Zɔb I Nyrɛnnɛn Wunlɛ 37 - NYANMIƐN NDƐ'N 1998

*

¹ N liɛ'n, kɛ n wun i sɔ'n, min anwlɛn'n ɔ si kekle kpa min klun lɔ kpu kpu kpu. Ɔ yo kɛ ɔ su wa ti tɔ sa.

² Amun `tie, amun `tie, Nyanmiɛn'n ɔ kpan fiaan. Amun `tie i nɛn b'ɔ klu'n.

³ I nɛn'n ɔ tɛ nyanmiɛn wunmuan'n su. Nyanmiɛn'n ɔ kpa sin kpɛkuun ɔ kpaja asiɛ wunmuan'n su.

⁴ I sin, kɛ be ´ti'n, ɔ su kpla. Kɛ ɔ ko bo nun sɔ'n, ɔ cɛ-man wuun ɔ'a kpa sin ekun.

⁵ Kɛ Nyanmiɛn'n ɔ kpan fiaan'n ɔ yo nyrɛnnɛn. Sa dandan nga Nyanmiɛn yo be'n, e wun-man be wlɛ.

*

⁶ Ɔ se laglasi'n kɛ ɔ gua asiɛ'n su. Ɔ yo man nzue kanngan nin i dandan kpa'm be tɔ.

⁷ I blɛ sɔ nun'n, ɔ man sran'm be kwla-man like fi yo kun kɛ ɔ ´yo nan be kwlaa b'a si kɛ i yɛ ɔ yili be'n ti.

⁸ Yɛ nnɛn'm be wlu be lawlɛ'm be nun, be ko la lɔ bɔ cɛ.

⁹ Aunngban dandan'm be fin ngua lɔ be ba. Ayrɛ'n fin nglo lɔ ɔ ba.

¹⁰ Nyanmiɛn i nuan nun aunngban'n yɛ ɔ yi laglasi nin-ɔn. I yɛ man nzue ba'm bé nyin su yo laglasi nin-ɔn.

*

¹¹ Nyanmiɛn man nzue'n i kpukpuwa b'ɔ ti flɔlɔ'n ɔ yi nyanmiɛn ble'n. Kpɛkuun ɔ man nyanmiɛn ble'n nin nyanmiɛn'n i sin b'ɔ kpa'n, be bo sanndi lika'n nun sɛsɛsɛ.

¹² Ɔ yo man be kpɛ bé wun be wlan sin. Yɛ be yo like kwlaa nga Nyanmiɛn waan be yo'n.

¹³ Blɛ'n wie ɔ fa tu sran'm be fɔ, blɛ'n wie kusu ɔ fa yo be ye.

*

¹⁴ Zɔb, sie ɔ su tie. Bu Nyanmiɛn i abonuan sa'm be akunndan.

¹⁵ ?Kɛlɛ a si kɛ Nyanmiɛn yo b'ɔ fa yo sa sɔ mun-ɔn? ?A si kɛ ɔ yo bɔ nyanmiɛn ble'n ɔ kpa sin'n?

¹⁶ ?A si kɛ ɔ yo bɔ nyanmiɛn ble'n ɔ sende nglo lɔ'n? I ngwlɛlɛ b'ɔ lɛ-man sin'n yɛ ɔ fa yo abonuan sa kɛ nga sa mun-ɔn.

¹⁷ ?Wɔ bɔ mɛn'n i ngua lɔ aunngban'n kwla fita-man nan ɔ wun tralɛ'n ɔ'a lo fiaan,

¹⁸ kɛ Nyanmiɛn ɔ ´yi nglo lɔ lika'n a ukɛli i? Ɔ yoli i kekleke kɛ niannun bɔ b'a fa wlɛ i blalɛ wie nun'n sa.

*

¹⁹ Kle e ndɛ ng'ɔ fata kɛ e kan kle i'n. Afin e wo e liɛ ble'n nun, e ndɛ liɛ bɔ e kan'n ɔ tɔtɔ nun.

²⁰ ?Sɛ n ´ijɔ'n, ɔ fata kɛ be ko kan kle i kɛ n su wa ijɔ? ?Yɛ ɔ fata kɛ be se i kɛ sran kun seli sa?

²¹ Kpɛkuun bé ja nun lɛ'n, be wun-man lika b'ɔ kpaja'n i kpa kun. Wia'n ɔ'a fia lika munnduun'n i sin. Aunngban kun fin lɔ ɔ wa fuannin nyanmiɛn ble'n.

²² Yɛ lika weiin kpa kun fin nglo lɔ lika liɛ'n nun ɔ ba. Lika weiin ng'ɔ sin yia Nyanmiɛn'n ɔ yo sro o!

²³ Nyanmiɛn b'ɔ kwla like kwlaa yo'n, e kwla ju-mɛn i wun lɔ. I fanngan'n ɔ ti dan. Ɔ yo sa i nuan su weiin weiin kpa. Ɔ tɛ-man sran fi su.

²⁴ Ɔ man i ti yɛ ɔ fata kɛ klɔ sran'm bé nyin yi i nin-ɔn. Be nga be bu bé wun kɛ be ti akunndanfuɛ'n, ɔ nian-man be lɔ bɔ kaan sa .