Zɔb I Nyrɛnnɛn Wunlɛ 3 - NYANMIƐN NDƐ'N 1998

ZƆB NIN I JANVUƐ NSAN'M BE NDƐ BƆ BE KANNIN'N Zɔb i kokolɛ b'ɔ kokoli'n, i waan: ?Nguan nun tranlɛ fɛ yɛlɛ nga?

¹ Kɛ be o lɛ sɔ'n, kpɛkuun Zɔb boli cɛn'n bɔ be wuli i nun'n i sannzan.

² I ndɛ ng'ɔ kannin'n yɛ:

³ Cɛn nga bɔ be wuli min nun'n, ɔ ka min ngunmin-ɔn, nán be kɛ i be wla cɛn'm be nun kun! Yɛ kɔnguɛ nga be wunnzɛli min nun'n, man i kusu ɔ yo sɔ wie.

⁴ Man cɛn sɔ'n ɔ kaci aosin. Kɛ Nyanmiɛn o nglo lɔ'n, nán ɔ buɛ i ndɛ nun kun. Yɛ nán ɔ kpaja kun!

⁵ Man aosin tritri kpa'n ɔ di i sɔ cɛn liɛ'n, man wie'n i aosin tuun'n ɔ di i wie, yɛ man nyanmiɛn ble'n ɔ kɛtɛ i su. Sɛ ɔ ti sran'n, wuun n ´se kɛ man sa kekleekle'm be tɔ i su yɛ be `kun i srɛ.

⁶ Kɔnguɛ sɔ'n, man aosin'n ɔ fɛ i. Sɛ ɔ ti sran'n, wuun n ´se kɛ nán man ɔ nyan ye le, afuɛ'n i cɛn'm be afiɛn. Nán man be kɛ i wla anglo'm be cɛn'm be nun.

⁷ Man kɔnguɛ kun sɔ'n i kusu ɔ yo kɛ bla klun kpanfuɛ sa, nán be kpan aklunjuɛ kpanlɛ fi cɛn sɔ'n nun!

⁸ Man be bɔ be bo cɛn'm be sannzan, man be nga be tinnge Leviatan'n , be bo cɛn sɔ'n i sannzan!

⁹ Kɛ i blɛ liɛ'n ko ju'n, nán man awɛ nzraama'n ɔ fite. Man ɔ minndɛ lika weiin lele ngbɛn, nán man ɔ wun nglɛmun lika'n b'ɔ kpaja'n!

¹⁰ Afin ɔ'a saci-man kuɛ nga n trannin nun'n, ɔ man m'an wun nyrɛnnɛn kɛ nga sa.

*

¹¹ Ɔo! ?Ɔ yo sɛ ti yɛ man m'an wu-man mín nin klun-ɔn? ?Ɔ yo sɛ ti yɛ man kɛ be wuli min cɛ'n m'an ka-man abialiɛ-ɔ?

¹² ?Ɔ yo sɛ ti yɛ man n nyannin sran juli min-ɔn? ?Ɔ yo sɛ ti yɛ man n nyannin nyɔnflɛn n nɔnnin-ɔn?

¹³ Sɛ ɔ'a yo-man sɔ'n, wuun kɛ e ´se yɛ'n n nun-man min ndia nun lɔ fɔun! ?Wuun n la-man lɔ diin cɛ?

¹⁴ E nin famiɛn mun nin mɛn'n nun sran dandan mun bɔ be bɔbɔ be kplan be asieliɛ dandan'm be sie'n, wuun e nin be y'a la-man ndia'n nun diin!

¹⁵ E nin famiɛn i awlo lɔ sran dandan mun nga be lɛ sika ɔkwlɛ, bɔ jɛtɛ ufue'n ɔ'a yi bé sua mun'n, wuun e nin be y'a la-man ndia'n nun diin!

¹⁶ Annzɛ kusu wuun n nun-man lɛ, wuun n yoli kɛ ba bɔ be kpɔli i'n sa, wuun n yoli kɛ ba bɔ ɔ'a wun-man wia'n i wun'n sa.

¹⁷ Asieliɛ'n nun lɔ liɛ'n, sran nga be bu-man Nyanmiɛn like fi'n, be keje-man bé wun kun. Be nga b'a fɛ bɔ be lɛ-man wunmiɛn kun'n, be la lɔ diin.

¹⁸ Lɔ liɛ'n, bisuafuɛ'm bé wun ti be fɔun! Be lɛ-man sunianfuɛ kpankpan-man be su kun.

¹⁹ Sran dandan mun nin sran nga be lɛ-man nyrun'n, be kwlaa be ti kun lɔ. Kanga'm b'a nyan be ti be min'm bé sa nun.

*

²⁰ ?Ɔ yo sɛ ti yɛ Nyanmiɛn kplin su man be wu be bɔ be wun nyrɛnnɛn nin-ɔn? ?Ɔ yo sɛ ti yɛ ɔ kplin su man be wu be bɔ be nguan'n ɔ ti afɛ ngunmin nin-ɔn?

²¹ Be sɔfuɛ'm be kunndɛ wie'n sa lele ngbɛn, be konvi sɔ wie'n tra anyanbeun ninnge mun.

²² Sɛ be wu nan be nyan be ndia liɛ'n, be klun'n ɔ ´jɔ, bé wun ´blibli be.

²³ N wun-man kɔwlɛ, ɔ yo kɛ Nyanmiɛn ɔ'a sisi min wun awa sa.

²⁴ Kplinlɛ'n yɛ ɔ ti min aliɛ yɛ n di-ɔ. Yɛ min fɛfɛlɛ'n, ɔ ti kɛ nzue yɛ ɔ fin like nun ɔ su nyrɛn sa.

²⁵ Sa nga n sro i'n, kpɛkuun a ´nian-an ɔ'a ju min su. Like nga n sɛ i nyan'n, kpɛkuun ɔ'a nyan min.

²⁶ N tran diin-ɔn ɔ yo-man ye, n si-man like nga be flɛ i aunjuɛ'n, n tran ase n de wunmiɛn-ɔn ɔ yo-man ye. Min wla'n ɔ gua-man ase mlɔnmlɔn.