Zɔb I Nyrɛnnɛn Wunlɛ 39 - NYANMIƐN NDƐ'N 1998

*

¹ ?A si blɛ nga bɔ wannzannin'n ɔ wu i wa'n nun'n? ?Kɛ flete'n ɔ ´wu i mma mun'n, w'a wun nun le?

² ?W'a ka be wunnzɛlɛ anglo'n, w'a si i nuan le? ?Yɛ a si blɛ nga be wu be mma mun'n?

³ Nnɛn bla'm be klu nan b'a gua ba'n i ase. Kpɛkuun be aklunya'n ɔ'a tɔ be nun.

*

⁴ Be mma'm be nyin blo lɔ. Be nyan wunmiɛn. Cɛn kun, be tu bé nin'm bé wun lɛ be kɔ. Be sa-man bé sin bé wun lɔ kun.

⁵ ?Wan yɛ ɔ yacili blo aflunmun'n nun-ɔn? ?Wan yɛ ɔ nyanjili i wun nyanman'n b'ɔ man ɔ ɔli-ɔ?

⁶ N fali aawlɛ flɛnnɛn'n m mɛnnin i kɛ ɔ tran nun. Njin lika'n yɛ n fa mɛnnin i-ɔ.

⁷ Klɔ'm be su kpankpanlɛ'n ti-mɛn i ndɛ. Ɔ lɛ-man kankanfuɛ b'ɔ ´kpɛn i su-ɔ.

⁸ I didiwlɛ'n yɛlɛ oka b'ɔ wlan-wlan su'n. Ɔ wlan kunndɛ ijre mɔnnɛn di.

*

⁹ ?Awuɛ kun ɔ ´kplin su kɛ a ´fɛ i ´di ɔ junman? ?Wɔ man ɔ wa la ɔ nnɛn'm be tuin nun?

¹⁰ ?A ´kwla wlɛ i nyanman a ´fa tutu lika? ?Ɔ cuɛn saru'n lika kpɛtɛkplɛɛ'n nun lɔ-ɔ ɔ yo ye?

¹¹ ?A ´niɛn i fanngan b'ɔ lɛ i'n ti a ´fa ɔ junman'n a ´wlɛ i sa nun kɛ ɔ `yo?

¹² ?A ´kwla lafi i su bɔ a ´fa ɔ ble bɔ b'a kpɛ'n a ´fa mɛn i kɛ ɔ ko guɛ i ɔ ngblaliɛ'n nun lɔ?

*

¹³ Kɛ klɔnsoklo ɔ keje i ndɛwa'n, ɔ yo klanman. Sanngɛ i ndɛwa liɛ'm be nin anunman wɔngɔ'n i ndɛwa'm be ti-man kun.

¹⁴ Kɛ ɔ ko to i klenzua liɛ'n, ɔ yaci i asiɛ wun lɛ. Sɛ n ´kwla se'n, ɔ fa man aunnyan'n b'ɔ lo fiaan'n kɛ ɔ `utu su mɛn i.

¹⁵ Ɔ bu-man akunndan kɛ be kwla tiatia su, annzɛ sɛ blo nnɛn'm be nanti su-ɔ ɔ ´bobo.

¹⁶ Kɛ ɔ ´yo i mma'm be kpokokpoko sa'n, ɔ waan nɛ́n i yɛ ɔ wuli be-ɔ. Ɔ bu-man akunndan kɛ sɛ ɔ'a yo-man be cɛcɛ-ɔ, ɔ cɛ-man nan i afɛ'n ɔ'a yo ngbɛn.

¹⁷ Afin man mɛn-mɛn i ngwlɛlɛ'n wie. Like nga be flɛ i kɛ sa sin bulɛ'n, ɔ'a nyan-man wie.

¹⁸ Sanngɛ man ɔ jaso nglo nan nian, kɛ ɔ nyan wanndilɛ sa'n, nnɛn kpanngɔ'n nin i su fufuɛ'n be wun bulɛ'n ɔ ti i sa nun ngowa.

*

¹⁹ ?Wɔ yɛ a man nnɛn kpanngɔ i wunmiɛn nin-ɔn? ?I kɔmin nun ndrɛ klanman'n gbuyo'n, wɔ yɛ a fa mɛnnin i-ɔ?

²⁰ ?Wɔ yɛ a yo man ɔ tu kpɛnkpɛn kɛ aɛcɛ sa nin-ɔn? I kpanlɛ'n ɔ kun srɛ.

²¹ Kɛ ɔ o lika kpɛtɛkplɛɛ'n nun lɔ'n, ɔ fɛ i ja bui'n kpita asiɛ wun. I klun ti jɔwa fanngan b'ɔ lɛ i'n ti. Ɔ wanndi ko kpa alɛ ninnge bɔ be to be'n be atin.

²² Ɔ si-man like nga be flɛ i srɛ'n. Ɔ sro-man like fi. Ɔ wanndi-man tokofi nyrun.

²³ Cua'n nin kanga kue'n, ɔ nin ta'n be sende i bue kun, wuun be tɛ.

²⁴ Ɔ fɛ i wunmiɛn'n kwlaa yɛ ɔ wanndi-ɔ. I wanndilɛ'n ɔ yo sro. Kɛ ɔ ko ti awɛ bɔ be bo'n, ɔ minndɛ-ɔ ɔ yo-man ye kun.

²⁵ Kɛ ɔ ti awɛ'n i tɛlɛ'n, wuun ɔ ´kpan sɔ su. Kɛ ɔ o mmua lɔ'n, sɛ n ´kwla se'n, ɔ ti alɛ'n i bɔnlɛ. Ɔ ti alɛ su kpɛnngbɛn'm be kpanlɛ, yɛ ɔ ti alɛ'n nun lɔ nganniɛn'n.

*

²⁶ ?Wɔ yɛ a kle asri i ngwlɛlɛ kɛ ɔ trɛ i ndrɛ'n nun, nan ɔ tu wɔ mɛn'n i ngua lɔ lika'n i ndɛnman-an?

²⁷ ?Wɔ yɛ a kan ndɛ a kle anunman nyin yɛ man ɔ tu kɔ nglo mmua ɔ ko yo i sua'n oka'm be su nin-ɔn?

²⁸ Ɔ yo i sua'n yɛbuɛ-yɛbuɛ'm be nun, ɔ yo i yɛbuɛ nga i ti'n ɔ ti piembie b'ɔ seli piaa'n i ti su nglo. Be kɔ lɔ-ɔ ɔ yo-man ye.

²⁹ Kɛ ɔ o lɔ'n, ɔ nian-nian ɔ kunndɛ nnɛn mun ngua wa. Ɔ wun be mmua kpa lɔ.

³⁰ Mmoja yɛ i mma'm be nɔn-ɔn. Lika kwlaa nga nnɛn fuɛn o lɛ'n, san ɔ ´kɔ lɔ wie.