Zɔb I Nyrɛnnɛn Wunlɛ 4 - NYANMIƐN NDƐ'N 1998

Elifaz i ndɛ klikli b'ɔ kannin be'n: Sran nga Nyanmiɛn tu i fɔ'n, i liɛ su ti ye

¹ Elifaz b'ɔ fin Teman'n waan:

² E waan e nin wɔ e ´ijɔ, kusu wɔ akunndan'n ɔ'a sanngan dan, yɛ kusu e muan é nuan-an ɔ yo-man ye.

³ Wɔ bɔ a kle sran sunman be ngwlɛlɛ'n, bɔ a wla be bɔ be kwla-man nun'n be fanngan'n,

⁴ wɔ bɔ ɔ nuan nun ndɛ'n ɔ man be bɔ be su tɔ'n be wunmiɛn'n, wɔ bɔ ɔ nuan nun ndɛ kunngba sɔ'n ɔ cici sran nga afɛ'n ɔ'a ti be'n be wla'n,

⁵ andɛ, sa kunngba nga ɔ nyannin be sɔfuɛ mun'n ɔ'a nyan wɔ wie, kpɛkuun wɔ yɛ ɔ sa sin ɔ'a bubu wɔ yɛ! Nyrɛnnɛn kunngba'n ɔ'a tɔ ɔ su wie, kpɛkuun wɔ akunndan'n ɔ'a sanngan kɛ nga sa!

⁶ ?Ɔ nyin b'ɔ yi Nyanmiɛn'n, nán i yɛ ɔ ti ɔ́ wla cicilɛ like-ɔ? ?Nán ɔ nantilɛ'n i jrɛin b'ɔ ti'n, i yɛ ɔ ti ɔ like bɔ a lafi su nin-ɔn?

⁷ Bu akunndan nian. ?Kɛ be wuli wɔ lele'n, ɔ'a wun sran kpa kun, b'ɔ yo-man sa tɛ'n kɛ nyrɛnnɛn ɔ'a kun i le?

⁸ Nga m'an sie i nzɔliɛ kpa'n yɛlɛ nga: sran nga sa tɛ'n yɛ ɔ ti be junman yɛ be di'n, bɔ sa ng'ɔ ti-man su'n yɛ ɔ ti kɛ be like sa yɛ be lua'n, san be ´ti i su mma'n.

⁹ Nyanmiɛn i ya'n ɔ fita be kɛ aunngban dan sa, ɔ fa be kɔ yɛ be wu.

¹⁰ Be kpanlɛ bɔ be kpan fiaan kɛ asɔmɔli sa'n, Nyanmiɛn man ɔ kpɛ. Asɔmɔli nga b'a kpɛ cro'n be je'm be bubu bɔbɔ.

¹¹ Asɔmɔli'n ɔ nyan-man nnɛn ta-man i wun kun, i sɔ'n ti ɔ wu. Asɔmɔli bla'n i mma'm be bo sanndi.

*

¹² Ndɛ kun tɔli mín su nun kɛ aswre yɛ be su tu min sa, n tili i flɛnflɛn.

¹³ Kɔnguɛ'n, laliɛ nun blɛ bɔ akunndan'm b'a yo sukusuku'n, bɔ lafilɛ dan ɔ ´tɔ sran'm be su'n, yɛ n tili-ɔ.

¹⁴ Srɛ kunnin min, kpɛkuun ayrɛ guali mín wun. Mín wun usuli min dan kpa.

¹⁵ Aunngban kan wie fitali mín nyin nun fɛɛ! Kpɛkuun ayrɛ nzinma ka lɛ guali min wun.

¹⁶ N ´nian-an, sran kun yɛ ɔ jin yɛ, m'an wun-mɛn i sran wlɛ. Kpɛkuun n tili aniɛn vɛɛ kaan kun. Aniɛn sɔ'n waan:

¹⁷ «?Sran kun kwla yo kpa Nyanmiɛn nyrun? ?Sran kun kwla yo saun i yifuɛ'n i nyrun ?»

¹⁸ I anz'm be bɔbɔ, i waan ɔ lafi-man be su. I sufuɛ sɔ mun bɔbɔ, i wan ɔ wun fɔ bé wun,

¹⁹ yɛ ɔ waan klɔ sran mun bɔ be tran fa sua nun'n, bɔ ndutre nun yɛ be fin'n, bɔ be kwla wɛtɛ be kɛ kakaa wie sa'n!

²⁰ Le kunngba a ´nian-an, b'a kaci ndutre b'a wu b'a ɔ mlɔnmlɔn! Ɔ fu ɔ nun sa sɔ ngbɛn.

²¹ A ´nian-an, be nguan nyanman'n ɔ'a kpɛ. B'a wun-man sa wlɛ, kpɛkuun b'a wu.