Zɔb I Nyrɛnnɛn Wunlɛ 34 - NYANMIƐN NDƐ'N 1998

Elii waan Nyanmiɛn yo-man sa ng'ɔ ti-mɛn i nuan su'n

¹ Elii kannin ndɛ ekun, i waan:

² Ngwlɛlɛfuɛ mun, amun `tie ndɛ bɔ n kan'n. Sa sifuɛ mun, amun `sie bé su.

³ Bé su'n yɛ man be ti sa-a. Be taaman'n kusu yɛ man be wun aliɛ'n i fɛ-ɔ.

⁴ E kusu, amun man e `bu akunndan, nan e `wun nga b'ɔ ti i su'n nin ng'ɔ ti kpa'n.

*

⁵ Zɔb waan: «N ti sɛsɛ. Nyanmiɛn su bu min fɔ ngbɛn.

⁶ Ɔ bu min ndɛ kwlɛ. M'an yo-man like fi kpɛkuun ɔ'a fa tukpacɛ b'ɔ lɛ-man ayre'n ɔ'a yi min su.»

⁷ ?Sran onin cɛ yɛ i wafa'n ti kɛ Zɔb liɛ'n sa-a? Ɔ ´di jɔlɛ tɛ sa-a, ɔ waan nzue yɛ ɔ su nɔn-ɔn.

⁸ Ɔ nin sa tɛ yofuɛ mun yɛ be san nun-ɔn. Ɔ nin sran nga be bu-man Nyanmiɛn like fi mun yɛ be nanti-ɔ.

⁹ Afin i waan sran i wla b'ɔ fa gua Nyanmiɛn su'n, ɔ yo-man sa fi ye.

*

¹⁰ Amun bɔ amun wun sa wlɛ'n, amun `tie nga n kan'n. Klunwi yolɛ'n nin ndɛ kwlɛ bulɛ'n, be ti-man Nyanmiɛn i nzuɛn mlɔnmlɔn.

¹¹ Sa nga sran yo'n i nuan akatua yɛ ɔ fa mɛn i-ɔ. I nantilɛ'n su yɛ ɔ nian fa mɛn i ninnge mun-ɔn.

¹² Nyanmiɛn yo-man sa tɛ. Nyanmiɛn b'ɔ kwla like kwlaa yo'n, ɔ bu-man ndɛ kwlɛ.

¹³ ?I kpa'n, wan yɛ ɔ fali asiɛ'n mɛnnin i kɛ ɔ sie-ɔ? ?Wan yɛ ɔ fali mɛn wunmuan'n mɛnnin i kɛ ɔ nian su-ɔ?

¹⁴ Sɛ i waan ɔ ´bu i bɔbɔ i ngunmin i wun akunndan'n, yɛ sɛ i waan ɔ ´yi nguan ng'ɔ fa wlali ninnge'm be nun'n,

¹⁵ wuun sran nin nnɛn'm be kwlakwla be ´ka lɛ be ´wu kpɛ kunngba, wuun sran'm be ´sa bé sin ´kaci fa .

*

¹⁶ Zɔb, sɛ a wun sa wlɛ'n, wuun sie ɔ́ su kpa. Tie ndɛ bɔ n kan'n.

¹⁷ ?Sran ng'ɔ klo-man nanwlɛ dilɛ mlɔnmlɔn'n, ɔ sie mɛn-ɔn ɔ yo ye? ?Kɛ be se sɔ'n ti'n, a ´bu sran b'ɔ ti sran kpa dan'n i fɔ?

¹⁸ I kunngba yɛ ɔ kwla se famiɛn kun kɛ ɔ ti finfinfuɛ-ɔ, yɛ i kunngba yɛ ɔ kwla se wlengbifuɛ kun kɛ ɔ ti sran kunfuɛ-ɔ.

¹⁹ I liɛ'n, ɔ sa-man famiɛn i awlo lɔ sran dandan'm be nyan. Ɔ bu-man sikafuɛ'm be sran tra-man yalɛfuɛ mun. Afin i yɛ ɔ yili be kwlakwla-a.

