Zɔb I Nyrɛnnɛn Wunlɛ 30 - NYANMIƐN NDƐ'N 1998

Zɔb i ndɛ kasiɛn'n: Zɔb waan akɔluman kanngan'm be di i wun tɔ

¹ Sanngɛ siɛn'n, akɔluman kanngan'm be srisri min. Laa'n, n fa bé si mun n wlɛ i alua nga be nian min bua'm be su'n be nun bɔbɔ-ɔ ɔ yo-man ye.

² Afin be wunmiɛn'n ɔ ju-man lika fi. Be ti sɔ flɛkpɛɛ.

³ Yalɛ'n nin awe'n ɔ'a wiewie be sa! Aawlɛ flɛnnɛn'n nun yɛ be wlan be kunndɛ like be di-ɔ. Lika sɔ nun lɔ'n, nyrɛnnɛn nin afɛ ngunmin yɛ ɔ o lɔ-ɔ.

⁴ Susrɛ'm bé wun lɛ ijre'n yɛ be ko tu-ɔ. Genɛ bo olui'n yɛ ɔ ti be aliɛ-ɔ.

⁵ Be oto be kɛ awiefuɛ sa. Be fuan be sran'm be afiɛn.

⁶ Be kunndɛ kongo'm bé nun kunman mun, annzɛ asiɛ ngbɛn wie nun kunman mun, annzɛ yɛbuɛ klun kunman mun, yɛ be tran nun-ɔn.

⁷ Be ti be kpanlɛ susrɛ'm bé bo. Be lala owie-owie'm bé nun.

⁸ Wlakafuɛ sɔ'm b'a sɔn-man aɔwi. Be fa nyantiaan be fuan be mɛn'n nun.

*

⁹ Be mma mun yɛ ndɛ be su fa min ´kpɛ jue yɛ, yɛ be su fa min ´kan bé ndɛ su yɛ.

¹⁰ Be fian min crulu, kpɛkuun be yɛ be ´kɔ lɛ-ɔ. Be ´ti be nuan nzue ta min nyrun'n nun-ɔn, be sisi-man bé bo.

¹¹ Kɛ bɔ Nyanmiɛn ɔ'a bo min'n, bɔ ɔ'a yo min finfin'n, sa fi tra-man be nun kun, like nga be waan be ´yo min'n, yɛ be yo-ɔ.

¹² Finfinfuɛ sɔ'm be jaso be bu min fɔ. Be fa be ja wla mín ja nun nan n fin ase. Be kpɛ min wun atin, be waan be ´yo min tɛtɛ.

¹³ Be tannin atin nga n ko fa nan n ko ɔ fialɛ'n i ngba. Kɛ be ko yo nan n ko mlin'n, yɛ be kwlaa be kunndɛ-ɔ. Be wie fi se-man kɛ be `ukɛ i.

¹⁴ Be ´ba sa-a, ɔ waan be fin klɔ'n i wun talɛ'n i toklo dan wie nun yɛ be ba-a, ɔ waan be fin talɛ sɔ'n i buebue'n i bo yɛ be fite-ɔ.

*

¹⁵ Sa nga be yo sro'n b'a tu bé nyin b'a wɔ min. Min nyrun bɔ n lɛ i'n, ɔ'a sin kɛ aunngban wie yɛ ɔ'a fitɛ i ɔ'a ɔ sa. Ye nga n dili'n, ɔ'a sin kɛ nyanmiɛn ble'n sa.

¹⁶ Siɛn'n, min anwlɛn'n ɔ'a kpɔtɔ min klun. Nyrɛnnɛn'n ɔ'a tɔ min su sa kplu.

¹⁷ Kɔnguɛ'n, min wunnɛn'n ɔ yo min ya sa fiaan kpɛn min owie'n nun. I ya'n ti n nyan-man wunmiɛn dewlɛ.

¹⁸ Nyanmiɛn ɔ'a tra min tralɛ'n b'ɔ o min wun'n fii! Ɔ'a mian min kɛ min tralɛ'n i kɔmin'n nun yɛ ɔ'a mian mín sa.

¹⁹ Ɔ'a fa min ɔ'a yi i nnɔtiɛ'n nun. M'an yo kɛ ndutre annzɛ nzuɛn sa.

*

²⁰ Min Nyanmiɛn, n kpan flɛ wɔ-ɔ, a tɛ-man min su. N jin wɔ nyrun lɛ, sanngɛ a nian min sɔ saa!

²¹ A yo kɛ a su wa kun min sa. A fa ɔ wunmiɛn'n kwlaa a jin min su a kle min nyrɛnnɛn sa cɔcɔcɔ.

²² A fa wɔ aunngban'n a kpalo min kɔ. Aunngban dan'n ɔ kpalo min kɔ wa kɔ wa.

²³ N si jrɛin kɛ wie'n i sin yɛ a nin min kɔ-ɔ. Sran'm be kwlaa be kɔwlɛ lika'n nun lɔ yɛ a fa min kɔ-ɔ.

²⁴ ?Sran ng'ɔ su wa wu'n, sɛ ɔ fɛ i sa flɛ sran-an ɔ yo-man ye? ?Sɛ be o nyrɛnnɛn nun nan be kpan kɛ: «Be de min o» ɔ yo-man ye?

²⁵ ?Sran nga sa tɛ su ju i su'n, nán min yɛ n sun i ti nin-ɔn? ?Kɛ n wun be bɔ be ti yalɛfuɛ'n, nán min yɛ min wla bo be ti nin-ɔn?

²⁶ N sunnzun kɛ n su wa di ye, kpɛkuun sa yɛ ɔ'a nyan min-ɔn. N sunnzun kɛ min nyrun su wa yo weiin, kpɛkuun aosin yɛ ɔ'a dun min-ɔn.

*

²⁷ Kɛ ɔ fin cɛn bɔ blɛ kekle nga juli min su'n, min klun'n yaci-man min titilɛ.

²⁸ M'an dun ble tuun, sanngɛ nán wia'n ti-ɔ. N jaso nzra nun n kpankpan.

²⁹ M'an kaci nsoso'm be niaan. M'an kaci klɔnsoklo'm be wiengu.

³⁰ Min wunnɛn kplo'n ɔ'a dun min wun tuun. Jɛkuajo'n wo min wun, min wunnɛn trɔ fiaan.

³¹ Sɛ jue mun yɛ m bo be min jru'n i su siɛn nin-ɔn. Min blo'n i nɛn'n ɔ ti kɛ be nga be sun'n be liɛ'n sa.