Zɔb I Nyrɛnnɛn Wunlɛ 27 - NYANMIƐN NDƐ'N 1998

Zɔb i janvuɛ'm be su tɛlɛ kasiɛn b'ɔ tɛli'n: ?Sran b'ɔ yo sa tɛ'n, ɔ kpan flɛ Nyanmiɛn-ɔn ɔ yo ye?

¹ Zɔb tɛli su ekun kɛ:

² N kan Nyanmiɛn b'ɔ kwla like kwlaa yo'n, b'ɔ bu min lufle b'ɔ wla min klunngbɔ'n.

³ Kɛ Nyanmiɛn i nguan ng'ɔ fa wlali min nun'n ɔ tɛ o min nun'n, kɛ n tɛ de wunmiɛn'n,

⁴ sa ng'ɔ ti-man su'n, ɔ su fin-man mín nuan fite-man le. N su kan-man gblɛgblɛ ndɛ le.

⁵ N su se-man kɛ amun ndɛ yo fɛ le. N su yaci-man kɛ: «M'an yo-man sa'n» i selɛ le nan m'an fa wu.

⁶ N liɛ nga n si i'n yɛlɛ kɛ n ti kpa, n lɛ-mɛn i kaciwlɛ. Kɛ n nian wafa nga n fa nanti'n min anwlɛn'n bu-man min fɔ.

*

⁷ Sa ng'ɔ ti b'ɔ ju sran ng'ɔ bu-man Nyanmiɛn like fi'n i su'n, min kpɔfuɛ'n i su'n yɛ ɔ fata kɛ ɔ ju-ɔ. Sa ng'ɔ ti b'ɔ ju kakajefuɛ'n i su'n, sran ng'ɔ klo-man min'n i su yɛ ɔ fata kɛ ɔ ju-ɔ.

⁸ ?Kɛ Nyanmiɛn kpɛ sran ng'ɔ bu-mɛn i like'n i nguan'n i sin'n, nguɛ cɛ yɛ ɔ fɛ i wla'n gua su-ɔ?

⁹ ?Kɛ sa ju i su'n b'ɔ kpan'n, Nyanmiɛn bua nun?

¹⁰ ?I kpa'n, Nyanmiɛn i wun yo sran sɔ'n i fɛ? ?Ɔ nin Nyanmiɛn be ijɔ?

¹¹ Like nga Nyanmiɛn yo'n, n wa yiyi nun n kle amun. N fa-man Nyanmiɛn b'ɔ kwla like kwlaa yo'n i ninnge mun n fia-man amun wun.

¹² Amun kwlakwla amun wun i sɔ'n i wlɛ jrɛiin. ?Yɛ wuun ɔ yo sɛ ti yɛ amun ndɛ'm be ti vɛɛ sɔ-ɔ?

Anyanbeun bɔ i wielɛ yo-man ya'n

¹³ Sa nga Nyanmiɛn b'ɔ kwla like kwlaa yo'n ɔ sie i kɛ ɔ `ju sran ng'ɔ bu-mɛn i like fi'n, b'ɔ ti wlɛfuɛ'n i su'n yɛ:

¹⁴ i mma'm be ´sɔn-ɔn be ´sɔn ngbɛn, alɛ'n ´di be kwlakwla. Be su nyan-man aliɛ b'ɔ ´yi be ku-ɔ.

¹⁵ Be nga be ka lɛ'n, wie'n ɔ ´kun be, yɛ be angboti'm be su kwla-man be sun.

¹⁶ Sɛ be tian sika nuan kɛ ndutre sa'n, sɛ be tian tralɛ nuan kɛ ufa sa'n,

¹⁷ sran kpa'n yɛ ɔ ´wla tralɛ sɔ mun-ɔn. Sran nga ɔ'a yo-man sa'n, i liɛ yɛlɛ sika sɔ'n.

*

¹⁸ Sran sɔ'm be awlo nga be kplan'n, i sacilɛ yo-man ya. Ɔ ti kɛ kpata nga vinyi su nianfuɛ'm be kplan'n sa.

¹⁹ Kɛ be ´la'n, be ti anyanbeunfuɛ, sanngɛ i sɔ'n ɔ cɛ-man. Sɛ be wu'n, like fi nun-man lɛ kun.

²⁰ Sa sroesroe'm be fu be nun kɛ nzue b'ɔ su di lika'n sa. Aunngban dan'n man be su kɔnguɛ ɔ fa be kɔ.

²¹ Wia afiliɛ lɔ aunngban'n ɔ man be su kɔ, ɔ tu bé bo fa kɔ.

²² Nyanmiɛn si-man be aunnvuɛ, ɔ to bé wun ta mma. A ´nian-an, be su wanndi kɛ ɔ ´yo nan ta mma'n ɔ'a nyan-man be'n ti.

²³ Kɛ sran'm be wun i sɔ'n, i fɛ b'ɔ yo be'n ti, ɔ kle be ndɛ bolɛ, yɛ be bo feliman.