Zɔb I Nyrɛnnɛn Wunlɛ 5 - NYANMIƐN NDƐ'N 1998

*

¹ Kpan man e nian e! ?Wan yɛ a ´nyɛn i b'ɔ ´tɛ wɔ su-ɔ? ?Anz onin yɛ a ´kan ndɛ kle i b'ɔ ´yo ye-ɔ?

² Klunngbɔ'n ɔ kun sinnglinfuɛ'n. Sran b'ɔ si-man sa'n, ɔ fa ya lele ɔ ka nun wu.

³ Sinnglinfuɛ ng'ɔ taka zia'n, m'an wun wie le. Sanngɛ kɛ m ´bo i sannzan'n, n sisi-man m bo.

⁴ I mma'm be nyan-man sran b'ɔ ´de be-ɔ. Sɛ ba sɔ'm be nin sran be nyan ndɛ'n, be bu be yi be su, yɛ be nyan-man sran b'ɔ ´jran bé sin-ɔn.

⁵ I fie'n su ninnge ng'ɔ nyɛnnin i'n, be bɔ awe kun be'n, be fɛn be di. Kannzɛ ɔ fa owie-owie fa sisi i wun'n, be ko fa. Yɛ konvifuɛ wie mun be fɛ i ninnge mun yo be liɛ.

⁶ Afɛ'n ɔ fin-man asiɛ'n nun yɛ ɔ ba-a. Yɛ nyrɛnnɛn'n ɔ fin-man asiɛ'n nun yɛ ɔ fite-ɔ.

⁷ Kɛ be wu sran sa'n, fɛlɛ yɛ ɔ fɛ-ɔ. Ɔ ti kɛ anunman nyin sa. Kɛ b'a wu i'n, kannzɛ ɔ yo sɛ san ɔ ´tu.

*

⁸ Sɛ ɔ ti min'n, wuun n ´kan kle Nyanmiɛn'n, wuun i nyrun yɛ n fa min ndɛ'n n ´kɔ-ɔ.

⁹ Ɔ yo sa dandan, yɛ be wun-man sa sɔ'm bé bo. Abonuan sa ng'ɔ yo be'n be sɔnnin.

¹⁰ Ɔ tɔ nzue asiɛ'n su, Ɔ yo man nzue'n ɔ guagua fie'm be su.

¹¹ Ɔ man be nga be lɛ-man nyrun'm be su. Yɛ ɔ yo man be nga be akunndan'n ɔ'a sanngan'n be klun jɔ.

¹² Ɔ sanngan akunndan tɛ nga gblɛ kpɛfuɛ'm be fa'n i nun, kpɛkuun be kwla yo-man like nga be gugu kɛ be ´yo'n kun.

¹³ Ngwlɛlɛfuɛ'm be bɔbɔ be gblɛ nga be kpɛ'n, yɛ ɔ fa tra be-ɔ. Kpɛkuun sa nga be cici kɛ be ´yo'n ɔ yo-man ye.

¹⁴ Wia kpa nun'n, aosin'n ɔ wla be su tritritri. Be ´nanti-ɔ, bé ja kplakpla, kusu wuun wia'n wo bé ti afiɛn.

¹⁵ Kpɛkuun Nyanmiɛn de yalɛfuɛ nga be suɛ i wun aya'n bé sa nun, ɔ de i be bɔ be kwla'n bé sa nun.

¹⁶ Ɔ man yalɛfuɛ'n ɔ nyan wla cicilɛ. Kpɛkuun ɔ man be nga be yo sa tɛ'n be nyan-man nuan be kan-man ndɛ.

¹⁷ Sran nga Nyanmiɛn tu i fɔ'n, i liɛ su ti ye! Sɛ Nyanmiɛn b'ɔ kwla like kwlaa yo'n ɔ kle wɔ ngwlɛlɛ'n, nán bu i like finfin .

*

¹⁸ Afin i yɛ man afɛ'n ɔ ba-a, i kunngba'n yɛ man ɔ kɔ-ɔ. Ɔ bo wɔ kannin, i kunngba'n ɔ fua.

¹⁹ Sɛ sa tɔ wɔ su kpɛ nsiɛn bɔbɔ'n, ɔ ´de wɔ, yɛ ɔ man sa ´to fuan wɔ kpɛ nso bɔbɔ.

²⁰ Sɛ awe kpɛn'n, ɔ ´yo man a su wu-man. Alɛ'n nun'n, ɔ ´yo man tokofi'n ɔ su nyan-man wɔ wie.

²¹ Ɔ fa wɔ sie, sran'm bé nuan su to-man wɔ, sɛ be ´saci sran'm be bo ninnge mun'n, srɛ su kun-man wɔ.

²² Bé bo ninnge sacilɛ'n nin awe'n be ´kle wɔ srilɛ. A su sro-man bo'n nun nnɛn tɛtɛ mun.

²³ Yɛbuɛ nga be to be yi i fie'm be su'n, be su saci-man like ɔ fie'm be su. Yɛ bo'n nun nnɛn'm bé nin wɔ ´tran fɔun.

²⁴ A ´di alaje wɔ awlo'n nun. Sɛ a ´nian-nian ɔ nnɛn mun ´sin'n, a ´wun kɛ be kwlaa be o lɛ.

²⁵ Ɔ osu'n ɔ ´trɛ. Yɛ ɔ osu'n nunfuɛ'm be ´sɔn kɛ kacɛ nun ijre'n sa.

²⁶ A ´yo oke kpa nan w'a wu w'a ɔ blɔlɔ. A ´yo kɛ awie bɔ be tiɛntiɛn i nuan, kpɛkuun kɛ ɔ ju sɔlɛ kun'n, wuun be su cici'n sa.

²⁷ Kɛ e buli akunndan lele'n, ndɛ nga e wunnin i'n yɛlɛ ng'ɔ o lɛ'n. Ɔ liɛ ng'ɔ o nun'n yɛlɛ kɛ a `sie ɔ́ su a `tie, nan a `nian su a `fa yo ɔ liɛ.