Zɔb I Nyrɛnnɛn Wunlɛ 42 - NYANMIƐN NDƐ'N 1998

Zɔb waan sa ng'ɔ kannin be'n be trɛ i kpɛn

¹ Zɔb tɛli Anannganman su kɛ:

² «M'an wun kɛ a kwla like kwlaa yo. Like fi nun-man lɛ bɔ i yolɛ ti kekle ɔ́ sa nun-ɔn.

³ A usali kɛ: ‹?Wan yɛ ɔ si-man sa bɔ sanngɛ ɔ sanngan sa nga n jajali'n be nun nin-ɔn?› Nanwlɛ, sa nga n kannin be ndɛ'n be tra min kpɛn. N wun-man be wlɛ, n si-man be nun ndɛ.

⁴ A seli min kɛ: ‹Sie ɔ́ su man n kan wie. N ´usa wɔ kosan nan tɛ min su.›

⁵ Laa be kan ɔ ndɛ'n yɛ n tili-ɔ. Sanngɛ siɛn liɛ'n, min nyinma'n ɔ'a wun wɔ.

⁶ Ɔ man nga n kannin'n, m'an se-man sɔ kun. N ´tran ndutre nin nzuɛn'n nun, n ´kan min wun ase.»

ANANNGANMAN MAN ZƆB Ɔ'A SIN I OSU LAA'N NUN

⁷ Kɛ Anannganman nin Zɔb be wieli ijɔ'n, ɔ seli Elifaz b'ɔ fin Teman'n kɛ: «M'an fa ya a nin ɔ janvuɛ nnyɔn mun amun wun kpa. Afin amu'an kan-man mín wun ndɛ kpa kɛ min sufuɛ Zɔb i liɛ'n b'ɔ kannin'n sa.

⁸ I sɔ'n ti, amun `fa nannin tola nso nin bua nene nso nan amun ko to min sufuɛ Zɔb lɔ, nan amun `fa nnɛn sɔ mun amun `yi tɛ nga be yrɛ i nnɛn'n kɔlikɔli'n amun `fa kpata amún ti. Yɛ min sufuɛ Zɔb ɔ ´srɛ man amun. N ´tɛ i srɛlɛ'n su, ɔ man sinnzin bɔ amun yoli'n, n su nian-man su n yo-man amun sa. Afin amu'an kan-man mín wun ndɛ kpa kɛ min sufuɛ Zɔb i liɛ'n b'ɔ kannin'n sa.»

⁹ Yɛ Elifaz b'ɔ fin Teman'n, nin Bildad b'ɔ fin Siak'n, ɔ nin Zɔfar b'ɔ fin Naama'n, be ko yoli nga Anannganman kan kleli be nin-ɔn. Nan Anannganman ɔ'a tie Zɔb i srɛwa'n.

¹⁰ Kɛ Zɔb srɛli Nyanmiɛn mannin i janvuɛ mun'n, kpɛkuun Anannganman yoli man ɔ sinnin i osu laa'n nun. Anannganman yoli man i ninnge ng'ɔ lɛ i laa'n, ɔ wa nyɛnnin i sɔ kpɛ nnyɔn.

¹¹ Zɔb i niaan yasua mun, nin i niaan bla mun, ɔ nin sran nga be si i laa'n, be kwlaa be wa wunnin i wun. Be nin i be dili like i awlo lɛ. Be yoli i yako, be fɔnvɔli i nyrɛnnɛn nga Anannganman man ɔ tɔli i su'n ti. Be kwlaa be mɛnnin i jɛtɛ ufue nin sika ɔkwlɛ nga. Be mɛnnin i be ti nun ti nun.

¹² Anannganman man Zɔb wa dili ye kpa trali klikli liɛ'n. Ɔ wa nyannin bua akpi-akpi blu-nin-nnan (14.000), nin nyɔnngɔnmɛn akpi nsiɛn (6.000), nin nannin nnyɔn-nnyɔn sɔ akpi, ɔ nin aflunmun bla akpi.

¹³ Ɔ wuli ba yasua nso nin ba bla nsan.

¹⁴ Ɔ flɛli klikli'n kɛ Zɛmima , ɔ flɛli nnyɔn su'n kɛ Kɛzia , yɛ ɔ flɛli nsan su'n kɛ Kerɛn-Apik .

¹⁵ Mɛn wunmuan'n nun'n, bla kun nun-man lɛ bɔ i klanman nin Zɔb i mma bla mun sɛ-ɔ. Bé si mannin be aja ninnge'n wie kɛ be niaan yasua mun sa.

¹⁶ I sin'n, Zɔb wa dili afuɛ ya afuɛ ablanan nan ɔ'a wu. Be wuli i anunman mun, nin i anunman sian mun, ɔ nin i anunman siansian mun i nyrun.

¹⁷ Kɛ Zɔb ´wu'n, wuun ɔ'a yo oke sɛkɛsɛkɛsɛkɛ.