Zɔb I Nyrɛnnɛn Wunlɛ 21 - NYANMIƐN NDƐ'N 1998

Zɔb i Zɔfar i su tɛlɛ: Sran nga be bu-man Nyanmiɛn like fi'n, be lɛ muae

¹ Zɔb tɛli i su kɛ:

² Amun `sie amún su tie ndɛ nga n ´kan'n. Fɔnvɔlɛ nga amun ko fɔnvɔ min'n yɛ ɔ o lɛ-ɔ.

³ Amun `man min atin man n kan min ndɛ liɛ'n. Sɛ n kan'n, amun ko sri.

⁴ ?Sran yɛ n su yi n klun ya n ´kle i-ɔ, bɔ i ti yɛ n ´di amlin-ɔn?

⁵ Amun `nian min, man amún nuan'n ɔ bo amun wun. Amun `fa amún sa'n sie amún nuan'n su, afin amun su ijɔ-man kun.

⁶ Kɛ m bu sa ng'ɔ o min su'n i akunndan'n, kpɛkuun srɛ kun min. Yɛ n usu.

*

⁷ ?Ɔ yo sɛ ti yɛ sran nga be bu-man Nyanmiɛn like fi'n be nyin tɛ o su nin-ɔn? ?Ɔ yo sɛ ti yɛ be yo kpɛnngbɛn, kpɛkuun be wunmiɛn'n ɔ kɔ i nyrun nin-ɔn?

⁸ Bé bo mma'm be nin be o lɛ bɔ cɛ! Be anunman'm be kwlaa be nyin be nyrun.

⁹ Be awlo'n nun ti fɔun, srɛ kun-man be. Nyanmiɛn i ngble'n ɔ kan-man be wie mlɔnmlɔn.

¹⁰ Sɛ be nannin yasua'm be fu nannin bla mun'n, san be ´wunnzɛ. Nannin bla'm be kusu be wu be mma mun titi be kpɔ-man ba.

¹¹ Be mma'm be wanndi be kɔ be ba kɛ bua mun annzɛ boli mun sa, wuun be ´tu kpɛn.

¹² Be ´to jue'n, wuun be ´bo su klɛn nin jru'n, wuun be ´bo blo aklunjuɛ'n ti.

¹³ Kɛ be ko di ye sɔ'n lele ko wie'n, kpɛkuun be wu blɛlɛlɛ, be blɔlɔ kɔlɛ nun-ɔn.

*

¹⁴ Kusu wuun be seli Nyanmiɛn kɛ: «Fɛ i sɔ liɛ'n jaso lɛ! Y'a se-man kɛ a kle ye wɔ atin'n!

¹⁵ ?Wan li yɛ be flɛ i Nyanmiɛn b'ɔ kwla like kwlaa yo nin-ɔn, bɔ i ti yɛ e ko su i-ɔ? ?Sɛ e srɛ i'n, nguɛ yɛ e ´nyɛn i-ɔ?»

¹⁶ Sɛ sran nga be bu-man Nyanmiɛn like fi'n be di ye'n, be waan ɔ fin be bɔbɔ. Be jajalɛ nun'n, be bu-man Nyanmiɛn i akunndan.

¹⁷ ?Sanngɛ kɛ be o lɛ'n, a wun kɛ be nguan'n ɔ ka lɛ wie kɛ kannin b'ɔ nuan'n sa? ?Be ta yalɛ di? ?Nyanmiɛn fa be wun ya ɔ man be nzuɛn'n i nuan akatua ?

¹⁸ ?A wun i kɛ be ti kɛ ijre mma bɔ aunngban'n fitɛ i kɔ'n sa? ?Be ti kɛ ndutre bɔ seke'n fitɛ i kɔ'n sa?

*

¹⁹ Amun waan: «Sran ng'ɔ bu-man Nyanmiɛn like fi'n, Nyanmiɛn nin i mma mun be ´nyɛn i.» ?Nán i bɔbɔ'n yɛ ɔ fata kɛ Nyanmiɛn yo i sa nan ɔ `fɛ-ɔ?

²⁰ Ɔ fata kɛ i bɔbɔ wun nyrɛnnɛn b'ɔ ´tɔ i su'n nun, nan ɔ `wun kɛ Nyanmiɛn b'ɔ kwla like'n kwlaa yo'n i ya'n ɔ ti-ɔ:

²¹ ?Kɛ ɔ ko wu ko wie'n, sɛ i osu'n nunfuɛ'm be ´fɛ-ɔ, ɔ fɛtɛ i nzu?

²² ?Nán sran yɛ ɔ wa ´kle Nyanmiɛn ngwlɛlɛ-ɔ? I yɛ ɔ di anz'm be jɔlɛ-ɔ .

*

²³ Sran wie di ye'n lele like fi sɛnngɛn-mɛn i akunndan. Ɔ tran fɔun lele fa ju i wie cɛn.

²⁴ Ɔ cɛn lele i wunnɛn'n ti lui ngunmin. I owie'n nun ti i fɔuun!

²⁵ Wie kusu i nguan liɛ'n ti klunngbɔ ngunmin. Ɔ si-man like nga be flɛ i muae'n le yɛ ɔ wu-ɔ.

²⁶ Sanngɛ be wafa nnyɔn'n, be wla be ase. Kakaa mma'm be fɔ be su nyinmɔn nyinmɔn nyinmɔn.

²⁷ N si amun klun akunndan'n. Ndɛ nga amun wa kan nan ndɛ'n ɔ'a tɔ min su'n, n si.

²⁸ Amun usa kɛ: ?Sran nga be mian be wiengu mun fii'n, be sua'n wo nin? ?Sran nga be bu-man Nyanmiɛn like fi'n, be tranwlɛ'n wo nin?

*

²⁹ ?Amun nian usa-man be bɔ be wlan-wlan sin'n be sa le? ?Amun waan amun ´fia lalo nga be di'n i su?

³⁰ Kɛ nyrɛnnɛn'n ɔ ba'n, ɔ kpɛ sran ng'ɔ bu-man Nyanmiɛn like fi'n yaci. Kɛ Nyanmiɛn i ya cɛn'n ju'n, sa ju-man i su wie.

³¹ ?Yɛ wan cɛ yɛ ɔ ´jran i nyrun ɔ ´fa i nzuɛn tɛ'n ɔ kle i-ɔ? ?Wan yɛ ɔ ´tu i fɔ-ɔ?

³² Sɛ ɔ wu'n, be sie i. Ɔ lɛ i asieliɛ'n i su nianfuɛ.

³³ Sran nga be dun mmua i saka'n i nyrun'n be sɔnnin. Be nga be su i su'n, be ka be-ɔ ɔ yo-man ye. Fa nga be fa guɛ i su'n ɔ yo-man nɔnnin.

*

³⁴ Amun fɔnvɔlɛ nga amun waan amun ´fɔnvɔ min'n, nán i kpa'n wie-ɔ. Amun ndɛ'm be ti ato ngunmin.