Zɔb I Nyrɛnnɛn Wunlɛ 18 - NYANMIƐN NDƐ'N 1998

Bildad i ndɛ nnyɔn su b'ɔ kannin'n: Sran ng'ɔ bu-man Nyanmiɛn like fi'n i wun aya

¹ Bildad b'ɔ fin Siak'n ɔ kannin wie. I waan:

² ?Blɛ onin yɛ a ´wie ndɛ ng'ɔ o lɛ'm be kan-an? Sie ɔ su man e kan wie.

³ ?Ɔ yo sɛ ti yɛ a bu ye nnɛn sɔ-ɔ? ?Ɔ yo sɛ ti yɛ a bu ye sinnglinfuɛ sɔ-ɔ?

⁴ Ɔ ya nga a fɛ i lɛ'n, ɔ bɔbɔ ɔ wun tɛ yɛ a yo-ɔ. ?A bu i kɛ ɔ dunman nun ti sran'm be ´wie mɛn'n nun? ?A bu i kɛ yɛbuɛ tanda'm be ´tu be bo?

*

⁵ Sran ng'ɔ bu-man Nyanmiɛn like fi'n i kannin'n ɔ ´nuan, i gbo'n nun sin'n su jue-man kun.

⁶ I sua'n nun kannin'n ɔ su kpaja-man kun, ɔ ´nuɛn i su .

⁷ I nantilɛ wawa'n ɔ ´go nun, i jajalɛ ng'ɔ jaja'n ɔ ´yi i bɔbɔ i ase.

⁸ Ɔ ´ko tɔ zɔ nun, ɔ ´kpɛn aya nun sɛsɛsɛ.

⁹ Aya'n ɔ ´trɛ ja sin'n, aya'n i go'n ɔ ´trɛ i miɛn i fii.

¹⁰ Asiɛ'n ɔ kata nyanman sɔ'n b'ɔ trɛ i'n su, yɛ ble ng'ɔ ´tɔ i su'n, ɔ o i atin'n su.

¹¹ Sa sroesroe'm be fin wa be fin wa, be fu i nun be tɔ i su. Be su i su be fuɛn i kɛ sran su fuan nnɛn sa.

*

¹² Awe'n ti i wunmiɛn'n kwlaa ɔ'a wie, awe'n ɔ'a kpɛn i su, yalɛ'n ɔ'a di i.

¹³ I wunnɛn'n titi sa puɛpuɛpuɛ. Tukpacɛ'n ɔ ´didi i wunnɛn'n.

¹⁴ I sua ng'ɔ o nun bɔ i klun ti-mɛn i'n, be wa yi i nun ´fite. Be ´fɛ i ´kɔ blɔlɔ lɔ famiɛn'n i nyrun.

¹⁵ Be tran i sua'n nun-ɔn ɔ yo ye, sran nun-man nun kun. Be ´fa sufru be ´guɛ i tranwlɛ'n nun.

¹⁶ Ɔ ´yo kɛ waka bɔ i bo olui'n nin i sama'm b'a wu'n sa.

*

¹⁷ Be wla ´fi i su asiɛ'n su, be su bo-mɛn i dunman lika fi nun kun.

¹⁸ B'a fuɛn i wia'n nun b'a yi i aosin'n nun. B'a kɛn i bo mɛn'n nun mlɔnmlɔn.

¹⁹ Ɔ lɛ-man ba annzɛ anunman bɔ be ´kɛ i osu i nvle'n nun-ɔn. I fuɛ wie fi nyin nun-man su kun b'ɔ ´tran i awlo'n nun-ɔn.

²⁰ Wia atɔliɛ lɔfuɛ mun nin wia afiliɛ lɔfuɛ'm be ´ti sa ng'ɔ juli i su'n, yɛ bé nuan'n ´bo be wun.

²¹ Kɛ sa tɛ yofuɛ'n i awlo'n ɔ ti kɛ ng'ɔ o lɛ'n sa. Be nga bɔ be si-man Nyanmiɛn'n, kɛ be tranwlɛ'n ɔ ti kɛ ng'ɔ o lɛ'n sa.