Zɔb I Nyrɛnnɛn Wunlɛ 36 - NYANMIƐN NDƐ'N 1998

Elii kan wafa nga Nyanmiɛn fa kle sran like'n i ndɛ

¹ Elii kɛnnin i ekun kɛ:

² Jran kaan man n kle wɔ like. N tɛ kan Nyanmiɛn i ti ndɛ.

³ Sa nga n si i'n ɔ ti dan. N fa yi min yifuɛ'n i ndɛ fɛ'n i nglo.

⁴ Ndɛ nga n kan'n, ato kaan sa nun-man nun. Min bɔ n wo ɔ nyrun yɛ'n, n ti sa sifuɛ dan kpa.

⁵ Nyanmiɛn ɔ kwla dan kpa, ɔ yi-man sran blo. Ɔ kwla dan, afin i ngwlɛlɛ b'ɔ si i'n, ɔ ti dan.

⁶ Ɔ man-man sran ng'ɔ bu-man Nyanmiɛn like fi'n i nguan nyanman tɛnndɛn. Ɔ di yalɛfuɛ'm be jɔlɛ'n kpa.

⁷ Ɔ yi-mɛn i nyin sran kpa'm be su. Ɔ sie famiɛn mun famiɛn bia'n su. Ɔ man be taka, kpɛkuun i sɔ'n ti be tu bé wun.

*

⁸ B'a kaci kɛ kanga mun sa. Sɛ awlaboɛ'n ti sran'n, wuun n ´se kɛ i nyanman'n ɔ ci be.

⁹ Nyanmiɛn ´yo i sɔ nan b'a wun sa nga be yoli'n. Be fɔnlɛ'n yɛlɛ bé wun tulɛ'n.

¹⁰ Ɔ kle be ngwlɛlɛ, kɛ ɔ ´yo nan b'a nian bé wun'n ti. Ɔ se be kɛ be yaci be nzuɛn tɛ'n.

¹¹ Sɛ be kplin su nan be kan be wun ase'n, be ´di ye lele be nguan'n ɔ ´fa wie.

¹² Sɛ be waan be kplin-man su'n be ´fa tokofi be ´kun be. Be ´ka be sinnzin'n nun be ´wu.

¹³ Be nga be bu-man Nyanmiɛn like fi'n, be fa ya i wun. Kɛ b'a yo bɔ ɔ'a ci be'n, be sun flɛ-mɛn i .

¹⁴ Kpɛkuun b'a kpɛ kpo b'a wu be gbanflɛn'n nun kɛ tekle bofuɛ'm be fa wu'n sa.

¹⁵ Yalɛ yɛ Nyanmiɛn fa de yalɛfuɛ nin-ɔn. Ɔ fa sa yi i su fa kan ndɛ kle i.

¹⁶ Laa Nyanmiɛn ɔ yili wɔ awlaboɛ'n nun fiteli. Ɔ man a dili alaje, yɛ ɔ mannin wɔ aliɛ kpakpa a dili.

¹⁷ Siɛn'n sran nga be bu-man Nyanmiɛn like fi'n be jɔlɛ dilɛ kunngba i akunndan yɛ a bu-ɔ. Ɔ jɔlɛ dilɛ'n nin ɔ fɔ bulɛ'n b'a tɔ ɔ su.

¹⁸ Nán ya'n tra su nan saci Nyanmiɛn i dunman. Nán man adi ninnge'm be mlin wɔ.

¹⁹ ?Kpanlɛ bɔ a kpan yɛ man a fin nyrɛnnɛn nun fite-ɔ? ?Annzɛ kusu ɔ́ nyin bɔ a kplin'n ti-ɔ?

²⁰ Nán bu i akunndan kɛ kɔnguɛ kunngba nun'n, asiɛ'n su sran'm be kwlaa be wie wu.

²¹ Nian ɔ wun kpa! Nán fa ɔ wun man sa tɛ'n, afin a klo i li tra awlaboɛ'n.

Nyanmiɛn i kwlalɛ b'ɔ kwla'n wo like kwlaa ti su

²² Nyanmiɛn i kwlalɛ b'ɔ kwla'n wo like kwlaa ti su. ?Wan yɛ ɔ si like kle kɛ i sa-a?

²³ ?Wan cɛ yɛ ɔ lɛ atin kle Nyanmiɛn i ajalɛ ng'ɔ ti b'ɔ tu nin-ɔn? ?Wan cɛ yɛ ɔ lɛ atin se i kɛ: «Sa nga a yo i yɛ'n ɔ ti tɛ-ɔ?»

²⁴ Nán ɔ́ wla fi i sa nuan ninnge'm be manmanlɛ'n. I sa nuan ninnge sɔ mun'n, sran kwlaa fa to jue.

²⁵ Be yo sran kwlaa i klanman. Be jran mmua lɔ yɛ be nian be-ɔ.

*

²⁶ Nanwlɛ Nyanmiɛn ti dan lele tratra su, sran kwla wun-mɛn i sin. Be kɛ i afuɛ nin-ɔn, ɔ yo-man ye .

²⁷ Ɔ man kpukpuwa'n ɔ jaso jenvie'n i nyin su, kpɛkuun kpukpuwa sɔ'n ɔ kaci nzue.

²⁸ Kpɛkuun nzue'n ɔ fin nyanmiɛn ble'n nun ɔ tɔ man sran'm be kwlaa.

²⁹ ?Wan yɛ ɔ kwla wun nyanmiɛn ble'n i siesielɛ i wafa-a? ?Wan yɛ ɔ kwla wun nyanmiɛn b'ɔ bo nun'n i wlɛ-ɔ?

³⁰ Nian, ɔ man nyanmiɛn'n ɔ kpa sin ɔ bo sin yiɛ i bɔbɔ. I yɛ ɔ katali jenvie'n i bo lɔ'n su-ɔ.

³¹ Kɛ ɔ tɔ nzue'n, ɔ man sran'm be nyan nguan. Ɔ man be aliɛ kpanngban be di.

³² Nyanmiɛn'n i sin b'ɔ kpa'n, ɔ fa trɛ i sa nun, yɛ ɔ kle i kɔwlɛ.

³³ Kɛ nyanmiɛn'n ɔ ko bo nun'n, wuun nzue'n yɛ ɔ ´ba lɛ-ɔ. Nnɛn nga be kankan be mun bɔbɔ be si kɛ ɔ su ba.