Zɔb I Nyrɛnnɛn Wunlɛ 29 - NYANMIƐN NDƐ'N 1998

Zɔb i nyin kpɛn i laa nun'n su

¹ Zɔb tɛli su ekun kɛ:

² Nanwlɛ, n klo kɛ n ´sin min osu laa'n nun. Laa sɔ nun'n, Nyanmiɛn nian min lika.

³ I kannin'n ɔ jue mín ti'n su. I kpajalɛ'n ɔ dun mmua min nyrun aosin'n nun.

⁴ I blɛ sɔ nun'n, wuun nzue tɛ o min nun kpa, wuun Nyanmiɛn nian min awlo'n su.

⁵ I blɛ sɔ nun'n, wuun Nyanmiɛn b'ɔ kwla like kwlaa yo'n nin min wo nun, wuun min mma'm be bo sin yia min.

⁶ I blɛ sɔ nun'n, be flɛ kɛ nɔnnɔn'n yɛ ɔ ti min nzue yɛ n fa wunnzin mín ja-a, yɛ be flɛ kɛ ngo'n fin yɛbuɛ nun sonji man min.

*

⁷ N kɔ klɔ'n i anuan'n nun lɔ, n ko tran kan be kan ndɛ lɛ'n.

⁸ Kɛ gbanflɛn'm be wun min'n, kpɛkuun b'a cuɛn bé wun. Kɛ sran kaklaakla nga bé ti ɔ'a bo je'n be wun min'n, be jaso jran nglo.

⁹ Famiɛn i awlo lɔ sran dandan nga be su kan ndɛ'n be jran, be fa bé sa sie bé nuan'n su.

¹⁰ Siefuɛ'm be nɛn'n ɔ kan ase, be kaci kɛ bobo mun sa.

*

¹¹ Sran kwlaa ng'ɔ ti ndɛ nga n kan'n, san mo yɛ ɔ yo min-ɔn. Be kwlaa nga be wun min'n, be klo min sa.

¹² Afin nyrɛnnɛnfuɛ nga i nuan to min'n, n de i. Yɛ aika ng'ɔ lɛ-man sran'n, kɛ n yo i sɔ wie-ɔ.

¹³ Kɛ sran'm be wa wu'n, be yra min nguan. Min ti man angboti bla'm be klun jɔ.

¹⁴ Sɛ n ´kwla se'n, ndɛ nanwlɛ dilɛ'n yɛ ɔ ti min tralɛ yɛ n wla-a. Min kondro'n nin min wlengbi kle'n yɛlɛ sa'n i nuan su yolɛ.

¹⁵ Anyansifuɛ'n i nyinma'n yɛlɛ min. Sran ng'ɔ kwla-man nanti'n, i ja'n yɛlɛ min.

¹⁶ Yalɛfuɛ'm bé si yɛlɛ min. Aofuɛ'm be ndɛ'n, min yɛ n kan-an.

¹⁷ Sɛ n ´kwla se'n, sran nga be bu-man Nyanmiɛn like fi'n, m ´bubu be je'n. Kɛ b'a tra be sran'n, yɛ m'an de i bé nuan nun.

*

¹⁸ I sɔ'n ti, min waan n ´wu m bɔbɔ min awlo'n nun. Kpɛkuun n ´sa min sin n ´nyan nguan ekun, yɛ n ´cɛ kpa.

¹⁹ N ´yo kɛ waka bɔ i bo ndin'n ɔ trɛ ju nzue ba'n nun, bɔ kɔnguɛ bɔlɛ'n ɔ guɛ i sama'n su'n sa.

²⁰ Min dunman'n ɔ yaci-man fulɛ le. N ´nyan wunmiɛn ekun kɛ ta bɔ b'a cuɛn bɔ be su wa to'n sa.

*

²¹ Laa sɔ nun'n, sɛ n ´ijɔ'n, be sie be su be minndɛ. Be tɔ bliin be tie afɔtuɛ ndɛ nga n kan'n.

²² Kɛ n ko ijɔ'n, be kan-man ndɛ fi kun. Min ndɛ'n ɔ gua be su kɛ bɔlɛ sa.

²³ Sran'm be minndɛ min kɛ be minndɛ nzue'n i tɔlɛ'n sa, kɛ munngun nun nzue dan bɔ be minndɛ i tɔlɛ'n sa.

²⁴ Be klun titi be, sanngɛ kpɛkuun be ´nian-an, srisrilɛ o mín nuan. Kɛ be wun min nyrun'n, ɔ cici bé wla.

²⁵ Min yɛ n ti be kpɛnngbɛn nin-ɔn, n kle be atin. Min nin be e tran kɛ famiɛn kun nin i sonja mun sa. Be nga be akunndan sanngan'n, min yɛ n fɔnvɔ be-ɔ.