Zɔb I Nyrɛnnɛn Wunlɛ 23 - NYANMIƐN NDƐ'N 1998

Zɔb i Elifaz i su tɛlɛ: i waan Nyanmiɛn klo-man kɛ ɔ nin min koko yalɛ

¹ Zɔb tɛli su kɛ:

² Ndɛkɛn liɛ'n, n klun ya nga n ´yi'n ɔ ti dan. N fia kplinlɛ bɔ n kplin su-ɔ, ɔ yo-man ye.

³ Ee! Sɛ n si kan n ko wun Nyanmiɛn'n, wuun n ´kɔ lele n ko to i kan ɔ tran lɔ'n.

⁴ Yɛ n ´fa min ndɛ'n n ´sie i nyrun, n ´fa mín nuan n wla nun n ´kan n guɛ i lɔ gɔ.

⁵ I liɛ'n, ndɛ ng'ɔ ´kan'n, n ´ti. Yɛ n ´wun ng'ɔ lɛ i b'ɔ ´kan kle min'n.

⁶ ?Ɔ ´niɛn i fanngan dan'n ti ɔ bu min fɔ? Cɛcɛ, ɔ su yo-mɛn i sɔ. N si kɛ ɔ ´sɔ min nun.

⁷ N ´kan min nuan su ndɛ'n n kle i, afin m'an yo-man sa. I yɛ ɔ ti min jɔlɛ difuɛ nin-ɔn. Ɔ su bu-man min fɔ mlɔnmlɔn.

*

⁸ Sanngɛ sɛ n kɔ wia afiliɛ lɔ'n, ɔ nun-man lɔ. Sɛ n kɔ wia atɔliɛ lɔ'n, n wun-mɛn i lɔ.

⁹ ?Sɛ ɔ su yo like wie nglo lɔ e? Min waan m'an n wɔ lɔ n nian. N ´ju lɔ-ɔ, ɔ nun-man lɔ. ?Sɛ ɔ fia ngua lɔ e? Min waan man n ju lɔ n nian. N ´ju lɔ-ɔ, ɔ nun-man lɔ.

¹⁰ Sanngɛ ɔ si min ajalɛ nga n tu'n. Sa nianlɛ ng'ɔ su sa min nian yɛ, n ´fin nun n ´fite sa cɛ kɛ b'a wla sika ɔkwlɛ sin nun b'a yi sa .

¹¹ Kan kwlaa ng'ɔ ´kɔ'n, min nin i-ɔ N fɛli i atin'n su seiin! M'an kpaci-man.

¹² I mmla kun nun-man lɛ bɔ m'an fa-man su-ɔ. I nuan nun ndɛ'm be yoli cinnjin min sa nun trali m bɔbɔ min klun sa'n.

*

¹³ ?Yɛ sɛ ɔ ko fa akunndan kun'n, be ´yo i sɛ yɛ ɔ ´kaci aniɛn-ɔn? Like ng'ɔ klo kɛ ɔ ´yo'n, yɛ ɔ yo-ɔ.

¹⁴ Nga ɔ'a sie kɛ ɔ ´fa yo min'n, ɔ ´yo. Sa sunman o i klun lɔ ekun.

¹⁵ I ti yɛ srɛ kun min i wun nin-ɔn. Kɛ m ´bu i akunndan n ´kɔ'n, wuun blɛ li yɛ b'a se n kɛ n `sro i-ɔ.

¹⁶ Nyanmiɛn ti man n ti-man sran waka-waka kun. Nyanmiɛn b'ɔ kwla like kwlaa yo'n, man srɛ'n ɔ'a kun min kpo!

¹⁷ Nán aosin dan'n i ti yɛ m muan min nuan nin-ɔn. Nán lika bɔ ɔ'a fa dun min su tuun'n i ti-ɔ.