Zɔb I Nyrɛnnɛn Wunlɛ 41 - NYANMIƐN NDƐ'N 1998

¹ «Sɛ a jaso kɛ a ´ko trɛ i'n, kɛ ɔ nyinma'n b'ɔ ´guɛ i wun sa cɛ'n, wuun w'a la ɔ nyin aanga lalaa.

² Sran nga i waan ɔ ´klɔklɔ i'n, wuun ɔ'a bo fia ti-ɔ. Yɛ sran ng'ɔ fɛ i ti kpla min kusu'n, wuun i fia liɛ'n tra ngba.

³ ?Wan cɛ yɛ i kalɛ o min su-ɔ? Ninnge ng'ɔ o nyanmiɛn'n i bo wa'n, i kwlaa ti min liɛ!

*

⁴ Sanngɛ n nian kan-man Leviatan sɔ'n i ja'm be ndɛ. N nian kan-man kɛ i fanngan'n ɔ fa ti'n nin kɛ i klanman'n ɔ fa ti ju'n be ndɛ.

⁵ ?Wan cɛ yɛ ɔ'a yi i kplo le-ɔ? ?Wan cɛ yɛ ɔ'a wlu i aoje nnyɔn'm be afiɛn le-ɔ?

⁶ ?Wan yɛ ɔ'a uke i nuan'n le-ɔ? Kɛ a wun i je ng'ɔ sin yiɛ i nuan klun lɔ sa'n, srɛ yɛ ɔ kun wɔ-ɔ.

⁷ I wia sin bui'n ɔ ti kɛ nyrɛn yɛ b'a siesie i sɛsɛsɛ sa. Be mantan be wiengu su.

⁸ Be mantan su kpɛnkpɛnkpɛn. Aunngban bɔbɔ sin be afiɛn-ɔn ɔ yo-man ye.

⁹ Be mantan-mantan be wiengu su. Be titi bé wun nun-ɔn ɔ yo-man ye.

*

¹⁰ Kɛ ɔ kpɛ bɛ sa'n, i nuan'n i klun lɔ'n ɔ ti kɛ sin taaman o lɔ sa. I nyinma'n ɔ kpaja kɛ wia'n b'ɔ su tu i bo'n sa.

¹¹ Sin taaman fin i nuan nun fite. Sɛnmlɛn ba fin i nuan nun fite.

¹² Kpukpuwa'n fin i bue buɛ'n nun fite, ɔ waan blalɛ sɛ dan wie yɛ b'a jin i sin'n nun sa.

¹³ I nuan nun kpukpuwa'n ɔ kwla yo man sɛnmlɛn ba'm be jue. Sin taaman fin i nuan nun fite.

¹⁴ Fanngan ng'ɔ o i kɔmin'n nun'n ɔ ti dan kpa. I ti sran kwlakwla ng'ɔ wun i'n, srɛ kun i.

*

¹⁵ I wunnɛn kplo'n ɔ bli gua su. Ɔ ti sa gbugblugbu, be fa bé sa be tin su-ɔ ɔ wlu-man.

¹⁶ I anwlɛn ba'n ɔ ti kekleke kɛ yɛbuɛ sa. Ɔ ti kekleke kɛ yɛbuɛ dan nga be fa yi ble sanmlɛn'n sa.

¹⁷ Kɛ ɔ jaso sa cɛ'n, yasua sran'm be usu. A kunndɛ be-ɔ, a wun-man be kun srɛ b'ɔ kun be'n ti.

¹⁸ A wɔ i kue-ɔ ɔ wlu-man. A wɔ i ta annzɛ bo nun to annzɛ cua-a ɔ wlu-man.

¹⁹ Blalɛ'n ɔ ti i nyrun kɛ ijre wie sa. Aaba'n ɔ ti i nyrun kɛ waka bɔ ɔ'a kplɔ'n sa.

²⁰ Be to i ta-a ɔ wanndi-man. Kpafloko nun yɛbuɛ'n ti i nyrun kɛ ijre sa.

²¹ Waka kpengbleman'n ɔ ti i nyrun kɛ ijre wie sa. Kɛ be to cua'n b'ɔ tɛ fioo'n, ɔ ti-mɛn i ndɛ.

*

²² Like piembie'm be o i ku bo, be ti kɛ kpɛngbɛ sa. Kan ɔ sin lɛ'n, a wun i sa-a ɔ waan blalɛ piembie wie yɛ b'a cuɛn be ase nnɔtiɛ'n nun-ɔn.

²³ Kɛ ɔ wlu jenvie nun'n, ɔ tu sa kpuyɔ-kpuyɔ-kpuyɔ. Kpɛkuun kpukpuwa'n ɔ jaso sa-a ɔ waan be su tɔn parfɛn sa.

²⁴ Kɛ ɔ kpaci nzue nun sa'n, i osu'n ɔ la nun fuaii kɛ bé ti muɛn bɔ ɔ'a bo je'n sa.

²⁵ Asiɛ'n su'n, like fi sie-mɛn i. Like nga be flɛ i srɛ'n, ɔ si-mɛn i. Kɛ n yili i sɔ-ɔ.

²⁶ Ɔ nian ninnge nga be yo sro mun sa siin! Ɔ bu-man be like fi. I yɛ ɔ ti nnɛn nga be yo wlɛ'n be nun famiɛn nin-ɔn.»