Zɔb I Nyrɛnnɛn Wunlɛ 19 - NYANMIƐN NDƐ'N 1998

Zɔb i Bildad i su tɛlɛ: i waan i ti kpɔfuɛ'n wo lɔ ɔ ´ba

¹ Zɔb tɛli i su kɛ:

² ?Amun kpa'n, blɛ onin yɛ amun ´yaci min yalɛ klelɛ nin-ɔn? Blɛ onin yɛ amun ´yaci min anwlɛn kpɔtɔlɛ nin amun ijɔlɛ beblebe nin-ɔn?

³ Min nzowa kpɛlɛ'n i kpɛ blu yɛ amun ´kpɛ yɛ. ?Kɛ amun ´kle min yalɛ sa'n, ɔ ´yo-man amun nyannzuɛn?

⁴ Sɛ bɔ n fɔnnin sakpa'n, ɔ ti min bɔbɔ min ndɛ.

⁵ Amun jaso min wun, yɛ tɔlɛ nga m'an tɔ yɛ'n, amun kan gua min su.

⁶ Sanngɛ man amun si kɛ Nyanmiɛn yɛ man sa sɔ'n tɔli min su-ɔ, ɔ guali i lala'n min su.

*

⁷ N kpan kɛ: «Ɔ ´kun min o!» Sran fi tɛ-man min su. N kpan kɛ: «Be `de min o!» Min ndɛ'n ɔ yo fɛ, sanngɛ jɔlɛ difuɛ fi kan-man.

⁸ Nyanmiɛn ɔ'a jran atin'n nun, n nyan-man sinwlɛ. Ɔ man lika'n ɔ'a dun min atin'n su.

⁹ Ɔ'a yi min anyrunnyan'n min su. Ɔ'a tu min famiɛn kle'n.

¹⁰ Ɔ lɛ-man min lika kun bɔ i sa ɔ'a kɛn-mɛn i-ɔ. M'an tɔ. Like nga n fa min wla n gua su'n, sɛ ɔ ti waka'n, wuun n ´se kɛ ɔ'a bu i ɔ'a yi i ase.

¹¹ Ɔ fali min wun ya kpa. Ɔ man ɔ'a ka min ɔ'a wla i kpɔfuɛ'm be nun.

¹² I alɛ kunfuɛ akpasua-akpasua'm be kwlaa be kpɛli min wun atin, be bali. Be wa kpɛli be ngblaliɛ'n mín sua'n i wun.

*

¹³ Ɔ fuannin min niaan mun be wanndili. Be nga be si min'n, b'a yo kɛ be si-man min kun sa.

¹⁴ Min osufuɛ mun b'a kpɔci min. Min janvuɛ kpa mun, bé wla ɔ'a fi min su.

¹⁵ Sran nga n fa be n sieli'n, ɔ nin m bɔbɔ min afanniɛn bla mun, be yo min kɛ sran bɔ be nian wun-mɛn i le sa. Be yo kɛ be si-man min sa.

¹⁶ N flɛ min sufuɛ nin-ɔn, ɔ tɛ-man min su kun. Kannzɛ n kpɛtɛ i sɛ, ɔ ti ngbɛn.

¹⁷ Mín nuan nun bɔn mín yi bue nun siɛn'n. Min wunnɛn'n bɔn kain min bɔbɔ min mma'm be bue nun.

¹⁸ Ba kanngan mun bɔbɔ be yo min finfin. Kɛ n ´ijɔ'n, wuun be ´sri min.

¹⁹ Be nga n kan n klun ndɛ n kle be laa'n, min wun yo be kwlaa be tɛ. Be nga n klo be'n, b'a jaso min wun.

²⁰ San kplo b'ɔ kata min wunnɛn'n su'n kunngba yɛ ɔ'a ka-a. Nyrɛnnɛn'n ti n sa nun ninnge kwlaa ɔ'a wie.

*

²¹ Amun `si min aunnvuɛ. Min janvuɛ mun, amun `si min aunnvuɛ. Nyanmiɛn'n yɛ ɔ yoli yɛ man sa nga nyannin min-ɔn.

²² ?Ɔ yo sɛ ti yɛ amun uka Nyanmiɛn su be kle min yalɛ nin-ɔn? ?Kɛ amun kle min nyrɛnnɛn'n, amun fɛ-man?

²³ Sɛ ɔ ti kɛ n su nyan sran ɔ ´klɛ min ndɛ nga'n, wuun ɔ ´yo min fɛ o, wuun ɔ ´klɛ be fluwa kun nun bɔ cɛ,

²⁴ wuun be ´fa blalɛ piembie nin sunmun, be ´fa klɛ i yɛbuɛ kun su bɔ cɛ.

*

²⁵ N si kɛ min ti kpɔfuɛ'n ɔ lafi-man. Asiɛ nga su wa'n, i yɛ ɔ ´jaso kasiɛn ɔ ´kan ndɛ kasiɛn nin-ɔn .

²⁶ Kɛ min wunnɛn kplo'n ko saci'n, kɛ min wunnɛn ba'n ko wie'n, n ´wun Nyanmiɛn.

²⁷ N ´wun i bɔbɔ'n sa, m bɔbɔ n ´wun i. M'an se-man kɛ sran uflɛ. M'an fɛ cɛn sɔ'n i minndɛlɛ nun.

²⁸ Amun bɔ amun usa amun wun kɛ: «?E ´yo sɛ nan y'a trɛ i'n?» Amun bɔ amun waan sa ng'ɔ juli min su'n ɔ fin min bɔbɔ'n,

²⁹ amun `nian amun wun kpa nán tokofi'n ɔ nyan amun. Afin sran ti fualɛ'n i tantrantan sa'n, i akatua yɛlɛ wie'n. Amun `si kɛ Nyanmiɛn ɔ wa di sran'm be jɔlɛ.