Zɔb I Nyrɛnnɛn Wunlɛ 40 - NYANMIƐN NDƐ'N 1998

Zɔb tɛli Nyanmiɛn i su

¹ Anannganman flɛli Zɔb ekun nan ɔ'a se i kɛ:

² «Nja b'ɔ nin min Nyanmiɛn b'ɔ n kwla like kwlaa yo'n si akplowa'n, sɛ a nin min lɛ ndɛ-ɔ, kan! Nja bɔ i yɛ ɔ kle ngwlɛlɛ'n, sɛ a ´tɛ min su o!»

³ Zɔb tɛli Anannganman su kɛ:

⁴ «N ti-man like fi. ?N ´tɛ wɔ su n ´se sɛ? Mín nuan cɛ yɛ m ´muan-an .

⁵ Ndɛ nga n dun mmua n kannin'n, i nuan su-ɔ. N kɛn-mɛn i kpɛ nnyɔn su kun.»

?Zɔb kwla fɛ i wun sunnzun Nyanmiɛn?

⁶ Anannganman o aunngban dan'n b'ɔ su fita'n nun, ɔ flɛli Zɔb nan ɔ'a se i kɛ:

⁷ «Siesie ɔ́ wun ye, jran kekle kɛ yasua sran sa. N wa usa wɔ kosan nan tɛ min su.

⁸ ?Sakpa yɛ ɔ waan jɔlɛ nga n di be'n be jɔ-man ɔ klun nin-ɔn? ?ɔ waan a ´bu min fɔ a ´fa kunndɛ ɔ ndɛ fɛ?

⁹ ?Ɔ kekle nin min sɛ? Min nɛn'n ɔ ti kɛ nyanmiɛn b'ɔ kpla'n sa. ?Ɔ liɛ'n ɔ ju min liɛ nun?

¹⁰ Sɛ a ti sɔ'n, wuun yo ɔ́ wun kɛ sran dan wie bɔ i nyrun ba nyan'n sa. Yo ɔ́ wun kɛ famiɛn b'ɔ lɛ nyrun'n sa.

¹¹ Yi ɔ ya'n i ngba i nglo. Wun tufuɛ kwlaa nga a wun i'n, kɛn i ase.

¹² Kɛ ɔ nyinma'n ɔ gua wun tufuɛ'm be su bɔ cɛ'n, kpɛkuun kan be ase. Ka lɛ nunkun sran nga be bu-man min Nyanmiɛn min like fi mun.

¹³ Fa be kwlaa wlɛ i asiɛ'n i bo kpɛ kunngba. Sie be.

¹⁴ Kɛ ɔ ko yo sɔ'n, m bɔbɔ n ´yo wɔ mo. Afin ɔ bɔbɔ ɔ fanngan nun yɛ man a nyannin kwlalɛ-ɔ.»

Nzue nun nnɛn sroesroe'n

¹⁵ Nian nzue nun nnɛn sroesroe'n . N kunngba bɔ n yili wɔ, min yɛ yili i-ɔ. Ɔ di nnya kɛ nannin sa.

¹⁶ «Sanngɛ nian fanngan b'ɔ o i wi'n nun-ɔn. Nian fanngan b'ɔ o i wunnɛn'n nun-ɔn.

¹⁷ Kɛ ɔ tinngɛ i lua'n nun sa'n, ɔ ti cinnjin kpa kɛ sɛdri waka sa. I sɔwa nun ndin'm be sɔtɔ-sɔtɔ be wiengu nun.

¹⁸ I owie'm be ti kɛ aaba floloflolo wie sa. I nvɛn mma'm be ti kɛ blalɛ floloflolo wie sa.

¹⁹ N yili i nan m'an yi like'n kwlaa. San min bɔ n yili i'n, min kunngba yɛ n kwla lo i-ɔ.

²⁰ I ijre ng'ɔ di'n, ɔ nyɛn i oka'm be su kɛ blo nnɛn'm be kwlaa be kan be ngowa lɛ'n.

²¹ Ɔ la nzue nyin su ijre'm bé bo. Ɔ fia ndɛma nga be o fɔkɔ nun'n bé bo.

²² Be fɔnvɔ'n ɔ kɛtɛ i su. Waka nga be o nzue nun'n be sin yiɛ i.

²³ Sɛ nzue'n ´sonji ɔ ´tu kplukplu o, srɛ kun-mɛn i. Sɛ nzue'n ɔ ´yi lele ɔ to i nuan nin o, ɔ o lɛ bliin, i klun ti-mɛn i?

²⁴ ?Kɛ i nyin o su'n, wan yɛ ɔ kwla trɛ i-ɔ? ?Wan yɛ ɔ kwla fiti i bue ɔ nin waka-a?

Leviatan

²⁵ ?A kwla fa kowa tra Leviatan ? ?A kwla fa nyanman cici i taaman'n ɔ yo ye?

²⁶ ?A kwla wlɛ i bue nun alɛ nyanman? ?A kwla fa blalɛ kɛ kowa sa a fa sran i aoje'n?

²⁷ ?Ɔ wa tran ´kpata wɔ sa wie su lele kɛ sran sa? ?Ɔ ´kan ndɛ wɛtɛɛ su ´kle wɔ?

²⁸ ?Ɔ nin wɔ ´tra aenguɛ? ?A fɛ i yo ɔ kanga-a ɔ yo ye?

²⁹ ?A nin i amun kan ngowa kɛ anunman wie sa-a ɔ yo ye? ?A kwla minndɛ i nyanman kɛ ɔ mma mmla'm be `fa kan be ngowa?

*

³⁰ ?Jue trafuɛ'm be kwla fa di aata? ?Be kpɛkpɛ i nnɛn'n nun be fa cɛcɛ aata difuɛ mun?

³¹ ?A kwla fa ta mma fiti i kplo'n? ?Cua dandan nga be fa kun jue dandan mun'n yɛ a ´fa sran i ti nin-ɔn?

³² Ɔ li, fa ɔ́ sa'n fuɛ i su nian. Kɛ a bu ngondin nga amun wa tu'n i akunndan'n, sɛ be se wɔ kɛ a yo i sɔ ekun-ɔn, a ´se kɛ cɛcɛ.»