Zɔb I Nyrɛnnɛn Wunlɛ 2 - NYANMIƐN NDƐ'N 1998

Zɔb i sa nianlɛ nnyɔn su'n

¹ Le kun Nyanmiɛn i anz'm be ɔli i nyrun, kpɛkuun Satan bali be afiɛn lɛ Anannganman nyrun lɛ wie.

² Anannganman usali Satan kɛ: «?A fin nin?» Satan tɛli Anannganman su kɛ: «N fin asiɛ'n su lɔ wlan-wlanlɛ kan.»

³ Anannganman usɛli i kɛ: «?A wun min sufuɛ Zɔb i wafa ng'ɔ fa ti'n? Asiɛ'n su lɔ sran fi nin i sɛ-man. Ɔ ti sran bɔ be kwla saci-mɛn i wun bɔ kaan sa. Ɔ yo sa i nuan su. I nyin yi min. Ɔ klo-man kɛ ɔ `yo sa tɛ. Ɔ tɛ jran cinnjin, be kwla saci-mɛn i wun bɔ kaan sa. ?Ɔ waan n kle i nyrɛnnɛn ngbɛn?»

⁴ Satan tɛli Anannganman su kɛ: «Sran i wunnɛn'n yɛ ɔ ti cinnjin i sa nun-ɔn. Kannzɛ sran kun i anyanbeun'n ɔ ti sɛ, sɛ sa'n tɔ cinnjin'n kpa'n, ɔ fɛ i anyanbeun'n fa to i ti-ɔ ɔ yo ye.

⁵ Ɔ li man ɔ́ sa kɛn i wunnɛn'n bɔ kaan sa nan nian, sɛ ɔ'a kan-man wɔ ndɛ tɛtɛ cɛ'n, a ko fa ko se.»

⁶ Anannganman waan: «I yɛ ɔ o lɛ-ɔ. M'an fɛ i m'an wla ɔ sa nun. Sanngɛ nán kun i.»

⁷ Yɛ Satan fɛ i Anannganman wun lɛ ɔli-ɔ. Ɔ fali tukpacɛ tɛ wie guali Zɔb wunnɛn'n su. Tukpacɛ sɔ'n ɔ yoli i ja'n bo lele fa juli i ti'n su.

⁸ I sɔ'n ti Zɔb fa talie bue yɛ ɔ fa fuɛnfuɛn i wun-ɔn. Yɛ ɔ ti nzuɛn'n nun.

⁹ I yi'n seli i kɛ: «?Kɛ ɔ o yɛ'n, a tɛ o wɔ osu kunngba'n nun? ?Sɛ b'a se-man ɔ kɛ a ti kpa'n, ɔ yo sɛ li? Nán kpɛ Nyanmiɛn i nzowa nan wu fi.»

¹⁰ Zɔb tɛli i su kɛ: «A kan ndɛ kɛ bla b'ɔ lɛ-man akunndan sa. ?Sɛ e nyan ye Nyanmiɛn sa nun'n, ɔ fata-man kɛ e nyan wlɛ?» I kwlaa sɔ nun'n, ndɛ tɛ kun sa ɔ'a fin-man Zɔb nuan ɔ'a fite-man.

Zɔb i janvuɛ nsan mun

¹¹ Zɔb i janvuɛ nsan be tili nyrɛnnɛn ng'ɔ tɔli i su'n i kwlaa, yɛ be fin be mɛn'm be nun lɔ be bali-ɔ. I janvuɛ sɔ mun yɛlɛ Elifaz b'ɔ fin Teman'n, yɛ Bildad b'ɔ fin Siak'n, yɛ Zɔfar b'ɔ fin Naama'n. Bé bo yoli kun kɛ be wa koko Zɔb nan be ´fɔnvɔ i.

¹² Kɛ be wunnin i mmua lɔ'n, b'a wun-mɛn i sran wlɛ. Yɛ be tɔli sunlɛ'n wun-ɔn. Be titili be wun tralɛ'm be nun, yɛ be fali ndutre guali bé ti'n su.

¹³ I sin be trannin i wun lɛ kɔnguɛ nin wia nun lele cɛn ba klonglo nso. Be nun kun sa ɔ'a uke-mɛn i nuan, afin be wunnin kɛ afɛ ng'ɔ o i su'n ɔ ti dan ngboko.