Zɔb I Nyrɛnnɛn Wunlɛ 17 - NYANMIƐN NDƐ'N 1998

Zɔb i Elifaz i su tɛlɛ'n i wie ekun yɛ: i waan i wla'n ɔ gua-man ase kun

¹ N lo wunmiɛn-ɔn ɔ gua-man ase kun, m'an wie wu. Asieliɛ'n ɔ su minndɛ min.

² Be nga be o min wun wa'n be ti sran srisrifuɛ. Be nzowa'n ti n nyan-man min nyinma buwlɛ.

³ Ee! Min Nyanmiɛn, ɔ bɔbɔ yo mín sin jranfuɛ. ?Afin wan cɛ yɛ ɔ ´jran mín sin-ɔn, sɛ nán wɔ'n?

⁴ A yoli man min janvuɛ'm be akunndan'n ɔ'a wie. Nán kplin su kɛ be yɛ be `kwlaa-a.

⁵ ?Be nyan-man aliɛ be man-man be mma mun-ɔn, be ta nzrafuɛ sɛ?

*

⁶ Be fa min be kpɛ be flɛn. Min yɛ m'an kaci be sran bɔ be ti bé nuan nzue tɛ i nyrun-ɔn.

⁷ Min nyinma'n ɔ'a wie si klunngbɔ'n ti. Min wunnɛn'n ɔ'a yo kɛ nán min wunnɛn sa.

⁸ Sran kpa'm bé nuan'n bo be wun. Be bɔ be se bé wun kɛ be yo-man sa tɛ'n, be bu min fɔ, be waan n sro-man Nyanmiɛn.

⁹ Man be bɔ be ti sɛsɛ'n, be tran cinnjin atin bɔ be fali'n i su. Man be bɔ be ti saun'n, be tra be anwlɛn.

¹⁰ Sanngɛ min janvuɛ mun amun kwlaa amun `bla, n wun-man ngwlɛlɛfuɛ fi amun nun.

*

¹¹ Min cɛn'n ɔ'a ju. Sa nga n jajali be bɔ be ti cinnjin min sa nun'n b'a saci.

¹² Min janvuɛ'm be fa kɔnguɛ'n bu wia, be waan aliɛ su wa cɛn kusu wuun ɔ su san.

¹³ Awlo nga min akunndan'n wo su kɛ e ´se yɛ'n, yɛlɛ blɔlɔ lɔ lika'n. Blɔlɔ lɔ aosin'n nun yɛ n ´ko sɛ min bɛ nin-ɔn.

¹⁴ N flɛ asieliɛ'n kɛ mín si yɛ n flɛ kakaa mma'm be kɛ min nín nin min niaan bla mun.

¹⁵ ?Min wla ase guawlɛ'n wo nin? ?Wan yɛ ɔ wun i-ɔ?

¹⁶ E nin i e nnyɔn'n yɛ e ´kɔ blɔlɔ nin-ɔn. Be ´wla ye ase likawlɛ.