Zɔb I Nyrɛnnɛn Wunlɛ 22 - NYANMIƐN NDƐ'N 1998

Elifaz i ndɛ nsan su b'ɔ kannin'n

¹ Yɛ Elifaz b'ɔ fin Teman'n ɔ tɛli i su kɛ:

² ?Sran kwla yo like kpa kun man Nyanmiɛn? Cɛcɛ, sɛ sran si ngwlɛlɛ nan ɔ yo sa kpa'n, ɔ yo mɛn i bɔbɔ wun.

³ ?Ɔ sɛsɛ bɔ a ti'n, ɔ kwla uka Nyanmiɛn? ?Ɔ jrɛin nga a ti'n, nguɛ yɛ ɔ nyɛn i nun-ɔn ?

⁴ ?Srolɛ bɔ a sro i'n ti yɛ ɔ tu wɔ fɔ-ɔ? ?I ti yɛ ɔ nin wɔ su kan-an?

⁵ Nanwlɛ, ɔ fɔnlɛ'n sɔnnin. Sa tɛtɛ nga a yo be'n, be ka be-ɔ ɔ yo-man ye.

*

⁶ A de ɔ wiengu'm be aowa ngbɛn. A de wie'm be wun kondro'n, be ka be wun kplɛn.

⁷ Sɛ nzue we kun sran-an, a mɛn-mɛn i nzue. Sɛ awe kun sran-an, a mɛn-mɛn i like diwa .

⁸ A yaci be bɔ be kwla'n be lɛ be fa lika'n. Yɛ tutrefuɛ mun yɛ be tran nun-ɔn.

⁹ A kankan angboti bla'm be bo be fa bé sa ngbɛn be kɔ. A kle aika'm be nyrɛnnɛn.

¹⁰ I sɔ'n ti yɛ ɔ́ wun aya nga b'a sua'n, ɔ sɔnnin nin-ɔn. I sɔ'n ti yɛ sa sroesroe'm b'a fu wɔ nun b'a tɔ ɔ su nin-ɔn.

¹¹ Aosin'n ɔ'a dun ɔ su, a wun-man ase. Nzue dan'n ɔ'a kata ɔ su kplu!

*

¹² Nyanmiɛn o nglo lɔ nyanmiɛn su lɔ. Nzraama'm be o nglo mmua lɔ.

¹³ I sɔ'n ti a se kɛ: «?Nyanmiɛn li nguɛ sa yɛ ɔ si i-ɔ? ?Ɔ di e jɔlɛ nyanmiɛn ble'n i bo wa-a ɔ yo ye?

¹⁴ Nyanmiɛn ble'n ɔ kɛtɛ i nyrun, ɔ wun-man wa. Kan ɔ wlan ju'n yɛlɛ nyanmiɛn'n su lɔ kluklu'n nun.»

¹⁵ ?Yoo! Sa tɛ yofuɛ'm be lalafuɛ atin'n, yɛ a fa yo ɔ liɛ-ɔ?

¹⁶ Be liɛ'n be wie cɛn'n ɔ ju-man wuun b'a wu. Be ti kɛ talɛ bɔ nzue'n ɔ yi, kpɛkuun ɔ su i bo yi i ase'n sa.

*

¹⁷ Be se Nyanmiɛn kɛ: «Fɛ i li sɔ'n kɔ lɔ. ?Nguɛ yɛ a kwla yo man ye-ɔ?»

¹⁸ Kusu wuun i yɛ ɔ mannin be ninnge ng'ɔ si bé sua'n nun nin-ɔn. Be jajalɛ nga be jaja'n, be bu-mɛn i akunndan.

¹⁹ Kɛ sran kpa'm be ´wun kɛ b'a tɔ'n, fɛ yɛ ɔ yo be-ɔ. Be bɔ b'a yo-man sa'n be sri be.

²⁰ Be se kɛ: «E kpɔfuɛ mun yɛ b'a tɔ yɛ. Sin'n ɔ'a di bé bo ninnge mun.»

*

²¹ Ɔ man `yo nan a nin Nyanmiɛn amun afiɛn'n sɛ, yɛ ɔ́ wun ´jɔ wɔ fɔuun. A ´sa ɔ́ sin a ´nyan muae ekun.

²² Fɛ i nuan ndɛ'n. Fa be sie .

²³ Sɛ a wa sa ɔ sin nan a nin Nyanmiɛn be nanti'n, ɔ ´yo man a ´jaso. Sa ng'ɔ ti-man su'n, nán kplin su man ɔ tran wɔ awlo'n nun.

²⁴ Yi ɔ sika ɔkwlɛ'n i ase ndutre'n nun. Ɔfir sika ɔkwlɛ'n, to guɛ i nzue ba'n nun yɛbuɛ'm be afiɛn.

²⁵ Yɛ Nyanmiɛn b'ɔ kwla like kwlaa yo'n ɔ yo kɛ ɔ sika ɔkwlɛ sa ɔ́ sa nun, yɛ ɔ ´yo kɛ jɛtɛ ufue sa kusu.

*

²⁶ Fa Nyanmiɛn b'ɔ kwla like kwlaa yo'n yo wɔ anwlɛn su like. Man ɔ́ nyin'n su nan niɛn i.

²⁷ Sɛ a srɛ i nan a jran su'n, ɔ ´tɛ wɔ su. Kpɛkuun like nga a kannin kɛ a ´yo mɛn i'n, wuun a su yo.

²⁸ I liɛ'n, sa kwlaa nga a gugu kɛ a ´yo'n, ɔ ´yo ye. Atin nga a nanti su'n, ɔ ´yo weiin!

²⁹ Nyanmiɛn man wun tufuɛ'm be like nga be siesie kɛ be ´yo'n, ɔ kpi ase. Sanngɛ ɔ uka be nga be kan bé wun ase'n.

³⁰ Ɔ de be nga b'a yo-man sa'n mun. Sɛ w'a yo-man sa tɛ'n, ɔ man a ´fite nun.