Zɔb I Nyrɛnnɛn Wunlɛ 24 - NYANMIƐN NDƐ'N 1998

Zɔb i Elifaz i su tɛlɛ'n i wie ekun yɛ: i waan Nyanmiɛn bua-man sa tɛ yofuɛ'm be sa tɛ nun

¹ ?Ɔ yo sɛ ti yɛ Nyanmiɛn b'ɔ kwla like kwlaa yo'n ɔ'a sie-man cɛn bɔ ɔ ´fa di i jɔlɛ nin-ɔn? ?Ɔ yo sɛ ti yɛ ɔ yi-man cɛn sɔ'n i nglo kle-man be bɔ be si i mun-ɔn?

² Sran nga be bu-man Nyanmiɛn nin i nuan ndɛ'n be like fi'n be tu be fie'm be awɛ'n kɔ i nyrun. Be wua sran'm be nnɛn mun, kpɛkuun be kankan be kɔ didilɛ.

³ Be fa aika'm be aflunmun'n kɔ. Be tra angboti bla'm be nannin'n be fa wla aowa.

⁴ Be fuan yalɛfuɛ mun atin'n nun. Be nga be o nyrɛnnɛn nun'n be fite-ɔ ɔ yo-man ye, san fialɛ yɛ be fia-a.

⁵ Be ti be liɛ kɛ blo aflunmun nga be o aawlɛ flɛnnɛn'n nun'n sa: nglɛmun ndɛ be kɔ junman yɛ ijre'n nun yɛ be wlan sa daan be kunndɛ like diwa kan be man be mma mun-ɔn.

*

⁶ Fie'm be su yɛ be kpɛ ijre onga'n be man be nnɛn mun-ɔn. Be ti be nga be bu-man Nyanmiɛn like fi'n be vinyi'n mma'n.

⁷ Be la be wun kplɛn, nán kondro kan-an. Be lɛ-man like be kata-man bé wun, be la ayrɛ flɔlɔ'n nun.

⁸ Oka'm be su nzue ng'ɔ ´to'n, ɔ bo be. Be nyan-man fiawlɛ, i sɔ'n ti be fa bé sa'n to bla yɛbuɛ'n.

⁹ Be kpɛ aika ba'n i nyɔnflɛn kekle nun. Be fa yalɛfuɛ'n i sa nun ninnge'n be wla aowa.

¹⁰ Be ´wlan-an bé wun kplɛn, nán tralɛ kan-an. Awe kun be, sanngɛ b'a fa ble trɔ'n b'a jin be ti su.

¹¹ Be o ngo yiwlɛ'm be nun be ´yi ngo, annzɛ be o nzan yiwlɛ'm be nun be ´yi nzan, sanngɛ be nyan-man kaan sa kan-man bé nuan.

*

¹² Sran'm be klun jɔ-man, be ijɔ klɔ'n nun be sin. Be nga be yoli be sa'n be kpan. Sanngɛ Nyanmiɛn bua-man sa tɛtɛ sɔ'm be nun.

¹³ Sran wie'm be ciliɛ yɛlɛ lika weiin'n. Kan lika weiin'n wo lɛ'n, be sin-man lɛ. Be fa-man atin weiin'n be su.

¹⁴ Kɛ aliɛ'n ɔ wa cɛn'n, kakaje'n ɔ jaso. Ɔ kun yalɛfuɛ'n annzɛ nyrɛnnɛnfuɛ'n. Kɛ aliɛ'n kɔ san'n, wuun ɔ'a kaci awiefuɛ.

¹⁵ Sran ng'ɔ kunndɛ sran'm bé yi mun'n, ɔ sa cɛiin ɔ minndɛ kɛ sɛnzɛ'n ɔ tɔ. I waan: «Sran fi su wun-man min.» Ɔ fa tannin kɛtɛ i nyrun.

¹⁶ Kɔnguɛ yɛ awiefuɛ'm be kpɛ sua'm be nun toklo nin-ɔn. Wia'n nun be nyin bé wun su anuan. Be si-man like nga be flɛ i lika weiin'n.

¹⁷ Kɛ lika'n ko cɛn'n, ɔ ti be nyrun kɛ be o aosin'n nun sa, afin aosin'n nun sa tɛtɛ yolɛ'n ɔ'a si bé wun.

*

¹⁸ Amun waan: Sran nga be bu-man Nyanmiɛn like fi'n be jran-man, be ti kɛ like fokofoko wie bɔ nzue'n ɔ kpalo i kɔ'n sa. Sannzan o be lika'n su. Be kwla fa-man kan vinyi o lɔ'n i atin'n kun.

¹⁹ Wie'n ɔ nunnun sa tɛ yofuɛ sɔ mun kɛ wia'n ɔ klo laglasi'n sa.

²⁰ Bla ng'ɔ wunnzɛli be'n i wla fi be. Kakaa mma'm be di be be klun jɔ. Sran fi wla kpɛn-man be su kun. Kɛ sa tɛ'n i agualiɛ'n ɔ ti sa: be bu i bo kɛ waka sa.

²¹ Bla nga i klun ti kpan'n, b'ɔ wu-man ba'n, be kle i yalɛ. Be yo-man angboti bla'm be kpa.

²² Nyanmiɛn man sran wlɛfuɛ sɔ'm be nguan tɛnndɛn. Kɛ be bu i kɛ be su tran-man nguan'n nun kun'n, a ´nian-an b'a jaso.

²³ Ɔ yo man be tran fɔuun be klun ti-man be. Kan kwlaa nga be ´kɔ lɛ'n, ɔ nian be su.

²⁴ Be nyan nyrun kan, kpɛkuun b'a jaso lɛ. Kɛ be liɛ ko wie'n, be tɔ kɛ sran kun nga mun sa. Be ti kɛ ble'n i ti nun bɔ be kpɛ'n sa.

²⁵ ?Nán kɛ ɔ ti sɔ-ɔ? ?Nga n ´kɛn lɛ'n, wan yɛ i waan ato-ɔ? ?Wan yɛ ɔ kwla se kɛ ndɛ ngbɛn yɛ n kannin-ɔn?