ɔ ɔ yo-man ye'n, be yɛ b'a kaci min aliɛ siɛn nin-ɔn, kusu be kpla min fiɛ.

*

⁸ Ee! Man n nyan liké nga n usa'n! Man Nyanmiɛn ɔ yo nga n sunnzun kɛ ɔ `yo man min'n!

⁹ Man ɔ bubu min nun kɛ like wie sa, nán man ɔ nian min su kun, man ɔ wiewie min.

¹⁰ Mín wla su bo-man, yɛ kannzɛ nyrɛnnɛn ng'ɔ o min su'n ɔ ti dan'n, n klun ɔ ´jɔ, afin m'an yi-man Nyanmiɛn b'ɔ i nzuɛn'n nin klɔ sran liɛ'n ti-man kun'n i ndɛ'n i ase.

¹¹ ?Yɛ min wunmiɛn liɛ'n ɔ ju nin bɔ yɛ man n ko minndɛ-ɔ? ?Nguan onin yɛ n ´nyɛn i ekun bɔ yɛ man n ko di amlin-ɔn?

¹² ?Min wunmiɛn'n nin yɛbuɛ sɛ? ?Min wunnɛn'n ti kɛ aaba sa?

¹³ ?Nguɛ cɛ yɛ ɔ suan mín bo-ɔ? Like fi nun-man min nun b'ɔ ´kwla uka min kaan sa-a.

*

¹⁴ Sran ng'ɔ o afɛ nun'n, i janvuɛ'n yɛ ɔ fata kɛ ɔ fɔnvɔ i-ɔ, sɛ ɔ'a yo-man sɔ-ɔ, ɔ ´yaci Nyanmiɛn b'ɔ kwla like kwlaa yo'n i su sulɛ.

¹⁵ Min janvuɛ'm be lakali min kɛ nzue ba b'ɔ sonji'n sa. Kɛ ɔ ´yo kan'n, kpɛkuun ɔ'a wie nun, wuun i sinwlɛ'n ɔ'a wu kee.

¹⁶ Kɛ laglasi'n i klolɛ blɛ'n ko ju'n, wuun nzue ba sɔ'n i nun nzue'n ɔ'a kputu.

¹⁷ Yɛ kɛ wawa'n ko kpɛn'n, bɔ wia'n ´bo'n, kpɛkuun nzue'n ɔ'a wie nun.

¹⁸ Sran'm be nin be nyɔnngɔnmɛn bɔ be sua trɔ'n, nzue we b'ɔ kun be'n ti'n, be yaci be atin'n lɛ: Be tɔ aawlɛ flɛnnɛn'n nun lele be mlin, kpɛkuun be wun-man be osu kun.

¹⁹ Temafuɛ'm be nin be nyɔnngɔnmɛn bɔ be sua trɔ'n, be nian-nian be kunndɛ nzue. Sebafuɛ'm be bu i kɛ wuun be ´nyan nzue.

²⁰ Kɛ be ´ju lɔ-ɔ, like fi! Kpɛkuun nyannzuɛn'n ɔ'a kun be.

²¹ Kɛ amun ti sɔ-ɔ, kɛ amun wunnin sa kekle ng'ɔ o min su'n, srɛ'n ɔ'a kun amun kpo!

²² ?N srɛli amun like? ?N seli amun kɛ amun fa amun sa nun ninnge'n wie be man min?

²³ ?N seli amun kɛ amun de min min kpɔfuɛ'm bé sa nun? ?N seli amun kɛ amun de min min kwlafuɛ nga be kle min nyrɛnnɛn'n bé sa nun?

²⁴ Amun `kle min ngwlɛlɛ man m muan mín nuan. Amun `kle min sinnzin ndɛ nga n kannin'n.

²⁵ Sɛ a ti ndɛ ng'ɔ nin tilɛ fata'n, ɔ́ wla'n ɔ gua ase. Sanngɛ fɔ nga amun bu min yɛ'n, n wun-mɛn i nyanndra.

²⁶ ?Ndɛ nga n kannin'n i su ndɛ li yɛ amun waan amun ´kan-an? Ndɛ ngbɛn yɛ sran b'ɔ wun-man kɛ ɔ bu i akunndan'n gua'n ɔ kannin-ɔn. Aunngban'n fa ɔli.

²⁷ ?Amun ´tu aika kun wun fɔtɔ? ?Amun ´yo amun janvuɛ'n i atɛ?

²⁸ Amun li amun `nian min nyrun siin. ?Kɛ amun wun i sa'n, ato yɛ m bua-a?

²⁹ Amun `nian min nan amun `fa nanwlɛ'n be di. Amun `nian min, m'an fɔn-man mlɔnmlɔn.

³⁰ ?Ato buafuɛ yɛlɛ min? ?Like nga be flɛ i nyrɛnnɛn'n, n si-mɛn i ti yɛ n kwla kɛn-mɛn i wun ndɛ-ɔ?