²⁰ Kɔnguɛ a ´nian-an, b'a wu. Sran'm be jaso kpɛnngbɛn'm bé wun, kpɛkuun kpɛnngbɛn sɔ'm b'a wu. Sran b'ɔ kwla'n i kunlɛ'n ɔ ti sɔ fuɛɛ!

²¹ Nyanmiɛn i nyin ta atin nga sran'm be fa'n su. Ɔ wun ajalɛ kwlaa nga be tu'n .

²² Kannzɛ aosin'n dun sɛ, sɛ lika'n ti tuun sɛ, sɛ sa tɛ yofuɛ'm be fia nun'n, ɔ wun be.

*

²³ Nyanmiɛn flɛ-man sran usɛ-usɛ-mɛn i kosan lele kwlaa nan ɔ'a di i jɔlɛ.

²⁴ Ɔ usa-usa-man lele nan ɔ'a yi be bɔ be kwla'n be ase, nan ɔ'a fa sran uflɛ ɔ'a sie be osu.

²⁵ Afin ɔ si sa nga be yo'n. Ɔ yi be ase, ɔ nunkun be kɔnguɛ kunngba'n nun.

²⁶ Ɔ bo be nzra nun kɛ sran kunfuɛ mun sa.

²⁷ Yɛlɛ kɛ be kacili bé sin be sili i. Be waan be fɛ-mɛn i ndɛ'm be su.

²⁸ Be yoli man afɛfuɛ mun nin yalɛfuɛ'm be kpan flɛli Nyanmiɛn. Nyanmiɛn kusu tili be aunnvuɛ kpanlɛ'n .

*

²⁹ ?I kusu, sɛ Nyanmiɛn waan ɔ yo-man like fi'n, wan yɛ ɔ kwla bu i fɔ-ɔ? ?Sɛ i waan ɔ su fia'n, wan yɛ ɔ kwla wun i-ɔ? Ɔ nian nvle wunmuan nin klɔ sran'm be su.

³⁰ Ɔ klo-man kɛ sran b'ɔ bu-mɛn i like fi'n, ɔ `tran famiɛn bia'n su nan ɔ `sua nvle'n i wun aya.

³¹ Sɛ wienun-ɔn, sran wie se Nyanmiɛn kɛ: «M'an sua min fɔnlɛ'n i su afɛ'n ɔ'a wie, n yo-man sa tɛ kun.

³² Kle min sa tɛ nga n yoli bɔ m'an wun-mɛn i'n, i liɛ'n n su yo-mɛn i kun.»

³³ ?Nyanmiɛn ɔ ´bu i sɔ sran'n i fɔ? Wɔ bɔ a kan sran'm bé wun ndɛ'n, tɛ su man e nian! Afin wɔ yɛ ndɛ'n ɔ o ɔ́ sa nun-ɔn, nán min-ɔn. Nga a bu i akunndan'n, kan.

*

³⁴ Be nga be si ngwlɛlɛ'n, nin akunndanfuɛ mun bɔ be tili min ndɛ'n be se kɛ:

³⁵ «Zɔb wun-man ndɛ kpa nga i bɔbɔ su kɛn i lɛ'n i wlɛ. I ijɔwa nun'n, be wun i kɛ ɔ wun-man sa wlɛ.

³⁶ Kɛ bɔ i ijɔwa'n ɔ ti kɛ sa tɛ yofuɛ'm be liɛ'n sa'n ti'n, ɔ fata kɛ ɔ wun nyrɛnnɛn ju i juwlɛ.

³⁷ Ɔ fɔnnin, kpɛkuun ɔ su fa nyin kekle uka su, ɔ man ɔ kan ndɛ kpanngban wɔ Nyanmiɛn. I sɔ'n ti e bɔbɔ kpa'n, e kwla lafi-mɛn i su kpa.»